សម្ដេចធិបតី ហ៊ុន ម៉ាណែត ផ្ញើសារអនុមោទនា ពិធីបុណ្យចូលព្រះវស្សា នៅក្នុងព្រះពុទ្ធសាសនា

នៅព្រឹកថ្ងៃទី៣០ ខែកក្កដា ឆ្នាំ២០២៦នេះ សម្ដេច​មហាបវរធិបតី ហ៊ុន ម៉ាណែត នាយកដ្ឋមន្រ្ដីនៃកម្ពុជា បាន​ផ្ញើសារ​អនុមោទនា ពិធីបុណ្យចូលព្រះវស្សា នៅក្នុងព្រះពុទ្ធសាសនា ដែល ពិធីបុណ្យចូលព្រះវស្សានឹងចាប់ផ្ដើម​នៅល្ងាចថ្ងៃទី១៥កើត ខែអាសាឍ ឆ្នាំមមី អដ្ឋស័ក ព.ស ២៥៧០នេះ។

សម្ដេច​ធិបតី នាយករដ្ឋមន្រ្ដី បានសរសេរ​នៅក្នុងសារ​ថា ពិធីបុណ្យចូលព្រះវស្សា គឺជាពិធីបុណ្យមួយដែលមានសារៈសំខាន់ក្នុងព្រះពុទ្ធសាសនា ជាពេលវេលាដ៏សំខាន់សម្រាប់ភិក្ខុសង្ឃ និងសាមណេរបានរៀនធម៌ និងវិន័យយ៉ាងខ្ជាប់ខ្ជួនតាមពុទ្ធឱវាទ។

សម្ដេច​បានថ្លែងថា បងប្អូនដែលជាអ្នកមានជំនឿទៅលើព្រះពុទ្ធសាសនា តែងតែនាំគ្នាប្រារព្ធពិធីបុណ្យដោយនាំយកជាស្លាដក់ អង្ករ ភេសជ្ជៈ និងរបស់ប្រើប្រាស់ផ្សេងៗ ទៅប្រគេនព្រះសង្ឃតាមលទ្ធភាព។

សម្ដេច​ធិបតីបានថ្លែងថា ពិធីបុណ្យចូលព្រះវស្សា ប្រារព្ធធ្វើឡើងជារៀងរាល់ឆ្នាំនាថ្ងៃ ១រោច ខែអាសាឍ ដែលពិធីត្រូវបានចាប់ផ្តើមនៅល្ងាចថ្ងៃទី១៥កើត ខែអាសាឍ ត្រូវនឹងថ្ងៃទី៣០​ ខែកក្កដា ឆ្នាំ២០២៦នេះ ដោយមានការចូលរួមពីសំណាក់បងប្អូន និងចាស់ទុំចំណុះជើងវត្ត នាំគ្នាហែទៀនវស្សា សំពត់ ស្លាដក់ និងសម្ភារប្រើប្រាស់ផ្សេងៗ ជុំវិញព្រះវិហារ ហើយបន្ទាប់មក ព្រះសង្ឃសម្តែងធម៌ទេសនា និងវេរទៀនវស្សា ជាមួយនឹងសម្ភារប្រគេនព្រះសង្ឃ។

សូមជម្រាបថា នៅក្នុងពិធីបុណ្យចូលព្រះវស្សា និងជាថ្ងៃប្រារព្ធ បុណ្យអាសាឡ្ហបូជា នៅក្នុងព្រះពុទ្ធសាសនា។ បើទោះបីជាតាមព្រះវិន័យ ព្រះសង្ឃត្រូវចូលកាត់វស្សាពេញផ្លូវការនៅថ្ងៃ ១រោច ខែអាសាឍ ក៏ដោយ ប៉ុន្តែពិធីកម្មសាសនារបស់ពុទ្ធបរិស័ទចាប់ផ្ដើមធ្វើឡើងតាំងពីល្ងាចថ្ងៃ១៥កើតនេះម្ល៉េះ។

នៅក្នុងពិធីនេះ មាន​សកម្មភាពសំខាន់ៗនៅល្ងាចថ្ងៃ១៥កើត ខែអាសាឍមួយចំនួនដូចជា​ ការហែទៀនវស្សា និងទេយ្យទាន៖ ប្រជាពុទ្ធបរិស័ទ ចាស់ទុំចំណុះជើងវត្ត នាំគ្នាដង្ហែទៀនវស្សា សំពត់សាដក (សំពត់ងូតទឹកភ្លៀង) អង្ករ ភេសជ្ជៈ និងសម្ភារប្រើប្រាស់ផ្សេងៗ ហែជុំវិញព្រះវិហារចំនួន ៣ជុំ។ ក្រោយពីហែរួច ពុទ្ធបរិស័ទបាននាំគ្នាចូលក្នុងព្រះវិហារ ដើម្បីធ្វើកិច្ចវេរប្រគេនទៀនវស្សា និងគ្រឿងឧបភោគបរិភោគទាំងនោះប្រគេនដល់ព្រះសង្ឃ។ ព្រះសង្ឃសម្តែងធម៌ទេសនាអំពីរឿងរ៉ាវទាក់ទងនឹងបុណ្យចូលព្រះវស្សា និងបុណ្យអាសាឡ្ហបូជា ដើម្បីឱ្យពុទ្ធបរិស័ទបានយល់ដឹងកាន់តែច្បាស់។ ចំណែកទៀនវស្សាដែលបានប្រគេនរួច នឹងត្រូវអុជបំភ្លឺនៅក្នុងព្រះវិហារ ហើយត្រូវរក្សាឱ្យឆេះជានិច្ចមិនឱ្យរលត់ឡើយ រហូតអស់រយៈពេល ៣ខែពេញ៕