រដ្ឋមន្ត្រីក្រសួងអប់រំ៖ ទិវាគ្រូបង្រៀនប្រារព្ធឡើង​ជាការរំឭកគុណគ្រូបង្រៀនគ្រប់ជំនាន់

ឯកឧត្តមបណ្ឌិតសភាចារ្យ ហង់ជួន ណារ៉ុន ឧប​នាយក​រដ្ឋ​មន្ត្រី​ រដ្ឋមន្ត្រីក្រសួងអប់រំ យុវជន និង​កីឡា​មានប្រសាសន៍ថា យើងទាំងអស់គ្នា​ប្រារព្ធ​ទិវា​គ្រូបង្រៀនដែលជាការរំឭក​គុណ​គ្រូ​បង្រៀន​គ្រប់​ជំនាន់ ដែល​បាន​ខិត​ខំ​ប្រឹងប្រែង តស៊ូលះបង់ក្នុងការបង្ហាត់ បង្រៀន និង​ការ​ផ្ទេរ​ចំណេះ​ដឹង​តាម​​គ្រប់​រូប​ភាព​ និង​គ្រប់មធ្យោបាយដល់ក្មួយៗសិស្ស និស្សិត និងយុវជនគ្រប់ៗរូប។

ឯកឧត្ដមបណ្ឌិតសភាចារ្យ មានប្រសាសន៍បែបនេះក្នុងឱកាសដែលឯកឧត្ដម​អញ្ជើញ​ជា​អធិបតី​ក្នុងពិធី​ទិវាគ្រូបង្រៀន ៥ តុលា ២០២៥ ក្រោមប្រធានបទ “គ្រូបង្រៀនជាតួអង្គសំខាន់ នៃ​បរិវត្ត​កម្ម​​បញ្ញា​សិប្បនិម្មិត” ដែល​ប្រារព្ធ​នៅ​វិទ្យាស្ថានជាតិអប់រំ នាព្រឹកថ្ងៃទី៦ ខែតុលា ឆ្នាំ២០២៥។ ពិធីនេះក៏មាន​ការអញ្ជើញចូលរួមពីសំណាក់ លោកស្រី Esther McFarlane ប្រធាន​ផ្នែក​អប់រំ នៃ​អង្គ​ការ​យូណេស្កូ​ប្រចាំ​ប្រទេស​កម្ពុជា ឯកឧត្តម លោកជំទាវ ថ្នាក់​ដឹក​នាំក្រសួងអប់រំ យុវជន និង​កីឡា ឯកឧត្តម លោកជំទាវ មន្ត្រីមកពីអង្គភាពពាក់ព័ន្ធ តំណាង​មន្ទីរអប់រំរាជធានី-ខេត្តទាំង​២៥ នាយក នាយិកា លោកគ្រូ អ្នកគ្រូ ភ្ញៀវកិត្តិយសជាតិ និងអន្តរ​ជាតិ និងគរុនិស្សិត។

ឯកឧត្ដម ឧបនាយករដ្ឋមន្ត្រី បានបន្តថា តាំងពីដើមរៀងមក ការរំឭកគុណគ្រូ និង​ការ​ដឹង​គុណ​គ្រូ​បា​ន​ក្លាយ​ទៅជាចលនាជាតិដ៏ផុសផុលមួយ ត្រូវបានស្តែងឡើង តាមរយៈការជួបជុំសិស្ស ឬ​អតីត​សិស្ស​ជា​មួយគ្រូបង្រៀន ឬគ្រូបង្រៀនចូលនិវត្តន៍ ដើម្បីប្រារព្ធទិវារំឭកគុណគ្រូនៅតាមសាលារៀន ក៏​ដូច​ជាការបង្កើតឱកាសនានា ដើម្បីសួរសុខទុក្ខ និងជួបជុំជាមួយគ្រូបង្រៀនតាមគ្រប់រូបភាព។

ក្នុងឱកាសនេះដែរ​ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និង​វាយ​តម្លៃ​ខ្ពស់​ចំពោះ​ថ្នាក់​ដឹកនាំ និងបុគ្គលិកអប់រំពាក់ព័ន្ធទាំងអស់ ដែលបានខិតខំប្រឹងប្រែង អនុវត្ត​បេសក​កម្ម​របស់​ខ្លួន​ដោយ​ជោគ​ជ័យ​គួរ​ឱ្យក​ត់សម្គាល់ ក្នុងការបិទបញ្ចប់ដំណើរការឆ្នាំសិក្សា ២០២៤-២០២៥ ប្រកបដោយប្រសិទ្ធភាព និងគុណភាព។ ជាក់ស្តែង បេក្ខជននិទ្ទេស A បាន​កើន​ឡើង​រហូត​ដល់ ៣០២០ នាក់ ក្នុងការប្រឡងសញ្ញាបត្រមធ្យមសិក្សាទុតិយភូមិ និងការ​ប្រឡង​សញ្ញា​បត្រ​អប់រំ​បច្ចេកទេស ដែលទើបបញ្ចប់ថ្មីៗនេះ។

ទន្ទឹមនឹងនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរ​គុណ​យ៉ាង​ជ្រាល​ជ្រៅដ​ល់​សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និង​បច្ចុប្បន្ន​ជា​ប្រធាន​ព្រឹទ្ធសភា​ ដែលបានគាំទ្រ និងសម្រេចដំឡើងប្រាក់បៀវត្ស និងលើកកម្ពស់ជីវភាពគ្រូបង្រៀន និង​ថ្លែង​អំណរ​គុណដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជា​ណា​ចក្រ​កម្ពុជា ​ដែលបានបន្តអនុវត្ត និងពង្រឹងគោលនយោបាយនេះយ៉ាងម៉ឺងម៉ាត់ក្នុងការគាំទ្រវិស័យអប់រំ តាម​រយៈការដាក់ចេញនូវកម្មវិធីអាទិភាព និងការវិនិយោគលើមូលធនមនុស្ស ដើម្បីធានាថា​គ្រូ​បង្រៀន​​នៅ​​តែ​ជាតួអង្គសំខាន់ ក្នុងការធ្វើបរិវត្តកម្មឌីជីថល និងAI សម្រាប់អនាគតកម្ពុជា៕