ក្រសួងការងារ បើកវេទិកាថ្នាក់ក្រោមជាតិក្រោមមូលបទ “យុវជន និងការងារសមរម្យ” ដើម្បី​បង្កើន​ការ​យល់ដឹងដល់យុវជនអំពីក្របខ័ណ្ឌការងារសមរម្យជាសកល

ភ្នំពេញ៖ ឯកឧត្តម គួច សុមាន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រី​ក្រសួង​ការងារ និងបណ្តុះបណ្តាលវិជ្ជាជីវៈ បានចូលរួម​ជាអ​ធិបតី​ក្នុង​វេទិកា​ថ្នាក់​ក្រោម​ជាតិ​ក្រោម​មូល​បទ “យុវជន និងការងារសមរម្យ” នាព្រឹកថ្ងៃទី១៤ ខែកញ្ញា ឆ្នាំ២០២៥ នៅសណ្ឋាគារកាំបូឌីយ៉ាណា។

វេទិកាដ៏មានសារៈសំខាន់នេះ មានអ្នកចូលរួមប្រមាណ ២០០នាក់មកពីតំណាងក្រសួងស្ថាប័នថ្នាក់ជាតិ និងថ្នាក់ក្រោមជាតិគ្រប់វិស័យ សង្គមស៊ីវិល និងវិស័យឯកជនដើម្បីបង្កើនការយល់ដឹងដល់យុវជនអំពីក្របខ័ណ្ឌការងារសមរម្យជាសកល យន្តការពង្រីកទីផ្សារការងារ ព្រមទាំងការធានា និងពង្រីកនូវប្រព័ន្ធកិច្ចគាំពារសង្គម។

ដើម្បីជំរុញការផ្សព្វផ្សាយស្តីពីក្របខ័ណ្ឌការងារសមរម្យដល់យុវជនឱ្យកាន់តែច្បាស់បន្ថែមទៀត វេទិកា ក៏បានរៀបចំការធ្វើបទបង្ហាញ និងកិច្ចពិភាក្សា លើប្រធានបទការងារសមរម្យ បច្ចុប្បន្នភាពទីផ្សារការងារ ការធានាសុវត្ថិភាពនៅកន្លែងការងារ និងតួនាទីសំខាន់របស់និយោជកក្នុងការអនុវត្តច្បាប់ការងារផងដែរ ៕