ក្រសួងបរិស្ថានរៀបចំកូនឈើ៥លានដើម សម្រាប់ចែកជូនពលរដ្ឋក្នុងពិព័រណ៍ «ពន្លកបៃតង» នៅខែក្រោយ

ក្រសួងបរិស្ថានបានរៀបចំកូនឈើប្រមាណ៥លានដើមរួចរាល់ហើយ សម្រាប់​ចែក​ជូន​ពលរដ្ឋ​ដោយ​ឥត​គិត​ថ្លៃ​ក្នុងពិព័រណ៍ «ពន្លកបៃតង» ដែលនឹងប្រព្រឹត្តទៅនៅខែក្រោយនេះ។

ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន នៅព្រឹកថ្ងៃទី២៩ខែមិថុនា ឆ្នាំ២០២៦នេះ បាន​ប្រាប់​BTV​ឲ្យដឹងថា គិតមកដល់ពេលនេះ ក្រសួងបរិស្ថានបាន​ត្រៀម​រួចរាល់​កូន​ឈើ​៥​លាន​ដើម​ ចែកជូនប្រជាពលរដ្ឋឥតគិតថ្លៃនៅក្នុងយុទ្ធនាការ និងពិព័រណ៍ «ពន្លកបៃតង» ដែល​នឹង​ប្រពឹត្ត​ទៅ​ចាប់ពីថ្ងៃទី១០ ដល់ថ្ងៃទី១៣ខែកក្កដា ឆ្នាំ២០២៦ ស្ថិតនៅទីស្តីការក្រសួងបរិស្ថាន រាជ​ធានី​ភ្នំពេញ​។

ឯកឧត្តមបានបន្តទៀតថា កូនឈើដែលបាន​ត្រៀម​ចែក​ជូន​ប្រជាពលរដ្ឋ​នោះ​មាន​ជា​ច្រើន​ប្រភេទ​រួម​មាន​៖ កូនត្នោត១,៥លានដើម ឈើបេង នាងនួន រាំងទឹក ច័ន្ទគីរី ខ្នុរ អំពិលផ្អែម និង​កូន​ឈើ​ក្ងោក​ជា​ដើម ហើយកូនឈើទាំងអស់នេះកើតចេញពីថ្នាលបណ្តុះនៅតាមមន្ទីរបរិស្ថានរាជធានី-ខេត្ត និងថ្នាលបណ្តុះកូនឈើថ្នាក់តំបន់ទាំង៥ស្ថិតនៅខេត្តត្បូងឃ្មុំ សៀមរាប កំពង់ស្ពឺ មណ្ឌលគិរី និង​កោះកុង។ កៅពីនេះ ឯកឧត្តម ក៏​បាន​អំពាវនាវ​ដល់​ប្រជា​ពលរដ្ឋ​អញ្ជើញ​មក​ទទួល​យក​កូន​ឈើ​ដោយ​ឥតគិតថ្លៃនៅក្នុងពិព័រណ៍«ពន្លកបៃតង» និងតាមមន្ទីរបរិស្ថានរាជធានី-ខេត្ត​ទូទាំង​ប្រទេស​កម្ពុជា​។

កាលពីឆ្នាំ២០២៥ ក្រសួងបរិស្ថាន បានចែក​ជូន​កូន​ឈើ​ឥត​គិត​ថ្លៃ​ចំនួន​ជាង​៣​លាន​៤សែន​ដើម​សម្រាប់​ដាំ​នៅតាមផ្ទះ សាលារៀន វត្តអារាម និងដីសហគមន៍ជាដើម។

គួរបញ្ជាក់ដែរថា រាជរដ្ឋាភិបាល អាណត្តិទី៧ ដែលមានក្រសួងបរិស្ថានជាសេនាធិការ បាន​រៀប​ចំ​អនុវត្ត និងដាក់ចេញយុទ្ធនាការពន្លកបៃតង គឺបណ្តុះកូនឈើ ចែកកូនឈើ និងដាំ​ដើម​ឈើ​យ៉ាង​តិច​មួយ​លានដើមក្នុងមួយឆ្នាំជារៀងរាល់ឆ្នាំ ដើម្បីឆ្លើយតបទៅនឹងនិន្នាការបរិស្ថាន និងជួយ​កាត់​បន្ថយ​កម្ដៅ​ ព្រមទាំងឈាន​ឆ្ពោះ​ទៅ​សម្រេច​គោល​ដៅក​ម្ពុជា​ជា​ប្រទេស​អព្យាក្រឹត​កាបូន​នៅ​ឆ្នាំ២០៥​០៕ អត្ថបទ៖ ទូច សោភ័ណ