ក្រុមអ្នកសង្កេតការណ៍អាស៊ាន បន្ត​ចុះសង្កេតការណ៍ ផ្ទៀងផ្ទាត់ និង​រាយការណ៍​អំពី​ស្ថានភាព​ព្រំដែន​នៅវត្តប្រាសាទតាមាន់សែនជ័យ ដើម្បីពិនិត្យលើការគោរព និង​អនុវត្ត​វិធាន​ការ​ទាំងឡាយ ក្រោយ​បទ​ឈប់​បាញ់​ចូលជាធរមាន

ក្រុមអ្នកសង្កេតការណ៍អាស៊ាន (AOT) ដឹក​នាំ​ដោយ​ប្រធានបេ​សក​កម្ម​ក្រុម​អ្នក​សង្កេត​ការណ៍​អាស៊ាន ​(HOM AOT) ហ្វីលីពីន បាន​បន្ត​ចុះសង្កេតការណ៍ ផ្ទៀងផ្ទាត់ និង​រាយការណ៍​អំពី​ស្ថាន​ភាព​​ព្រំដែន​នៅវត្តប្រាសាទតាមាន់សែនជ័យ ដើម្បីពិនិត្យលើការគោរព និង​អនុវត្ត​វិធាន​ការ​ ក្រោយ​​បទ​​ឈប់​បាញ់​ចូលជាធរមាន។ នេះបើយោងតាម​សេចក្ដីប្រកាសព័ត៌មាន​របស់​អ្នក​នាំ​ពាក្យ​ក្រសួង​ការពារជាតិកម្ពុជា។

​អ្នក​នាំ​ពាក្យ​ក្រសួង​ការពារជាតិកម្ពុជាបានឲ្យដឹងថា នៅ​​ថ្ងៃព្រហស្បតិ៍ ទី២៥ ខែមិថុនា ឆ្នាំ​២០២៦ វេលាម៉ោង ៩:៣៥នាទីព្រឹក ក្រុមអ្នកសម្របសម្រួល (CLG) នៃព្រះ​រា​ជា​ណា​ចក្រ​កម្ពុជា ​បានសម្របសម្រួលជូនក្រុមអ្នកសង្កេតការណ៍អាស៊ាន (AOT) ដឹកនាំដោយ​ប្រធាន​បេសក​កម្ម​ក្រុមអ្នកសង្កេតការណ៍អាស៊ាន (HOM AOT) ហ្វីលីពីន ដើម្បីចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែននៅវត្តប្រាសាទតាមាន់សែនជ័យ ភូមិតា​មាន់​សែន​ជ័យ ឃុំគោកមន ស្រុកបន្ទាយអំពិល ខេត្តឧត្តរមានជ័យ ដើម្បីធ្វើការពិនិត្យលើការគោរព និង​អនុវត្ត​វិធានការទាំងអស់ក្នុងសេចក្តីប្រកាសរួម ក្រោយបទឈប់បាញ់ចូលជាធរមាន។

ទីតាំងទាំងនេះសុទ្ធសឹងតែជាហេដ្ឋារចនាសម្ព័ន្ធស៊ីវិលដូចជា សាលារៀន មន្ទីរពេទ្យ វត្តអារាម និង​ផ្ទះ​សម្បែងរបស់ប្រជាជនស្លូតត្រង់កម្ពុជា ដែលត្រូវបានខូចខាតខ្ទេចខ្ទាំយ៉ាងដំណំ មិនអាច​រស់​នៅ ​និងប្រើប្រាស់បាន ដោយសារ​ការ​វាយ​ប្រហារ​ប្រដាប់​អាវុធ​ជា​បន្ត​បន្ទាប់​ដោយ​មិន​រើស​គោល​ដៅ​របស់កងកម្លាំងយោធាថៃកាលពីឆ្នាំ២០២៥កន្លងទៅ។

អ្នកនាំពាក្សបានបញ្ជាក់ជាថ្មីថា រាជរដ្ឋាភិបាល និង​ក្រសួង​ការ​ពារជាតិ​កម្ពុជា​បន្ត​អំពាវ​នាវ​យ៉ាង​ម៉ឺង​ម៉ាត់​នូវ​ភាពចាំបាច់ក្នុងការអនុវត្តឱ្យបានពេញលេញ ខ្ជាប់ខ្ជួន និងជាបន្ទាន់នូវ​សេចក្តី​ប្រកាស​រួម​នៃ​កិច្ច​ប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែ​ធ្នូ ឆ្នាំ២០២៥, សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ថ្ងៃទី២៦ ខែ​តុលា ​ឆ្នាំ២០២៥ និងកិច្ចព្រមព្រៀងពាក់ព័ន្ធដែលមានស្រាប់ដ៏ទៃទៀត ដើម្បី​ឆ្ពោះ​ទៅ​ការ​ធ្វើ​ឱ្យ​ប្រសើរ​ឡើង​វិញឆាប់រហ័ស ការវិលត្រឡប់ទៅរកប្រក្រតីភាព និងការសម្រេចបាននូវសន្តិភាព និង​ស្ថិរ​ភាព​យូរអង្វែងរវាងប្រទេសទាំងពីរ៕