ព័ត៌មាន
ឧត្តមសេនីយ៍ឯក ឡាំង អូណា៖ កងពលតូចដឹកជញ្ជូនលេខ៩៩ បានរួមចំណែកក្នុងបេសកកម្ម នៃការការពារបូរណភាពទឹកដី
ឧត្ដមសេនីយ៍ឯក ឡាំង អូណា អគ្គលេខាធិការរងក្រសួងការពារជាតិ បានលើកឡើងថា កងពលតូចដឹកជញ្ជូនលេខ៩៩ គឺជាមូលដ្ឋានដ៏សំខាន់ ដោយបានរួមចំណែកយ៉ាងសកម្ម ក្នុងកិច្ចការពារនូវអធិបតេយ្យ និងបូរណភាពទឹកដី រួមទាំងបានរួមចំណែកក្នុងការជួយសង្រ្គោះពលរដ្ឋរងគ្រោះដោយគ្រោះធម្មជាតិនានាដើម។
ក្នុងឱកាសអញ្ជើញដឹកនាំនាយទាហាន នាយទាហានរង ពលទាហាន និងសិក្ខាកាមវគ្គបណ្តុះបណ្តាលការងាររដ្ឋបាលជំនាន់ទី៤ និងជំនាន់ទី៥ ចុះកម្មសិក្សាឈ្វេងយល់ពីរចនាសម្ព័ន្ធ តួនាទីភារកិច្ចរបស់កងពលតូចដឹកជញ្ជូនលេខ ៩៩ នាព្រឹកថ្ងៃទី១៧ ខែកញ្ញា ឆ្នាំ២០២៥នេះ លោកឧត្តមសេនីយ៍ឯក ឡាំង អូណា បានលើកឡើងថា ស្របពេលដែលប្រទេសជាតិយើង ទទួលរងនូវការឈ្លានពានពីបរទេស តួនាទីរបស់កងពលតូចដឹកជញ្ជូនលេខ៩៩ គឺពិតជាមានសារៈសំខាន់ តាមរយៈការផ្គត់ផ្គង់ផ្នែកដឹកជញ្ជូន និងគាំទ្រគ្រប់យុទ្ធសាស្ត្រនៃកិច្ចការពារជាតិ។ នេះបង្ហាញឱ្យឃើញថា កងពលតូចដឹកជញ្ជូនលេខ៩៩ ជាមូលដ្ឋានដ៏សំខាន់ រួមចំណែកក្នុងបេសកកម្ម នៃការការពារអធិបតេយ្យ បូរណភាពទឹកដី។
ឧត្តមសេនីយ៍ឯក ឡាំង អូណា បានបន្ថែមទៀតថា ជម្លោះព្រំដែនកម្ពុជា-ថៃ ពិតមែនមានរយៈពេលខ្លី ប៉ុន្តែជាព្រឹត្តិការណ៍ប្រវត្តិសាស្រ្តមួយ ដែលធ្វើឱ្យខ្មែរយើងចងចាំ និងមិនអាចបំភ្លេចបានឡើយ។ ការប្រយុទ្ធគ្នារយៈពេល ៥ថ្ងៃកន្លងមកនេះ វាបានបង្កនូវវិនាសកម្មយ៉ាងធំធេង និងធ្ងន់ធ្ងរបំផុតលើដែនអធិបតេយ្យរបស់កម្ពុជា ពិសេសមកលើប្រាសាទព្រះវិហារ ប្រាសាទតាមាន់តូច តាមាន់ធំ និងប្រាសាតាក្របី រួមជាមួយវត្តអារាម ផ្ទះសម្បែង ព្រមទាំងបានសម្លាប់ប្រជាជនខ្មែរស្លូតត្រង់ ដែលរស់នៅតាមបន្ទាត់ព្រំដែនផងដែរ។
លោកឧត្តមសេនីយ៍ បានលើកឡើងទៀតថា សង្រ្គាមបានបង្កផលលំបាកដល់ជីវភាពរបស់ប្រជាពលរដ្ឋ ដែលរស់នៅតាមបបន្ទាត់ព្រំដែន។ លោកបន្តថា បើទោះបីការប្រយុទ្ធគ្នាបានបញ្ចប់ តាមរយៈកិច្ចព្រមព្រៀងបទឈប់បាញ់រវាងកម្ពុជា-ថៃ កាលពីថ្ងៃទី២៨ ខែកក្កដា ឆ្នាំ២០២៥ នៅប្រទេសម៉ាឡេស៊ីក្ដី បញ្ហាជាច្រើននៅតែបន្តកើតមាន ដោយការធ្វើទុកបុកម្នេញរបស់កងទ័ពថៃ មកលើកម្ពុជា តាមរយៈសកម្មភាពប្រើប្រាស់កងកម្លាំងប្រដាប់អាវុធ រាយរបងលួស ដាក់កង់ឡាន នៅតាមភូមិខ្មែរជាប់ព្រំដែន និងការផ្សព្វផ្សាយព័ត៌មានមិនពិត ពិសេសការថ្លែងសារញុះញុង របស់មេទ័ពថៃនេះតែម្ដង។
