ឯកឧត្តម ប៉ែន បូណា៖ កត្តាសុខសន្ដិភាពអាច​ឱ្យពលរដ្ឋមាន​ឱកាស​រីករាយ​ជួបជុំ​គ្រួសារ​នា​រដូវ​បុណ្យជាតិធំៗ

ឯកឧត្តម ប៉ែន បូណា មានប្រសាន៍ថា បច្ចុប្បន្ន ឱ្យតែមានពិធីបុណ្យ ឬសូម្បី​តែ​ពេល​សម្រាក​ចុង​សប្តាហ៍ ប្រជាពលរដ្ឋខ្មែរតែងដណ្តឹងសួរគ្នាថា តើគួរទៅដើរលេងនៅទីណា? សំណួរនេះ​បាន​ផុស​ចេញ​ពី​បបូរមាត់មនុស្សស្ទើរតែគ្រប់គ្នានៅពេលបានជួបមិត្តភ័ក្តិ ឬអ្នកធ្លាប់ស្គាល់គ្នា។ ការ​ជជែក​ផ្លាស់​ប្តូរយោបល់អំពីទីន្លែងដើរកម្សាន្ត​កើត​ឡើង​តែ​ក្នុង​បរិបទ​ដែល​ប្រជាពលរដ្ឋ​មាន​លំនឹង​ក្នុង​ចិត្តហើយទទួលបានសេចក្តីសុខកាន់តែខ្លាំងជាលំដាប់ក្នុងអារម្មណ៍របស់ខ្លួន។

ឯកឧត្តមបន្តថា ជាក់ស្តែងក្នុងអំឡុងពេលបុណ្យភ្ជុំបិណ្ឌនេះ ប្រជាពលរដ្ឋខ្មែរបានជួបជុំគ្រួសារ ញាតិ​មិត្ត បងប្អូន​ដើម្បី​ទៅវ​ត្ត​ធ្វើបុ​ណ្យ​ទាន​ព្រម​ទាំង​ដើរ​កម្សាន្ត​តាម​ទី​រមណីយដ្ឋាន​ផ្សេងៗ​ទៅ​តាម​ចិត្ត​ចង់។ អ្វីដែលគួរឱ្យកត់សម្គាល់គឺ មិនថាជំនួបក្នុងទ្រង់ទ្រាយបែបណា ឬនៅទីណាឡើយ ក្តី​សប្បាយរីករាយ សំណើចក្អាកក្អាយ និងស្នាមញញឹម កើតមាននៅទីនោះ។

ទិដ្ឋភាព​បែបនេះកើតឡើងដោយសារប្រជាពលរដ្ឋខ្មែររស់នៅក្នុងសុខសន្តិភាពរយៈពេលយូរ ក្នុង​ប្រទេសដែលមានស្ថិរភាពនយោបាយល្អ មានកំណើនជីវភាព មាន​ហេដ្ឋា​រចនា​សម្ព័ន្ធ​ផ្លូវ​ថ្នល់​ល្អ​ស្អាត​ ប្រទាក់ក្រឡាគ្នា មានមធ្យោបាយធ្វើដំណើរសម្បូរបែប មានការអភិវឌ្ឍន៍មិនធ្លាប់មានពីមុន ដែល​ធ្វើឱ្យប្រជាពលរដ្ឋខ្មែរមានភាពកក់ក្តៅនិងមានក្តីសង្ឃឹមក្នុងជីវិតកាន់តែខ្លាំងឡើង។ មិនថា​ក្នុង​ឬ​ក្រៅប្រទេស ពលរដ្ឋខ្មែរនាំគ្នាដើរកម្សាន្តគ្រប់ទិសទី។

ឯកឧត្តម ប៉ែន បូណា  បញ្ជាក់ថា សុខសន្តិភាពរយៈពេលយូរដែលជាស្នាដៃសម្តេចតេជោ ហ៊ុន សែន អតីតនាយករដ្ឋមន្ត្រី និងការធានា​ការពារ​សន្តិភាព​មិន​ឱ្យ​បាត់​បង់​ពី​សំណាក់​រាជ​រដ្ឋាភិបាល​ដឹក​នាំ​ដោយ​សម្តេចធិបតី ហ៊ុន ម៉ាណែត បាននិងកំពុង​ធ្វើ​ឱ្យ​ប្រជា​ពលរដ្ឋ​ខ្មែរ​ផ្លាស់​ប្តូរ​ផ្នត់​គំនិត​ខុស​ពី​មុន​ស្រឡះពោលគឺផ្លាស់ប្តូរពីការរស់នៅដោយការភ័យខ្លាចកាលពីសម័យសង្គ្រាម មក​ជា​ការ​រស់​នៅក្នុងក្តីសប្បាយរីករាយតាមបែបមនុស្សក្នុងសង្គមស៊ីវីឡាយ។ នេះគឺជា​ការ​ផ្លាស់ប្តូរ​ផ្នត់​គំនិត​ដ៏​ស៊ីជម្រៅបំផុតមួយរបស់ប្រជាពលរដ្ឋខ្មែរ៕ អត្ថបទ៖ វ៉ន ដារ៉ា