សម្ដេចធិបតី ហ៊ុន ម៉ាណែត សម្រេច​ដំឡើង​ភាគ​លាភ​សម្រាប់​ផ្តល់​ជូន​​សហគមន៍​អ្នក​រត់​កាណូត​ទេសចរណ៍​ចុងឃ្នៀស ដើម្បីជួយសម្រាលបន្ទុក និងបង្កើនចំណូល

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានត សម្រេច​ដំឡើង​​ភាគ​លាភ​សម្រាប់​ផ្តល់​ជូន​​សហគមន៍​អ្នក​រត់​កាណូត​ទេសចរណ៍​ចុងឃ្នៀស ដើម្បី​ជួយ​សម្រាល​​បន្ទុក និងបង្កើនចំណូល​ដល់​ប្រជាពលរដ្ឋ​ក្នុងសហគមន៍​ ហើយនៅ​រក្សា​ទុក​កំណើននេះ​នៅ​ដដែល​ទោះ​​ជា​​ទៅ​ថ្ងៃ​មុខ​តម្លៃ​ប្រេង​ឥន្ធនៈ​ចុះវិញក៏ដោយ។

តាមរយៈបណ្ដាញសង្គម​នៅព្រឹកថ្ងៃទី២១ ខែមិថុនា ឆ្នាំ២០២៦នេះ សម្ដេចធិបតី ហ៊ុន ម៉ាណែត​បានឲ្យដឹងថា​ ក្រោយពីត្រឡប់មកពីប្រជុំនៅសហព័ន្ធរុស្សី កាលពីថ្ងៃទី២០មិថុនា សម្ដេច​បាន​​ឆ្លៀ​ត​ឱកាស​នាំ​គ្រួសារ​ទៅ​ជិះទូ​កទៅទន្លេសាប នៅចុងឃ្នៀស ខេត្តសៀមរាប តាម​ការ​សន្យា​ជា​មួយ​កូន​ៗ។ ក្នុង​ដំណើរ​កម្សាន្ត​នោះ សម្ដេច​​ក៏​បាន​ជួប​ជជែក​លេង​ជាមួយ​បង​ប្អូន​តំណាង​សមាគមន៍​អ្នក​​​រត់​កាណូត​ទេសចរ​ណ៍ចុងឃ្នៀស ដោយបានស្ដាប់​អំពី​ស្ថាន​ភាព​ជីវ​ភាព​រស់​នៅរ​បស់​ប្រជា​ពលរដ្ឋ​​​​ក្នុ​ង​សហគមន៍​ ក៏ដូចជាសំណូមពររបស់ពួកគាត់ ជាពិសេស​ពាក់ព័ន្ធ​ជាមួយ​នឹង​ការ​បែង​ចែក​​ភាគ​លាភ​នៃចំ​ណូលពីសេវាទេសចរណ៍រវាងគ្រឹះស្ថានអង្គរ និងសហគមន៍។»

សម្ដេចធិបតីបាបបញ្ជាក់ថា «ស្ថិតនៅក្នុង​ដំណាក់​កាល​ដែល​ប្រទេស​យើង​កំពុង​រង​សម្ពាធ​ដោយ​សង្គ្រាម​នៅ​មជ្ឈិមបូព៌ាដែលធ្វើឱ្យប្រេងឥន្ធនៈឡើងថ្លៃ រាជរដ្ឋាភិបាល​បាន​សម្រេច​ឱ្យ​ដំឡើង​ភាគ​លាភ​សម្រាប់​ផ្តល់ជូនដល់សហគមន៍អ្នករត់កាណូតទេសចរណ៍ចុងឃ្នៀស ដើម្បី​ជួយ​សម្រាល​បន្ទុក​ដល់​ប្រជាពលរដ្ឋក្នុងសហគមន៍។»

សម្ដេចធិបតី ហ៊ុន ម៉ាណែត​បានបន្តថា ​ឆ្លើយតបទៅនឹងសំណូមពររបស់តំណាងសហគមន៍ និង​ក្រោយ​ពី​​បាន​ពិភាក្សា​ជាមួយ​ឯក​ឧត្តមអគ្គនាយកនៃគ្រឹះស្ថានអង្គរ សម្ដេច​បា​ន​សម្រេច​ឯក​ភាព​ជា​គោល​ការណ៍​ឱ្យរក្សាទុកកំណើនភាគលាភនៃចំណូលពីសេវាទេសចរណ៍នៅដដែលសម្រាប់ ជូន​សហគមន៍ ទោះជាទៅថ្ងៃមុខតម្លៃប្រេងឥន្ធនៈចុះវិញក៏ដោយ ដើម្បីបង្កើនចំណូល​ជូន​ប្រជាពលរដ្ឋ​នៅ​ក្នុងសហគមន៍។

ជាមួយគ្នានេះដែរសម្ដេចធិបតី នាយករដ្ឋមន្ត្រី​ បានអំពាវនាវដ៏ដូចជាស្នើសុំ​សូម​ឲ្យ​សហគមន៍​បន្ត​ការ​សាមគ្គី​រួប​រួម​គ្នា ក្នុងការរៀបចំ និងផ្ដល់សេវាល្អ ប្រកបដោយតម្លាភាពជូនភ្ញៀវទេសចរ ដើម្បី​ធានា​បាន​នូវទំនុកចិត្ត និងទាក់ទាញ​ភ្ញៀវ​ទេសចរជាតិ និង​អន្តរជាតិ​បន្ថែម​ទៀត​មក​ទស្សនា​នៅ​ទី​នោះ​។