ព័ត៌មាន

មន្រ្ដីជាន់ខ្ពស់ក្រសួងសុខាភិបាល ណែនាំគ្រូពេទ្យត្រូវប្រកាន់ឥរិយាបថទន់ភ្លន់ពេលពិគ្រោះ និងពិនិត្យព្យាបាលជំងឺ

ឯកឧត្តមវេជ្ជបណ្ឌិត បាន បុត្តា អនុរដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាគណៈឱសថការីជាតិ បានណែនាំដល់ក្រុមគ្រូពេទ្យ ត្រូវយកចិត្តទុកដាក់ផ្ដល់សេវាថែទាំសុខភាព ជូនពលរដ្ឋក្នុងឥរិយាបថទន់ភ្លន់ នៅពេលដែលពួកគាត់ចូលមកពិគ្រោះពិភាក្សាយោបល់ ដើម្បីទទួលយកការព្យាបាលជំងឺ នៅតាមមន្ទីរពេទ្យ និងមណ្ឌលសុខភាពរបស់រដ្ឋ ក៏ដូចជាមន្ទីរពេទ្យឯកជនណាមួយ។

ការលើកឡើងរបស់មន្ត្រីជាន់ខ្ពស់ ក្រសួងសុខាភិបាលបែបនេះបានធ្វើឡើងក្នុងឱកាស ឯកឧត្តម អញ្ជើញជួបសំណេះសំណាល ផ្សព្វផ្សាយច្បាប់ក្រមសិលធម៏ឪសថ និងច្បាប់ស្តីពីការគ្រប់គ្រងអ្នកប្រកបវិជ្ជាជីវៈសុខាភិបាល នៅមន្ទីរសុខាភិបាលខេត្តស្វាយរៀង ថ្ងៃទី២១ ខែកញ្ញា ឆ្នាំ២០២៤ ។

ឯកឧត្តមវេជ្ជបណ្ឌឹតនូវបានអបអរសារទរចំពោះមន្ត្រីរាជការ លោកវេជ្ជបណ្ឌិត លោកគ្រូ អ្នកគ្រូពេទ្យ ពិសេសសមាជិក សមាជិកា នៅក្នុងក្រុមប្រឹក្សាគណៈគ្រូពេទ្យ ដែលកន្លងមកបានរួមអនុវត្តពិនិត្យ និងព្យាបាលជំងឺជូនពលរដ្ឋបានល្អ និងតាមក្រមសិលធម៌ វិជ្ជាជីវៈ គ្រូពេទ្យប្រកបដោយទេពកោសល្យ។

ក្នុងឱកាសនោះឯកឧត្តមវេជ្ជបណ្ឌិតបានណែនាំដល់ក្រុមគ្រូពេទ្យ ត្រូវបន្តប្រព្រឹត្តអំពើល្អ គ្រប់ពេលដែលពលរដ្ឋមករកសេវា តាមរយៈបង្ហាញ កាយវិការរួសរាយរាក់ទាក់ ក្នុងឥរិយាបទទន់ភ្លន់ ក្នុងករណីពលរដ្ឋមិនស្គាល់ទីតាំងពិគ្រោះយោបល់ ឬទីតាំងសម្រាកព្យាបាល ឬ ទទួលយកសេវាផ្សេងៗ គ្រូពេទ្យត្រូវណែនាំបង្ហញទីតាំងជូនពួកគាត់ ការដែលក្រុមគ្រូពេទ្យរបស់យើងប្រើប្រាស់ឥរិយាបទបែបខាងលើនេះ គឺជាចំណែកក្នុងការចូលរួមជួយបង្កើនជំនឿពលរដ្ឋមកលើការដឹកនាំរាជរដ្ឋាភិបាល ហើយក៏ជាការទាក់ទាញអតិថិជនឱ្យមករកសេវាព្យាបាលរបស់ពេទ្យរដ្ឋផងដែរ ។

លោកវេជ្ជបណ្ឌិត ទែន សាបុណ្យ អនុប្រធានមន្ទីរសុខាភិបាលខេត្តស្វាយរៀងបានបញ្ជាក់ឲ្យដឹងថាក្នុងរយៈពេល៨ខែ ឆ្នាំ២០២៤ ក្រុមប្រឹក្សាគណៈគ្រូពេទ្យខេត្ត បានអនុវត្តការងារចុះបញ្ជីការគណៈឱសថការីខេត្តបានចំនួន៧៤រូប ចេញអាជ្ញាប័ណ្ណឱសថការីដំបូងជូនសមាជិកគណៈឱសថការីបានចំនួន១២នាក់ និងបន្តអាជ្ញាប័ណ្ណបានចំនួន៦០នាក់ និងចុះធ្វើការត្រួតពិនិត្យបន្ទាប់ពិគ្រោះយោបល់ និងឱសថដ្ឋាននៅតាមស្រុកក្រុងទាំង៨របស់ខេត្តបានចំនួន៥២កន្លែងផងដែរ៕