អភិបាលខេត្តកំពង់ឆ្នាំង ព្រមានដកតំណែងមន្ត្រីរូបណាពាក់ព័ន្ធនឹងបទល្មើសនេសាទ

ឯកឩត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងព្រមាន ដក​តំណែង​មន្ត្រី​រូបណា​ដែល​ការ​ពារ និង​ចូល​រួមជាមួយជនប្រព្រឹត្តបទល្មើសនេសាទ។ “វាហួស​សម័យ​ហើយ​ដែល​នៅ​មាន​សកម្មភាព​ប្រព្រឹត្ត​បទ​ល្មើសនេសាទ ជាពិសេស សកម្មភាពឆក់ក្តៅ ឆក់ត្រជាក់នេះ។ បើសិន​ជា​មាន​មន្ត្រី​ណា​កុំ​ថាឡើយមេបុស្តិ៍ មេឃុំ ឬចៅហ្វាយស្រុករូបណា ដែលការពារបទ​ល្មើស​នេសាទ និង​ត្រូវ​ប្រឈម​មុខនឹងការដកតំណែងចោល ហើយបន្តនីតិវិធីផ្លូវច្បាប់ថែមទៀត។”

ឯកឧត្តម​បានថ្លែងដូចនេះនៅថ្ងៃទី១៩ ខែមិថុនា ឆ្នាំ២០២៦ នៅក្នុងវេទិកាពិគ្រោះយោបល់ ស្តីពីភាពជាដៃគូរវាងរដ្ឋបាលខេត្តជាមួយអង្គការ សមាគម និងសហគមន៍នានា ក្នុង​ខេត្ត​កំពង់ឆ្នាំង។

អភិបាលខេត្តកំពង់ឆ្នាំងបន្ថែមថា សហគមន៍​នេសាទ​ត្រូវ​បង្កើន​កិច្ច​ការ​ពារ​កុំ​ឲ្យកើ​ត​មាន​បទ​ល្មើស​ឆក់​ក្តៅ ឆក់ត្រជាក់ នៅក្នុងមូលដ្ឋាន ។ ព្រោះ​តាម​ការ​ណែនាំ​របស់​ប្រមុខ​រាជ​រដ្ឋាភិបាល​មក​ដល់​ម៉ោង​នេះ​គឺមិនឱ្យមានបទល្មើសនេសាទទៀតទេ គឺត្រូវបង្កើនការការពារធនធានធម្មជាតិ។

ប្រជាពលរដ្ឋត្រូវដូរទម្លាប់ពីការឆក់ត្រីមកជាការចិញ្ចឹមត្រីវិញ យើង​នាំ​គ្នា​ប្រមូល​ផ្ដុំ​បច្ចេក​ទេស​ទាំង​អស់​ បង្កើតជាសហគមន៍រួមគ្នារកវិធីសាស្ត្រ កែច្នៃការដាំដុះ ផលិតចំណីអាហារដើម្បីចិញ្ចឹមត្រី។ ជា​ពិសេសស្រុកចំនួន៤ នៅតាមដងទន្លេ ត្រូវយកចិត្តទុកដាក់ ជំរុញ​អោយ​បាន​ខ្ពស់​ទៅ​លើ​វិស័យ​វារី​វប្ប​កម្ម , វិស័យឧស្សាហកម្ម , ការដាំស្រូវ , តំបន់សេដ្ឋកិច្ចពិសេស និងវិស័យទេសចរណ៍៕