សម្ដេច ម៉ែន សំអន អញ្ជើញប្រកាសទទួលស្គាល់គណៈកម្មាធិការរណសិរ្សសាមគ្គី អភិវឌ្ឍន៍មាតុភូមិកម្ពុជាខេត្ត និងសមាសភាពគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តក្រចេះ

នាឱកាសអញ្ជើញជាអធិបតីដ៏ខ្ពង់ខ្ពស់ នៃពិធីប្រកាសទទួលស្គាល់​គណៈកម្មាធិការ​រណ​សិរ្ស​សាមគ្គី អភិវឌ្ឍន៍មាតុភូមិកម្ពុជាខេត្ត និងទទួលស្គាល់សមាស​ភាព​គណៈកម្មការ​សាខា​សមាគម​នារី​កម្ពុជា ដើម្បីសន្តិភាព និងអភិវឌ្ឍន៍ខេត្តក្រចេះ នៅឯសាលមហោស្រព ខេត្តក្រចេះ នា​ព្រឹក​ថ្ងៃ​ទី២២ ខែកញ្ញា ឆ្នាំ២០២៤ សម្តេចកិត្តិសង្គហបណ្ឌិត ម៉ែន សំអន ប្រធាន​ក្រុម​ប្រឹក្សា​ជាតិ​រណសិរ្ស​សាមគ្គីអភិវឌ្ឍន៍មាតុភូមិកម្ពុជា បានមានប្រសាសន៍ថា ភារកិច្ចស្នូល ២ ក្នុង​ចំណោម​ភារកិច្ច​ស្នូល​នានារបស់រណសិរ្សសាមគ្គីអភិវឌ្ឍន៍មាតុភូមិកម្ពុជា គឺការលើកកម្ពស់​ជីវភាព​រស់​នៅ​របស់​ប្រជាជន​ឱ្យមានការរីកចម្រើន និងរួមចំណែកកសាង និងអភិវឌ្ឍន៍ប្រទេសជាតិ។

សម្ដេចកិត្តិសង្គហបណ្ឌិត បានសង្កត់ធ្ងន់ថា ខេត្តក្រចេះ គឺជាខេត្តដ៏សំខាន់ និងផ្ដល់ភ័ព្វសំណាង ក៏​ដូចជាអាយុជីវិតដល់ប្រជាជន និងប្រទេសកម្ពុជា ដ្បិតថា ភូមិជើងឃ្លូន ឃុំ២ធ្នូ ស្រុកស្នួល ខេត្ត​ក្រចេះ នេះ គឺជាទីកំណើតនៃរណសិរ្ស ២ ធ្នូ ហើយប្រសិនបើពុំមានរណសិរ្ស ២ ធ្នូ ទេនោះ ក៏​ពុំ​មាន​ ៧មករា ១៩៧៩ ដែរ ហើយបើពុំមាន ៧មករា ១៩៧៩ ទេនោះ អាយុជីវិត​របស់​ប្រជាជន​កម្ពុជា​ទូទាំង​ប្រទេស និងប្រទេសជាតិខ្មែរទាំងមូល នឹងទៅជាយ៉ាងណា ហើយក៏ប្រាក​ជា​មិន​អាច​មាន​សុខ​សន្តិភាព និងការអភិវឌ្ឍគ្រប់វិស័យដូចថ្ងៃនេះដែរ ។