ទាក់ទងនឹងការចុះកម្មសិក្សាឈ្វេងយល់អំពី រចនាសម្ព័ន្ធ តួនាទី ភារកិច្ចរបស់កងពលតូចដឹកជញ្ជូនលេខ៩៩នេះ លោកឧត្តមសេនីយ៍ឯក ឡាំ អូណាបានលើកឡើងថា ជាកម្មវិធីដ៏មានសារៈសំខាន់ ដែលផ្តល់ឱកាសឲ្យសិក្ខាកាមយើងទទួលបានចំណេះដឹង និងបទពិសោធថ្មីៗ ហើយវាមិនត្រឹមតែបំពេញបន្ថែមទៅលើការសិក្សានៅក្នុងថ្នាក់រៀនប៉ុណ្ណោះទេ ប៉ុន្តែវាជាការបញ្ចូលគ្នារវាងការសិក្សាផ្នែកទ្រឹស្ដី និងការអនុវត្តជាក់ស្តែង។
បើតាមលោកឧត្តមសេនីយ៍ ហ៊ុល វណ្ណឌី មេបញ្ជាការរង និងជានាយសេនាធិការ កងពលតូចដឹកជញ្ជូនលេខ៩៩ បានឲ្យដឹងថា ដោយមានការជួយជ្រោគជ្រែង ពីឯកឧត្តម នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ អង្គភាពមានការរីកចម្រើនយ៉ាងឆាប់រហ័ស ពីកងអនុសេនាធំដឹកជញ្ជូន មកជាកងពលតូចដឹកជញ្ជូន ដែលដំបូងអង្គភាពមានរថយន្តត្រឹមតែ ៥គ្រឿង អ្នកបើកបរ ៣៨នាក់ ទ័ព១០៧នាក់ប៉ុណ្ណោះ លុះដល់ឆ្នាំ២០១០ បានបង្កើតទៅជាកងពលតូចដឹកជញ្ជូនលេខ៩៩។ បច្ចុប្បន្ននេះ អង្គភាពមាន ៨ ការិយាល័យ.១គិលានដ្ឋាន. ១យានដ្ឋានជួសជុលរថយន្ត . ៣ វរសេនាតូច.និង៤កងអនុសេនាធំចំណុះ៕ អត្ថបទ៖ បាន ចក់
-
ព័ត៌មាន2 days agoក្រុមគ្រូពេទ្យខេត្តកោះកុង ចុះបេសកម្មពិនិត្យព្យាបាលជំងឺទូទៅ អប់រំសុខភាពមាត់ធ្មេញជូនប្រជាពលរដ្ឋនៅឃុំថ្មដូនពៅ
-
ព័ត៌មាន6 days agoគណៈប្រតិភូជាន់ខ្ពស់រដ្ឋសភាកម្ពុជា អញ្ជើញដាក់កម្រងផ្កា និងគោរពវិញ្ញាណក្ខន្ធវីរបុរសជាតិ និងយុទ្ធជនពលីដើម្បីបុព្វហេតុជាតិ របស់ប្រទេសអាស៊ែបៃហ្សង់
-
ព័ត៌មាន4 days agoឃាត់ខ្លួនជនបរទេសជាង១០០នាក់ ពាក់ព័ន្ធការឆបោកតាមប្រព័ន្ធបច្ចេកវិទ្យា ក្នុងអគារខនដូរ១កន្លែង នៅសង្កាត់បឹងសាឡាង ខណ្ឌទួលគោក
-
ព័ត៌មាន4 days agoឯកឧត្តម សាយ សំអាល់៖ ការរស់នៅបានសុខក្នុងសន្តិភាព ធ្វើឲ្យជាតិសាសន៍នានានៅកម្ពុជារួមគ្នាប្រឆាំងសង្គ្រាម
-
ព័ត៌មាន6 days agoរាជរដ្ឋាភិបាលសម្រេចពន្យារពេលអនុវត្តការយកពន្ធលើចំណេញមូលធនទ្រព្យចំនួន ៦ ប្រភេទរហូតដល់ថ្ងៃទី១ ខែមករា ឆ្នាំ២០២៦
-
ព័ត៌មាន5 days agoសម្ដេចធិបតី៖ ក្នុងពេលសង្គ្រាមព្រំដែនកម្ពុជា-ថៃ សិស្សបានរៀនជាលក្ខណៈប្រមូលផ្តុំ នៅសាលារៀន និងនៅជំរំ ខណៈបន្ទាប់ពីសង្គ្រាមស្ងប់ស្ងាត់សាលារៀនមួយចំនួន បានបើកដំណើរការឡើងវិញ
-
ព័ត៌មាន4 days agoសម្តេចរដ្ឋសភាធិបតី ឃួន សុដារី អញ្ជើញដឹកនាំគណៈប្រតិភូរដ្ឋសភានិវត្តន៍មកកាន់មាតុប្រទេសវិញ ក្រោយបញ្ចប់ដំណើរទស្សនកិច្ចនៅប្រទេសហុងគ្រី និងចូលរួមវេទិកាសន្តិភាពប៉ារីស នៅប្រទេសបារំាង
-
ព័ត៌មាន1 week agoសមាគមពលរដ្ឋខ្មែរទាំង៦ នៅប្រទេសអូស្ត្រាលី និងនូវ៉ែលហ្សេឡង់ ចេញញត្តិគាំទ្រ សម្តេចធិបតី សម្រេចបាន កិច្ចព្រមព្រៀងសន្តិភាពកម្ពុជា-ថៃ