វេទិកាការងារស្អែកនេះ នឹងតាំងបង្ហាញឱកាសការងារជិត ៤០០កន្លែង សម្រាប់យុវជន និងអ្នក​ស្វែង​រកការងារ

ទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវ: សហការជាមួយ សហ​ភាព​សព័ន្ធយុវជនកម្ពុជា និងក្រុមហ៊ុនធំៗ ចំនួន៨ នៅថ្ងៃទី១៦ ខែកក្កដា ឆ្នាំ២០២៦​ស្អែក​នេះ ​នឹងរៀបចំវេទិកាការងារ និងឱកាសកម្មសិក្សាការងារ ដោយនាំយកឱកាសការងារចំនួន ៣៧៦​កន្លែង សម្រាប់អ្នកដាក់ពាក្យស្នើសុំការងារសម្ភាសន៍ដោយផ្ទាល់។

ប្រភពទីភ្នាក់ងារជាតិមុខរបរ និងការងារ (NEA) បានឱ្យដឹងថា ក្រុមហ៊ុនទាំង៨ ដែលនឹង​ចូល​រួម​ក្នុងវេទិកាការងារនេះ មកពីវិស័យសេវាកម្ម សំណង់ ហាងនំ និងកសិកម្មជាដើម។ វេទិកា​ការងារនេះ នឹងរៀបចំឡើងស្ថិតនៅមជ្ឈមណ្ឌលការងាររាជធានីភ្នំពេញ ក្នុងបរិវេណ​ក្រសួង​ការងារ និងបណ្តុះបណ្តាលវិជ្ជាជីវៈ។

ទីភ្នាក់ងារជាតិមុខរបរ និងការងារ បានអំពាវនាវយុវជន សិស្ស/និស្សិត និងអ្នក​កំពុង​ស្វែង​រក​ការងារ​ធ្វើ ឬចង់ផ្លាស់ប្តូរការងារអាចយកប្រវត្តិរូបសង្ខេប (CV) ដើម្បីចូលរួមដាក់ពាក្យ និង​សម្ភាស​ការងារផ្ទាល់ជាមួយតំណាងក្រុមហ៊ុនទាំង៨នេះ នៅមួយកន្លែងភ្លាមៗតែម្តង។

សូមបញ្ជាក់ទៀតថា ក្រៅពីវេទិកាការងារខាងលើនេះ ក្រសួងការងារ និងបណ្តុះបណ្តាលវិជ្ជាជីវ: តែង​​តែរៀបចំវេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ នៅបណ្តាខេត្តនានា ដើម្បី​នាំ​យកឱកាសការងារជាច្រើនកន្លែងពីរោងចក្រ សហគ្រាស និងក្រុមហ៊ុនឯកជន ព្រមទាំង​ព័ត៌មា​ន​អំពីអត្ថប្រយោជន៍របស់បេឡាជាតិសន្តិសុខសង្គម (ប.ស.ស.) និងកម្មវិធី​បណ្តុះប​ណ្តាល​បច្ចេ​កទេស និងវិជ្ជាជីវៈ (TVET) ជូនដល់ប្រជាពលរដ្ឋក្នុងមូលដ្ឋាន។ ជាក់ស្តែង នៅ​ថ្ងៃ​ទី១៧ និង១៨ ខែកក្កដាខាងមុខនេះ ក្រសួងការងារ និងបណ្តុះបណ្តាលវិជ្ជាជីវ: នឹងបន្ត​រៀប​ចំវេទិ​កាការងារ សន្តិសុខសង្គម និងបណ្តុះបណ្តាលវិជ្ជាជីវៈ ដោយនាំយកឱកាសការងារជាង ៩ម៉ឺន ៣ពាន់​កន្លែង សម្រាប់អ្នកខេត្តបាត់ដំបង៕ អត្ថបទ៖ ឈិត បូរ៉ាវី