សម្តេចកិត្តិសង្គហបណ្ឌិត ក៏បានលើកឡើងអំពីភារកិច្ចរបស់រណសិរ្សសាមគ្គី អភិវឌ្ឍន៍​មាតុភូមិ​កម្ពុជា​ គឺរួមចំណែកអភិវឌ្ឍន៍ធនធានមនុស្ស ក្នុងគ្រប់សមាសភាពសង្គម ពង្រីកសាមគ្គី លើក​កម្ពស់​ការ​អប់រំ សីលធម៌ ចរិយាធម៌ មនសិការស្នេហាជាតិរក្សាប្រពៃណី ទំនៀមទម្លាប់ រក្សា​ឯករាជ្យ អធិបតេយ្យ និងបូរណភាពទឹកដី លើកកម្ពស់ការអប់រំ គោរពសិទ្ធិស្ត្រី សិទ្ធិកុមារ លិទ្ធិ​ប្រជា​ធិបតេយ្យ សមភាព យុត្តិធម៌ សង្គម និងគោរពច្បាប់ ទប់ស្កាត់រាល់អំពើរំលោភបំពាន និង​ជិះ​ជាន់​កេង​ប្រវ័ញ្ចមកលើស្រ្តីភេទ និងកុមារ អប់រំប្រជាជនឱ្យយល់​ដឹងពីគ្រោះថ្នាក់​នៃ​ការ​ប្រើ​ប្រាស់​​គ្រឿងញៀនគ្រប់ប្រភេទ ទប់ស្កាត់រាល់អំពើហិង្សាក្នុងគ្រួសារ ការរាលដាលជំងឺឆ្លងនានា មាន​ជំងឺ​អេដស៍ជាដើម ជួយចាស់ព្រឹទ្ធាចារ្យ ស្ត្រីមេម៉ាយ ជនពិការ និងកុមារកំព្រាគ្មានទីពំនឹង ដោយ​ការបណ្តុះបណ្តាលមុខរបរសមស្រប ពង្រឹងសាមគ្គីភាព មិត្តភាព និង​សហប្រតិបត្តិការ​ជាមួយ​បណ្តាប្រទេសជិតខាង និងពិភពលោក។

ទន្ទឹមនឹងនោះផងដែរ សម្តេចកិត្តិសង្គហបណ្ឌិត ក៏បានណែនាំដល់សាខាសមាគមនារីកម្ពុជា ដើម្បី​សន្តិភាព និងអភិវឌ្ឍន៍ខេត្តក្រចេះឱ្យស្វែងយល់ និងអនុវត្ត​ឱ្យ​បាន​នូវ​គោល​នយោបាយ​គោល​ការណ៍​ដឹកនាំរបស់បក្ស និងរាជរដ្ឋាភិបាល។ គោរព និងអនុវត្តតាម​លក្ខន្តិកៈ​សមាគម​នារី​កម្ពុជា​ ដើម្បីសន្តិភាព និងអភិវឌ្ឍន៍ឱ្យបានខ្ជាប់ខ្ជួន។ ពង្រឹងរចនាសម្ព័ន្ធ និងពង្រីក​សមាជិក​សមាគម​នារី​ឱ្យបានច្រើន។ សមាសភាពសមាគមនារី ដែលបានកែសម្រួល និងបំពេញ​បន្ថែម​ថ្មី​ត្រូវ​ចូល​រួមអនុវត្តឱ្យបានជោគជ័យនូវទិសដៅយុទ្ធសាស្ត្រ និងផែនការ​សកម្មភាព​របស់​ខេត្ត​ក៏​ដូច​ជា​ផែនការសកម្មភាពរបស់សមាគមនារីកម្ពុជា ដើម្បីសន្តិភាព និងអភិវឌ្ឍន៍។ យក​ចិត្ត​ទុក​ដាក់​ពង្រឹង​សាមគ្គីភាព ឯកភាពផ្ទៃក្នុងទាំងទស្សនៈ គោលជំហរឱ្យបានល្អ រួមគ្នាទទួល​ខុស​ត្រូវ​រាល់​ភារកិច្ច​ដែល​បានកំណត់ ពង្រឹងមិត្តភាព រក្សាទំនាក់ទំនងជិតស្និទ្ធរវាងថ្នាក់ដឹកនាំ និងមន្ត្រី​គ្រប់​លំដាប់​ថ្នាក់​ទាំងអស់ ដើម្បីបង្កើនប្រសិទ្ធភាព និងគុណភាពការងារ។ ខិតខំការពារ​ផល​ប្រយោជន៍ និងពង្រឹងសមត្ថភាពដល់ស្ត្រី តាមរយៈការបណ្តុះបណ្តាលជំនាញ ជាពិសេស​ការ​ប្រើ​ប្រាស់​ប្រព័ន្ធ​ព័ត៌មានវិទ្យា ដើម្បីមានលទ្ធភាពបំពេញការងារប្រកបដោយគុណភាព និងប្រសិទ្ធ​ភាព​ក្នុង​យុគសម័យឌីជីថល និងរៀបចំប្រជុំគណៈកម្មការសាខាឱ្យបានទៀងទាត់ ដើម្បីរាយ​ការណ៍ និងបូកសរុប វាយតម្លៃសភាពការណ៍ និងមានវិធានដោះស្រាយបានត្រឹមត្រូវ និង​ទាន់​ពេល​វេលា​៕ អត្ថបទ៖ ប្រាក់ វ៉ាន់ដា