ព័ត៌មាន

បណ្ដាទីតាំងសំខាន់ៗសម្រាប់ប្រារព្ធ«នគរសង្ក្រាន្ត» កំពុងមមាញឹកក្នុងការរៀបចំតុបតែងលម្អ

បណ្តាទីតាំងសំខាន់ៗនៅរាជធានីភ្នំពេញ ដែលត្រូវបានកំណត់សម្រាប់រៀបចំនគរសង្ក្រាន្ត បាននិងកំពុងមមាញឹកក្នុងការរៀបចំតុបតែងលម្អ ខណៈបុណ្យចូលឆ្នាំថ្មី នៅសល់តែ១១ថ្ងៃទៀតប៉ុណ្ណោះ។

រមណីយដ្ឋានវប្បធម៌ប្រវត្តិសាស្ត្រវត្តភ្នំ ជាទីតាំងធំមួយ ក្នុងចំណោមទីតាំងមួយចំនួន ដែលត្រូវបានកំណត់យកជាទីកន្លែងរៀបចំព្រឹត្តិការណ៍ “ នគរសង្ក្រាន្ត “ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២៦។ បច្ចុប្បន្ន គេសង្កេតឃើញក្រុមការងាររបស់រដ្ឋបាលរាជធានីភ្នំពេញ សហការជាមួយក្រុមការងារ ស.ស.យ.ក កំពុងមមាញឹកក្នុងការតុបតែងលម្អដំឡើងរោង និងរូបចម្លាក់ធំៗមួយចំនួនជាបណ្តើរ ៗ អមជាមួយការរៀបចំសម្អាតបរិស្ថានអនាម័យសួនច្បារក្នុងបរិវេណទីធ្លារមណីយដ្ឋានវត្តភ្នំ ដើម្បីឱ្យមានសោភ័ណភាព និងរបៀបរៀបរយ។

ពលរដ្ឋ បានលើកឡើងថា កម្មវិធីសង្ក្រាន្តដែលរៀបចំឡើងក្នុងសប្ដាហ៍ក្រោយនេះ ដោយអមជាមួយការតាំងបង្ហាញ និងតាំងលក់ពីទំនិញ និងផលិតខ្មែរក្នុងស្រុក គឺជាការបង្ហាញឲ្យអន្តរជាតិបានឃើញបានស្គាល់កាន់តែច្បាស់ពីកម្ពុជា ហើយវាក៏ជាផ្នែក នៃការជំរុញសេដ្ឋកិច្ចប្រជាជន និងសេដ្ឋកិច្ចក្នុងស្រុកផងដែរ នៅពេលដែលកំណើនទេសចរណ៍មានការកើនឡើង។

គួរបញ្ជាក់ថា ព្រឹត្តិការណ៍សង្ក្រាន្តឆ្នាំថ្មី គ្រោងនឹងធ្វើឡើងរយៈពេល០៦ថ្ងៃ គិតចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ នៅតាមទីតាំងធំៗមួយចំនួន រួមមាន ៖ តំបន់រមណីយដ្ឋានប្រវត្តិសាស្ត្រវត្តភ្នំ , ផ្លូវថ្មើរជើងចតុមុខ (Walk street), សួនវត្តបទុមវតី, ផ្សារទួលទំពូង និងបណ្ដាទីតាំងមួយចំនួនដទៃ ផ្សេងទៀតផងដែរ៕ អត្ថបទ៖ លីហេង