ក្រសួងផែនការ សាងសង់អគារវិទ្យាស្ថានជាតិស្ថិតិថ្មី ដែល​ជា​ការ​វិនិយោគ​លើ​អនាគត​ប្រព័ន្ធ​ស្ថិតិ​ជាតិ

ភ្នំពេញ៖ ក្រសួងផែនការ នៅថ្ងៃនេះ បានចាប់ផ្ដើមបើកការដ្ឋានសាងសង់ អគារ​វិទ្យាស្ថាន​ជាតិ​ស្ថិតិ​ថ្មី ដែលមានកម្ពស់ ៨ជាន់។ សម្រាប់ការចាប់ផ្ដើមសាងសង់នៅព្រឹកថ្ងៃទី ២៩ ខែមិថុនា នេះ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ លើកឡើងថា នេះ​ជា​ការ​វិនិយោគ​សម្រាប់​អនាគត​លើ​ប្រព័ន្ធ​ស្ថិតិជាតិរបស់កម្ពុជា។

ឯកឧត្តម ប៊ុន ត្រឈៃ រដ្ឋមន្ត្រីក្រសួងផែនការ បានលើកឡើងថា វិទ្យាស្ថាន​ជាតិ​ស្ថិតិ​ត្រូវ​ការ​ហេដ្ឋា​រចនា​សម្ព័ន្ធ​ទំនើប ដែលអាចគាំទ្រដល់ការផ្ទុក និងគ្រប់គ្រង ទិន្នន័យជាតិ ការធានា​សុវត្ថិភា​ព​ទិន្នន័យ ​និងការផ្តល់សេវាទិន្នន័យប្រកបដោយប្រសិទ្ធភាព។ ក្នុងន័យនេះ ការសាង​សង់​អគារ​ថ្មី​របស់​វិទ្យាស្ថាន​ជាតិស្ថិតិ គឺជាការវិនិយោគជាយុទ្ធសាស្ត្រសម្រាប់អនាគតនៃប្រព័ន្ធស្ថិតិជាតិ របស់​ព្រះ​រា​ជា​ណាចក្រកម្ពុជា និងជាការ​ឆ្លើយ​តប​ចំពោះ​តម្រូវ​ការ​អភិវឌ្ឍ​ស្ថាប័ន​ក្នុង​យុគ​សម័យ​ឌីជីថល​។

ឯកឧត្តម លើកឡើងបន្ថែមថា កន្លងមកវិទ្យាស្ថានជាតិស្ថិតិ សម្រេចបាន​សមិទ្ធ​ផល​សំខាន់​ៗ​ជា​ច្រើន ​ដែលបានចូលរួមចំណែកយ៉ាងសកម្ម ក្នុងការអភិវឌ្ឍសេដ្ឋកិច្ច និងសង្គមរបស់កម្ពុជា រួ​ម​មាន​ជំរឿន និងអង្កេតជាតិធំៗជាច្រើន ដូចជា៖ ជំរឿន ប្រជាជនទូទៅ ជំរឿនកសិកម្ម ជំរឿន​សេដ្ឋ​កិច្ច អង្កេតសង្គម សេដ្ឋកិច្ចកម្ពុជា អង្កេតកម្លាំងពលកម្មកម្ពុជា អង្កេត សុខភាពនិងប្រជាសាស្ត្រ សន្ទស្សន៍​ថ្លៃទំនិញប្រើប្រាស់ អត្រាអតិផរណា ស្ថិតិគណនេយ្យជាតិ ថ្នាលប្រព័ន្ធ គ្រប់គ្រង​ទិន្នន័យ​មូល​ដ្ឋានឃុំ-សង្កាត់តាមអនឡាញ (CDB Online) ការរៀបចំកម្មវិធី CAMSTAT តភ្ជាប់​ជាមួយ​ ថ្នាលកម្មវិធីចែករំលែកទិន្នន័យ CamDX ការរៀបចំប្រមូលទិន្នន័យស្ថិតិពីក្រសួង ស្ថាប័ន និង​អង្គភាពស្ថិតិ ថ្នាក់ក្រោមជាតិ ការធ្វើបច្ចុប្បន្នភាពគេហទំព័រ និងទិន្នន័យ ព័ត៌មាន​របស់​វិទ្យា​ស្ថាន​ជាតិ​ស្ថិតិ ជាពិសេសបាន ធ្វើការរៀបចំលិខិតបទដ្ឋានគតិយុត្ត សម្រាប់ការ​អភិវឌ្ឍ​ស្ថាប័ន​នៃ​វិទ្យាស្ថាន​ជាតិស្ថិតិ និងប្រព័ន្ធស្ថិតិជាតិ សម្រាប់រយៈពេលមធ្យម និងរយៈពេលវែង រួមមាន៖ ការ​រៀប​ចំ​សេចក្តីព្រាងគោលនយោបាយស្ថិតិផ្លូវការ ឆ្នាំ២០២៦-២០៣៥ យុទ្ធសាស្ត្រ​ជាតិ​សម្រាប់​អភិវឌ្ឍន៍​ស្ថិតិ ផែនការអភិវឌ្ឍន៍ស្ថាប័នឆ្នាំ២០២៦-២០២៨ របស់វិទ្យាស្ថានជាតិស្ថិតិ។

