វគ្គបណ្ដុះបណ្ដាលស្ដីពី “ការប្រើប្រាស់ប្រព័ន្ធថ្នាលឌីជីថល របស់គណៈកម្មាធិការអាហារូបករណ៍ អ.ម.ត” ទទួលបានលទ្ធផលផ្លែផ្កាជាទីមោទនៈ

នាថ្ងៃទី១២ ខែកញ្ញា ឆ្នាំ២០២៥ គណៈកម្មាធិការអាហារូបករណ៍សិស្ស-និស្សិតក្រីក្រ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានរៀបចំវគ្គបណ្ដុះបណ្ដាលស្ដីពី “ការប្រើប្រាស់ប្រព័ន្ធថ្នាលឌីជីថល អ.ម.ត” រយៈពេលមួយថ្ងៃពេញ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ប្រធានផ្នែក តំណាងស្ថាប័ន អង្គភាពពាក់ព័ន្ធនឹងកិច្ចការអាហារូបករណ៍ និងក្រុមការងារ នៅសាកលវិទ្យាល័យពុទ្ធិសាស្រ្ត។

វគ្គបណ្តុះបណ្តាលនាពេលនេះ ត្រូវបានរៀបចំឡើងក្នុងគោលបំណង ផ្តល់ជាឱកាសដល់គ្រប់តួអង្គពាក់ព័ន្ធទទួលបាននូវចំណេះដឹង នីតិវិធី និងបទពិសោធនៃការប្រើប្រាស់ប្រព័ន្ធថ្នាលឌីជីថល អ.ម.ត ពីសំណាក់ក្រុមការងារបច្ចេកទេស ក៏ដូចជាចូលរួមអនុវត្តផ្ទាល់ ដោយលើកជាសំណួរ និងផ្លាស់ប្តូរមតិយោបល់ ដើម្បីជាគុណវុឌ្ឍិសម្រាប់ការបំពេញភារកិច្ចរៀងៗខ្លួនឱ្យកាន់តែល្អប្រសើរទ្បើងថែមទៀត៕