គណៈវិស្វករកម្ពុជា បើកការវាយតម្លៃសម្បទាវិជ្ជាជីវៈវិស្វកម្ម ដល់បេក្ខជនវិស្វករអាជីពជាតិលើកទី៣៥

ភ្នំពេញ៖ គណៈវិស្វករកម្ពុជា បានបើកការវាយតម្លៃសម្បទាវិជ្ជាជីវៈវិស្វកម្ម ទៅដល់បេក្ខជនវិស្វករអាជីពជាតិ លើកទី៣៥ ចំនួន៨២នាក់ ទៅលើ៥ជំនាញ ដែលមានដូចជា វិស័យសំណង់ស៊ីវិល, ធនធានទឹក និងហេដ្ឋារចនាស័ម្ពន្ធជនបទ, អគ្គិសនី និងអេឡិចត្រូនិក, ឧស្សាហកម្ម និងមេកានិក និងទេពកោសល្យជនបទ ។

ក្នុងពិធីបើកការវាយតម្លៃសម្បទាវិជ្ជាជីវៈវិស្វកម្ម ដល់បេក្ខជនវិស្វករអាជីពជាតិ លើកទី៣៥ កាលពីថ្ងៃទី២៣ ខែមិថុនា ឆ្នាំ២០២៦ ឯកឧត្តម សុខុម រិទ្ធីវុធ អគ្គលេខាធិការគណៈវិស្វករកម្ពុជា មានប្រសាសន៍ថា វិស្វករជាធនធានបញ្ញវ័ន្តវិស្វកម្មជាតិ និងជាកម្លាំងចលករមិនអាចខ្វះបាន ក្នុងការរួមចំណែកអភិវឌ្ឍប្រទេស ប្រកបដោយចីរភាព ដែលតម្រូវឱ្យវិស្វករមានការសិក្សាស្វែងយល់ និងតាមឱ្យទាន់នូវការវិវត្តន៍បច្ចេកវិទ្យា នាពេលបច្ចុប្បន្ន និងអនាគត ហើយធនធានបញ្ញវន្ត និងមានក្រមសីលធម៌វិជ្ជាជីវៈ គឺជាសក្តានុពលមួយផ្នែកដ៏មានប្រសិទ្ធភាពក្នុងការអភិវឌ្ឍសង្គម-សេដ្ឋកិច្ច តាមរយៈលទ្ធផលការងារល្អ និងការទទួលខុសត្រូវ ចំពោះស្ថាប័នសាធារណៈ ក្រុមហ៊ុនឯកជន ដែលវិស្វករជាតិ មានកម្រិតវិជ្ជាជីវៈស្តង់ដារ ព្រមទាំងសមត្ថភាពជំនាញ កំពុងសកម្មវិនិយោគលើវិស័យជាច្រើនក្នុងសង្គមកម្ពុជា។

ឯកឧត្តម បន្តថា បច្ចុប្បន្នគណៈវិស្វករកម្ពុជា ជាសមាជិកស្ថាប័នសហព័ន្ធវិស្វកម្មអាស៊ាន និងគណៈកម្មាធិការសម្របីសម្គាល់វិស្វករអាជីពឆ្នើមអាស៊ាន ដែលផ្ដល់លទ្ឋភាព តាមរយៈការទទួលបាននូវ គោរមងារជាវិស្វកអាស៊ាន និងវិស្វករអាជីពីឆ្នើមអាស៊ាន ។

ឯកឧត្តម សុខុម រិទ្ធីវុធ បានបន្ថែមថា ដើម្បីទទួលបាននូវគោរមងារឱ្យវិស្វករអាជីពជាតិ មានឱកាសធ្វើចល័តភាពក្នុងតំបន់ទាំងនោះ តម្រូវឱ្យវិស្វករជាតិទទួលបានជោគជ័យ លើការវាយតម្លៃវិស្វករអាជីពជាតិ និងបំពេញលក្ខខណ្ឌតម្រូវរបស់ស្ថាប័ននីមួយៗ ដូចខាងក្រោម គឺសម្រាប់ស្ថាប័នសហព័ន្ធវិស្វកម្មអាស៊ាន ជាវិស្វករអាជីពជាតិ និងមានបទពិសោធន៍វិជ្ជាជីវៈវិស្វកម្ម៧ឆ្នាំ ក្រោយបញ្ចប់ បរិញ្ញាបត្រវិស្វកម្ម, មានចំណេះដឹងភាសាអង់គ្លេស នឹងចេះប្រើប្រាស់កុំព្យូទ័រ សម្រាប់គណៈកម្មាធិការសម្របសម្រួលវិស្វករអាជីពឆ្នើមអាស៊ាន ជាវិស្វករអាជីពជាតិ ៥ឆ្នាំ, មានចំណេះដឹងភាសាអង់គ្លេស និងចេះប្រើប្រាស់កុំព្យូទ័រ ។

គួរបញ្ជាក់ថា គិតត្រឹមត្រីមាសទី១ ឆ្នាំ២០២៦ គណៈវិស្វករកម្ពុជា បានសហការជាមួយក្រសួង ស្ថាប័ន ជំនាញពាក់ព័ន្ធ វាយតម្លៃគុណវុឌ្ឃ និងបទពិសោធន៍វិជ្ជាជីវៈ វិស្វករចុះបញ្ជីដំបូង ដែលបានបំពេញ តាមលក្ខខណ្ឌតម្រូវផ្តល់គោរមងារជា ទី១. វិស្វករអាជីពជាតិបានចំនួន ១ ២០៧នាក់ ស្រី១៦, ទី២. វិស្វករអាស៊ាន បានចំនួន ៦៩០នាក់ ស្រី៦នាក់ និងទី៣. វិស្វករអាជីពឆ្នើមអាស៊ាន បានចំនួន ១៤១នាក់ ស្រី១នាក់ ក្នុងចរន្តភាវូបនីយកម្មក្នុងតំបន់ និងសកលលោក និងក្នុងយុគ្គសម័យបរិវត្តកម្មឌីជីថល វិស្វករគ្រប់រូប ត្រូវអភិវឌ្ឍន៍សមត្ថភាពប្រតិបត្តិជំនាញវិជ្ជាជីវៈជានិរន្ត ដើម្បីស្វែងយល់ និងតាមឱ្យទាន់នូវការវិវត្តន៍បច្ចេកវិទ្យាមានក្រមសីលធម៌វិជ្ជាជីវៈល្អ និងការទទួលខុសត្រូវខ្ពស់ បើពុំដូច្នោះទេ នឹងមិនអាចប្រកួតប្រជែងទីផ្សារសេវាវិស្វកម្មសេរី ជាមួយវិស្វករមកពីក្រៅប្រទេសបានឡើយ ហើយប្រឈមនឹងការបាត់បង់ឱកាសប្រកួតប្រជែងជាមិនខាន ៕ អត្ថបទ បាន សុខរិទ្ធិ