ស.ស.យ.ក ខណ្ឌច្បារអំពៅ បន្តនាំអំណោយ និងថ្នាំការពាររោគសើរស្បែក ជូនដល់​បងប្អូន​ពលរដ្ឋ​នៅតំបន់បឹងព្រលិត ដែលរងផលប៉ះពាល់ដោយទឹកជន់

ជាការបន្តនៅជាមួយសុខទុក្ខរបស់បងប្អូនប្រជាពលរដ្ឋ នៅរសៀលថ្ងៃទី ១២ ខែតុលា ឆ្នាំ២០១៥ លោកចេង មុនីរ៉ា ប្រធានសហភាពសហព័ន្ធយុវជនកម្ពុជាខណ្ឌច្បារអំពៅ និងសហការី សហការជាមួយការិយាល័យសុខាភិបាលខណ្ឌ បានបន្តនាំយកអំណោយ និងថ្នាំការពាររោគសើស្បែក ចែកជូនដល់ប្រជាពលរដ្ឋជាង៣០០គ្រួសារ រស់នៅជុំវិញផ្សារបឹងព្រលិត ក្នុងភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ ដែលរងផលប៉ះពាល់ដោយទឹកជន់ ។

នេះជាអំណោយថ្មីបន្ថែមទៀតហើយ ក្នុងនាមសហភាពសហព័ន្ធយុវជនកម្ពុជា ( សសយក ) បន្ទាប់ពីព្រឹកមិញ លោកចេង មុនីរ៉ា និងមន្ត្រីរាជការ ក្នុងនាមអាជ្ញាធរ នៃរដ្ឋបាលខណ្ឌ ក៏បាននាំយកអំណោយជាស្បៀងអាហារមួយចំនួនចែកជូនដល់បងប្អូនប្រជាពលរដ្ឋម្តងរួចមកហើយដែរ ។

លោកចេង មុនីរ៉ា នៅតែបន្តលើកទឹកចិត្តទៅដល់បងប្អូនប្រជាពលរដ្ឋ សូមបន្តមានការអត់ធ្មត់ក្នុងរយះពេលខ្លីខាងមុខ និងសុំឲ្យបងប្អូនគិតគូរពីសុខភាព និងសុវត្ថិភាពរបស់ខ្លួនជាចម្បង ។ ចំពោះបញ្ហាដែលកំពុងកើតមានបង្កការរំខានដល់ការរស់នៅរបស់បងប្អូន អាជ្ញាធរខណ្ឌមិនបាននៅស្ងៀមឡើយ បាននឹងកំពុងបន្តពន្លឿនការដោះស្រាយហើយ ដើម្បីធ្វើយ៉ាងណាឲ្យស្ថានភាពនៅតំបន់រស់នៅរបស់បងប្អូន ឆាប់វិលទៅរកប្រក្រតីភាពឡើងវិញ ៕ លីហេង