វិស័យអាកាសចរណ៍នៅកម្ពុជាដំណើរការហោះហើរជាធម្មតា បើទោះជាតម្លៃសំបុត្រឡើងថ្លៃបន្តិច

វិស័យអាកាសចរណ៍នៅកម្ពុជា គឺប្រតិបត្តិការហោះហើរប្រចាំថ្ងៃជាធម្មតា បើទោះជាមាន​ក្រុម​ហ៊ុន​អាកាស​ចរណ៍ចំ​នួន១៨ បានប្រកាសដំឡើងថ្លៃសំបុត្រ ក្នុងបរិបទដែលតម្លៃប្រេងឥន្ធនៈសកល កើន​ឡើង ដោយសារសង្គ្រាមនៅតំបន់មជ្ឈិមបូព៌ា ហើយការផ្គត់ផ្គង់​ប្រេង​ឥន្ធនៈ​សម្រាប់​យន្ត​ហោះ​ក្នុង​វិស័យ​នេះ នៅតែបន្តមានជាហូរហែ។ នេះបើតាមអ្នកនាំពាក្យ​រដ្ឋលេខា​ធិការ​ដ្ឋាន​អាកាស​ចរណ៍​ស៊ីវិល។

ឯកឧត្ដម ស៊ីន ចាន់សិរីវុត្ថា រដ្ឋលេខាធិការ និង​ជា​អ្នក​នាំពាក្យ​រដ្ឋលេខា​ធិការដ្ឋា​ន​អាកាស​ចរណ៍​ស៊ីវិល​បានបញ្ជាក់ថា ក្រុមហ៊ុនអាកាសចរណ៍មានចំនួន ១៨ក្រុមហ៊ុន ក្នុងចំណោម ៣៦ក្រុមហ៊ុន ដែល​កំពុងប្រតិបត្តិការដឹកជញ្ជូនអ្នកដំណើរតាមផ្លូវអាកាសចេញ-ចូលព្រះរាជាណាចក្រកម្ពុជា បាន​ដំឡើង​ថ្លៃសំបុត្រក្នុងបរិបទដែលតម្លៃប្រេងឥន្ធនៈកើនឡើង ដោយសារ​សង្គ្រាម​នៅតំបន់​មជ្ឈិម​បូព៌ា​។

ឯកឧត្ដម ពន្យល់ថា តម្លៃសំបុត្រយន្តហោះ​របស់​ក្រុម​ហ៊ុន​អាកាស​ចរណ៍​មាន​ការ​កើន​ឡើង​ដោយ​ក្រុម​ហ៊ុន​អាកាសចរណ៍មួយចំនួនបានបន្ថែមតម្លៃសម្រាប់ប្រេងឥន្ធនៈ (Fuel Surcharge -YQ) លើ​តម្លៃសំបុត្រយន្តហោះមូលដ្ឋាន ដើម្បីស្របតាមការកើនឡើងនៃថ្លៃប្រេងឥន្ទនៈ។ ការដំ​ឡើង​តម្លៃ ​YQ គឺធ្វើ ឡើងតាមដំណាក់ផ្លូវហោះហើរ (អាស្រ័យលើចម្ងាយជិត-ឆ្ងាយ) ជាក់ស្តែង​របស់​ក្រុម​ហ៊ុន​អាកាសចរណ៍។ ការឡើងថ្លៃនេះគឺផ្អែកលើព័ត៌មាន ដែលផ្តល់ដោយ​ក្រុម​ហ៊ុន​អាកាស​ចរណ៍​។

ឯកឧត្ដមបញ្ជាក់ថា ក្រុមហ៊ុនអាកាសចរណ៍ក្នុងស្រុកទាំង៤ គឺAir Cambodia(K6), AirAsia Cambodia (KT), Cambodia Airways (KR) និង Sky Angkor Airlines (ZA) បាន​ដំឡើង​ថ្លៃ​សំបុត្រ​យន្តហោះជាមធ្យម (Airline’s Average) ចំនួន ៥ ដុល្លារអាម៉េរិក ទៅ ៣២,៥ ដុល្លារ​អាម៉េរិក​ និងក្រុមហ៊ុនអាកាសចរណ៍បរទេសបានឡើងថ្លៃ គិតជាមធ្យម (Airline’s Average) ប្រមាណ ២៨ ដុល្លារអាម៉េរិក។

បើយោងតាម របាយការណ៍របស់រដ្ឋលេខាធិការដ្ឋានអាកាសចរណ៍ស៊ីវិល បច្ចុប្បន្ន កម្ពុជា​ប្រតិបត្តិ​ការ​ហោះ​ហើរ​តភ្ជាប់ជាមួយតំបន់មជ្ឈិមបូព៌ាចំនួន ៥២ ជើង/សប្ដាហ៍ (ទ្វេរទិស) ជាមួយ អាកាស​យាន​ដ្ឋានអន្តរជាតិតេជោ និងអាកាសយានដ្ឋានអន្តរជាតិសៀមរាបអង្គរ។ តាមការ​ប៉ាន់​ស្មាន ​អាចមានអ្នកដំណើរ ប្រហែល ១២,៩៦០ នាក់ ក្នុងមួយសប្ដាហ៍ ឬ ប្រហែល ៥១,៨៤០ នាក់ក្នុងមួយខែ បានប្រើប្រាស់ផ្លូវហោះហើរនេះ៕ អត្ថបទ៖ ធូ វិរៈ