យុវពុទ្ធិកសមាគមកម្ពុជរដ្ឋ ធ្វើទស្សនកិច្ចសិក្សាលើវិស័យទេសចរណ៍ និងមនុស្សធម៌ ជំរុញសក្តានុពលទេសចរណ៍ស្រុកកំពង់លែង

កំពង់ឆ្នាំង៖ គណៈកម្មការយុវពុទ្ធិកសមាគមកម្ពុជរដ្ឋ នៃពុទ្ធិកសមាគមកម្ពុជរដ្ឋ សហការជាមួយសមាគមបណ្ណាល័យគំនិត នៅថ្ងៃទី១៤ ខែមិថុនា ឆ្នាំ២០២៦ បានធ្វើទស្សនកិច្ចសិក្សាលើវិស័យទេសចរណ៍ និងមនុស្សធម៌ ទៅកាន់ដែនដីអាណាចក្រចេនឡា ស្ថិតក្នុងស្រុកកំពង់លែង ខេត្តកំពង់ឆ្នាំង ដោយមានការចូលរួមពីយុវជន ព្រះសង្ឃ និងសមាជិកសមាគមជាច្រើនរូប។

លោក កែវ ពិសិដ្ឋ សមាជិកគណ:កម្មាការយុវពុទ្ធិកសមាគមកម្ពុជរដ្ឋ បានថ្លែងថា៖ កម្មវិធីនេះត្រូវបានរៀបចំឡើងក្នុងគោលបំណងជំរុញឱ្យដែនដីអាណាចក្រចេនឡា និងតំបន់ទេសចរណ៍ភ្នំនាងកង្រី កាន់តែមានភាពល្បីល្បាញ និងត្រូវបានសាធារណជនស្គាល់កាន់តែទូលំទូលាយ ព្រមទាំងរួមចំណែកលើកស្ទួយវិស័យទេស​ចរណ៍ វប្បធម៌ និងប្រវត្តិសាស្ត្រនៅក្នុងស្រុកកំពង់លែង។ ក្រៅពីសកម្មភាពមនុស្សធម៌ កម្មវិធីនេះក៏បានផ្តោតលើការអប់រំយុវជនតាមគោលការណ៍ព្រះពុទ្ធសាសនា ដោយជំរុញឱ្យយុវជនស្គាល់ពីគុណតម្លៃសីលធម៌ ប្រពៃណី និងវប្បធម៌ជាតិ។

ក្រុមការងារក៏បាននាំយកសម្ភារៈសិក្សា និងអំណោយមនុស្សធម៌ ចែកជូនដល់សិស្សានុសិស្ស និងគ្រូបង្រៀនចំនួន៣៤២ នាក់ ដើម្បីជួយលើកកម្ពស់វិស័យអប់រំនៅតាមសហគមន៍មូលដ្ឋាន និងបង្កើនទឹកចិត្តដល់អ្នកអប់រំ។ យុវជនដែលចូលរួម បានធ្វើទស្សនកិច្ចនៅស្ថានីយ៍បុរេប្រវត្តិសាស្ត្រសំរោងសែន ដែលត្រូវបានចាត់ទុកជាតំបន់ប្រវត្តិសាស្ត្រសំខាន់មួយ បង្ហាញពីការរស់នៅរបស់ដូនតាខ្មែរនាសម័យបុរេប្រវត្តិ។ ក្រុមការងារក៏បានទស្សនាតំបន់ទេសចរណ៍ធម្មជាតិទឹកជ្រោះអូដារ ប្រាសាទបុរាណចំនួន៦ និងតំបន់ច្រកបាក់ ដែលជាទីតាំងមានជាប់ទាក់ទងនឹងរឿងរ៉ាវប្រវត្តិសាស្ត្រ និងវីរភាពរបស់បុព្វបុរសខ្មែរ។

តាមរយៈកម្មវិធីនេះ អ្នករៀបចំសង្ឃឹមថា នឹងរួមចំណែកផ្សព្វផ្សាយសក្តានុពលទេសចរណ៍ ប្រវត្តិសាស្ត្រ និងវប្បធម៌ដ៏សម្បូរបែបរបស់ស្រុកកំពង់លែង ឱ្យកាន់តែមានការចាប់អារម្មណ៍ពីភ្ញៀវទេសចរជាតិ និងអន្តរជាតិបន្ថែមទៀត៕  ដោយ ​៖ កាំង ហុងវាស្នា