លើសពីនេះ វិទ្យាស្ថានជាតិស្ថិតិបានបន្តពង្រឹងគុណភាពស្ថិតិ និងស្តង់ដាអន្តរជាតិ ដូចជាប្រព័ន្ធ គណនេយ្យជាតិ ចំណាត់ថ្នាក់សកម្មភាពសេដ្ឋកិច្ច ចំណាត់ថ្នាក់ទំនិញ និងសេវាកម្ម និង​គោល​ការណ៍​គ្រឹះនៃ​ស្ថិតិផ្លូវការរបស់អង្គការសហប្រជាជាតិ ដើម្បីធ្វើឱ្យទិន្នន័យស្ថិតិរបស់ កម្ពុជាកាន់​តែ​មាន​គុណភាព ភាពជឿជាក់ និងអាចប្រៀបធៀបបានជាមួយបណ្តាប្រទេសផ្សេងៗ។

ការធ្វើបរិវត្តកម្មឌីជីថលក្នុងប៉ុន្មានឆ្នាំចុងក្រោយនេះ វិទ្យាស្ថាន​ជាតិ​ស្ថិតិ​បាន​បង្កើន​ការ​ប្រើ​ប្រាស់​បច្ចេក​វិទ្យា​ឌីជីថល យ៉ាងទូលំទូលាយ តាមរយៈការប្រមូលទិន្នន័យតាម Tablet (CAPI) ការ​អភិវឌ្ឍ​ប្រព័ន្ធគ្រប់គ្រងទិន្នន័យ កណ្តាល ការបង្កើតប្រព័ន្ធផ្សព្វផ្សាយទិន្នន័យអនឡាញ និង​ការ​ពង្រឹង​សុវត្ថិភាព និងការការពារទិន្នន័យ ដើម្បី ចូលរួមការកាត់បន្ថយចំណាយ បង្កើនប្រសិទ្ធភាព និង​ធានាបាននូវទិន្នន័យទាន់ពេលវេលាផងដែរ។ ចំណែកឯ ការពង្រឹងប្រព័ន្ធស្ថិតិជាតិ វិទ្យា​ស្ថាន​ជាតិ​ស្ថិតិ​បានដឹកនាំកិច្ចសហការជាមួយក្រសួង ស្ថាប័ន និងរដ្ឋបាល ថ្នាក់ក្រោមជាតិ ដើម្បីធានា​ឱ្យ​មាន​ភាពសង្គតិភាព និងសមាហរណកម្មទិន្នន័យក្នុងប្រព័ន្ធស្ថិតិជាតិ។ ជាពិសេស ការរៀបចំ និង​អភិវឌ្ឍន៍នូវ កំណត់ស្តង់ដា វិធីសាស្ត្រស្ថិតិ ការរៀបចំផ្ទាលទិន្នន័យ និងការចែករំលែកទិន្នន័យ ស្ថិតិ ព្រមទាំងការពង្រឹងយន្តការសម្របសម្រួលក្នុងការកសាងប្រព័ន្ធស្ថិតិជាតិទំនើប។ វិទ្យា​ស្ថាន​ជាតិ​ស្ថិតិ​បាន កំពុងរៀបចំ​ផែន​ទី​បង្ហាញ​ផ្លូវ​សម្រាប់​វគ្គ​បណ្តុះ​បណ្តាល​ជា​ស៊េរី​ក្នុង​ការ​ពង្រឹង​សមត្ថ​ភាព​មន្ត្រី​ជំនាញស្ថិតិនៅ កម្ពុជា។

ឯកឧត្តម រដ្ឋមន្ត្រី បានលើកឡើងដែរថា ក្នុងយុគសម័យដែលទិន្នន័យត្រូវបានចាត់ទុកថាជា “ធន​ធាន​យុទ្ធសាស្ត្រថ្មី” ការពង្រឹងប្រព័ន្ធស្ថិតិជាតិ គឺជាកត្តាចាំ​បាច់​សម្រាប់​ការ​អភិវឌ្ឍ​ប្រទេស​ប្រកប​ដោយ​ចីរភាព៕ អត្ថបទ៖ គឹមហុក