រុស្ស៊ី-កម្ពុជា បន្តទំនាក់ទំនងដ៏រឹងមាំលើវិស័យអប់រំ វប្បធម៌ កសិកម្ម ថាមពល ការពារជាតិ និងពាណិជ្ជកម្ម

ភ្នំពេញ៖ ឯកអគ្គរដ្ឋទូត​រុស្ស៊ី​ប្រចាំ​កម្ពុជា​ លោក​ អាណាតូលី បូរ៉ូវីក បាន​លើកឡើងថា រុស្ស៊ី-កម្ពុជា នៅតែបន្តរក្សាទំនាក់ទំនងដ៏ជិតស្និទ្ធលើការបណ្តុះបណ្តាលធនធានមនុស្សលើវិស័យការពារជាតិ​, ការផ្តល់ជំនួយ និងបច្ចេកទេសអភិរក្សបេតិកភណ្ឌវប្បធម៌ និង​ការ​អភិវឌ្ឍន៍​សេដ្ឋកិច្ចតាមរយៈការដោះដូរពាណិជ្ជកម្ម និងវិនិយោគ លើវិស័យកសិកម្ម និងថាមពល​ ស្របពេល រុស្ស៊ី បានប្រារព្វខួប ៧០​ឆ្នាំ​នៃ​ទំនាក់ទំនង​ការ​ទូត​រវាង​កម្ពុជា​និង​រុស្ស៊ីកាលពី​​ថ្ងៃ​ទី​១១ ខែ​មិថុនា ឆ្នាំ​២០២៦​។

លោក​ អាណាតូលី បូរ៉ូវីក ថ្លែងដូចនេះ ធ្វើឡើងក្នុងសិន្នសិទសារព័ត៌មានរបស់ឯកអគ្គរដ្ឋទូតរុស្ស៊ីប្រចាំនៅកម្ពុជា ស្តីពី លទ្ធផលគោលនយោបាយការបរទេសរុស្ស៊ី នៅព្រឹកថ្ងៃទី ២៥ ខែមិថុនា ឆ្នាំ ២០២៦ នៅស្ថានទូតរុស្ស៊ីប្រចាំនៅកម្ពុជា​។​ លោកបញ្ជាក់ទៀតថា រុស្ស៊ីបានបញ្ជាក់ពីការប្តេជ្ញាចិត្តក្នុងការពង្រីកទំនាក់ទំនងទ្វេភាគីជាមួយកម្ពុជា លើគ្រប់វិស័យ​។ ជាក់ស្តែង រុស្ស៊ីបានត្រៀមខ្លួនរួចជាស្រេច​ក្នុងការពិភាក្សាឱ្យបានលម្អិតអំពីការផ្គត់ផ្គង់ ជី រ៉ែ ផលិតផលការពាររុក្ខជាតិ ថ្នាំពេទ្យសត្វ និងវ៉ាក់សាំងការពារសត្វ ជាមួយកម្ពុជា នាពេលខាងមុខ។

លោកបន្តទៀតថា ការបណ្តុះបណ្តាលធនធានមនុស្ស​តែងតែមានតួនាទីពិសេសក្នុងទំនាក់ទំនងទ្វេភាគីរវាងប្រទេសទាំងពីរ​។ ក្នុងរយៈពេលជាង ៧ ទសវត្សរ៍ កន្លងមក ពលរដ្ឋកម្ពុជាមានចំនួនជាង ៨០០០ នាក់ ត្រូវបានបញ្ចប់ការសិក្សា​នៅប្រទេសរុស្ស៊ី ដែលពួកគេបានបន្តរួមចំណែកយ៉ាងសំខាន់​ប្រកបដោយផ្លែផ្កាក្នុងការអភិវឌ្ឍន៍នៅកម្ពុជា។ បច្ចុប្បន្ននេះ មាននិស្សិតកម្ពុជាប្រមាណ ១៦០នាក់ កំពុងសិក្សានៅសាកលវិទ្យាល័យរុស្ស៊ី និងអាហារូបករណ៍ចំនួន ៦៣ បានផ្តល់ជូនដល់ប្រទេសកម្ពុជាសម្រាប់ឆ្នាំសិក្សាបច្ចុប្បន្ន។

ចំពោះវិស័យការពារជាតិ លោកបញ្ជក់ថា រុស្ស៊ី តែងតែចាត់ទុកកម្ពុជាជាដៃគូរមួយ​ដ៏សំខាន់ក្នុងវិស័យការពារជាតិ តាមរយៈការផ្តល់ការបណ្តុះបណ្តាលដល់នាយទាហានកម្ពុជា ដើម្បីពង្រឹងសមត្ថភាពយោធា ហើយ វិស័យថាមពលវិញ រុស្ស៊ីក៏បានត្រៀមរួចរាល់សម្រាប់ផ្តល់ជូនកម្ពុជាតាមតម្រូវការ​ ប្រសិនបើមានការស្នើសុំពីភាគីកម្ពុជា​។​

ពាក់ព័ន្ធនឹងបញ្ហាព្រំដែនកម្ពុជា-ថៃ វិញ លោកឯកអគ្គរដ្ឋទូត បានបញ្ជាក់ថា រុស្ស៊ីកំពុងតាមដានស្ថានភាព យ៉ាងយកចិត្តទុកដាក់ ដោយរុស្ស៊ីជឿជាក់ថា ការសម្រេចបាននូវ​សន្តិភាពរយៈពេលវែង​នឹងអាស្រ័យទៅលើការស្តារឡើងវិញនូវទំនុកចិត្ត​រវាងភាគីកម្ពុជា និងថៃ។ ជាមួយគ្នានេះ បញ្ហាព្រំដែន គឺមិនប៉ះពាល់ដល់បរិយាកាសវិនិយោគរបស់រុស្ស៊ីនៅកម្ពុជានោះទេ ដោយប្រទេសរុស្ស៊ី បន្តយកចិត្តទុកដាក់លើការអភិវឌ្ឍន៍ពាណិជ្ជកម្ម និងសេដ្ឋកិច្ច ជាមួយកម្ពុជាក្នុងរយៈពេលវែង​៕អត្ថបទ៖ ធូ វិរៈ