អាស៊ានមានសារសំខាន់សម្រាប់កម្ពុជាក្នុងការស្វែងរកដំណោះស្រាយជម្លោះព្រំដែន​ជា​មួយ​ប្រទេស​​ថៃ

អាស៊ាននៅតែមានសារសំខាន់សម្រាប់ប្រទេសកម្ពុជាក្នុងការស្វែងរកដំណោះស្រាយជម្លោះព្រំដែនជា​មួយប្រទេសថៃ។ នេះបើតាមការយល់ឃើញពីអ្នកជំនាញវិទ្យាសាស្រ្តនយោបាយ។

ក្នុង​កិច្ចសម្ភាសន៍ជាមួយBTV នៅព្រឹកថ្ងៃទី៣០ ខែមេសា នេះ លោក លឹម សុវណ្ណារិទ្ធ អ្នក​ជំនាញ​វិទ្យា​សាស្រ្ត​នយោបាយបានលើកឡើងថា អាស៊ាននៅតែមានសារសំខាន់សម្រាប់ប្រទេសកម្ពុជា ហើយ​ក៏​បានចូលរួមចំណែកក្នុងការស្វែងរកដំណោះស្រាយបញ្ហាជម្លោះព្រំដែន រវាងកម្ពុជា និងថៃ ផងដែរដោយសារតែអាស៊ាន គឺជាយន្តការ​តំបន់​មួយ​ដ៏​លេច​ធ្លោ​នៅ​ក្នុង​ពេល​បច្ចុប្បន្ន​នេះ​បន្ទាប់​ពី​អឺរ៉ុប​។

លោកបានបញ្ជាក់ថា អាស៊ាន គឺជាតំបន់សមាហរកម្មមួយដ៏សំខាន់ ហើយ​ទាក់​ទាញ​នូវ​មហា​អំណាច​សំខាន់​ៗ​របស់ពិភពលោក ជាពិសេសសហរដ្ឋអាមេរិក និងចិន ដែលបាន​ចូល​រួម​ជួយ​ដោះ​ស្រាយ​ជម្លោះ​ព្រំដែន​កម្ពុជា និងថៃផងដែរ។ ផ្ទុយទៅវិញ ប្រសិនបើ​កម្ពុជា​មិន​មែន​ជា​សមាជិក​អាស៊ាន​ទេ ក៏ប្រហែលជាការ​យក​ចិត្ត​ទុក​ដាក់​របស់​មហា​អំណាច​ពិភព​លោក​នៅ​មាន​កម្រិត​មួយ​ទាប​ជាង​បច្ចុប្បន្នដែរ។

គួរបញ្ជាក់ដែរថា ប្រទេសកម្ពុជាបានចូលជាសមាជិកអាស៊ាននៅថ្ងៃទី៣០ ខែមេសា ឆ្នាំ១៩៩៩ ក្នុង​ពេលកិច្ចប្រជុំនៅប្រទេសវៀតណាម។ សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន គឺ​ជា​អង្គការថ្នាក់តំបន់មួយដែលមានសមាជិក១១ប្រទេស។ មូល​ហេតុ​ដែល​ប្រទេស​កម្ពុជា​ចូល​ជា​សមាជិក​អាស៊ាន ដោយមូលហេតុសំខាន់ៗដូចជា៖ គោលការណ៍មិនជ្រៀតជ្រែកកិច្ចការផ្ទៃក្នុង ការ​សម្រេច​ចិត្តតាមបែបកុងសង់ស៊ីស ផលប្រយោជន៍ពីសមាហរណកម្មសេដ្ឋកិច្ច និង​ការ​ពង្រីក​ច្រក​ទ្វារ​ការ​ទូត៕ អត្ថបទ៖ ទូច សោភ័ណ