គ្រូបណ្តុះបណ្តាលជំនាញលើកទឹកចិត្តយុវជនរៀនជំនាញ ធីវ៉េត ដើម្បីឆ្លើយតបតម្រូវការទីផ្សារការងារអនាគត

ខណៈដែលការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នឹងឈានមកដល់នាពេលខាងមុខនេះ មន្ត្រី និងគ្រូបណ្តុះបណ្តាល នៃក្រសួងការងារ និងបណ្តុះបណ្តាលវិជ្ជាជីវៈ បានផ្ញើរសារលើកទឹកចិត្តយុវជនឱ្យចាប់យកការបណ្តុះបណ្តាលជំនាញវិជ្ជាជីវៈ និងបច្ចេកទេស (TVET) ព្រោះជាស្ពានចម្លងដ៏សំខាន់ដែលឆាប់ទទួលបានការងារធ្វើ មានចំណូលសមរម្យ និងឆ្លើយតបទៅនឹងតម្រូវការទីផ្សារការងារនាពេលអនាគត។

លោក សាយ សុឃាង នាយករង វិទ្យាស្ថានបច្ចេកទេសឧស្សាហកម្ម (ITI) បានមានប្រសាសន៍ប្រាប់ព័ត៍មាន​ ប៊ីធីវី នៅព្រឹកថ្ងៃទី៣០ ខែកក្កដានេះថា ការចាប់យកការសិក្សាជំនាញបច្ចេកទេស និងវិជ្ជាជីវៈ ឬធីវ៉េត នេះ ជាការវិនិយោគលើមូលធនមនុស្សដ៏មានតម្លៃ និងជាកម្លាំងស្នូលសម្រាប់ការអភិវឌ្ឍសេដ្ឋកិច្ចជាតិ។ ជាក់ស្តែង សិស្ស-និស្សិតដែលបញ្ចប់ការសិក្សាពីវិទ្យាស្ថានមានអត្រាយ៉ាងច្រើនដែលទទួលបានការងារធ្វើ ដែលបង្ហាញពីគុណភាពនៃការបណ្តុះបណ្តាល និងការឆ្លើយតបនឹងតម្រូវការទីផ្សារការងារ។ លោកបានបញ្ជាក់ថា ជំនាញក្នុងវិស័យនេះ មិនមែនជាការសិក្សាកម្រិតទី២ ឬមានតម្លៃទាបជាងការអប់រំទូទៅនោះទេ ពោលគឺមានគុណតម្លៃស្មើនឹងជំនាញផ្សេងៗទៀត និងឆ្លើយតបតម្រូវការទីផ្សារការងារព្រមទាំងជួយកសាងអនាគតរបស់បុគ្គល គ្រួសារ និងសង្គមជាតិ។

ស្របគ្នាខាងលើនេះ ក្រុមគ្រូបច្ចេកទេស នៅក្នុងវិទ្យាស្ថានខាងលើ បានចូលរួមអំពាវនាវជំរុញឱ្យយុវជន ជាពិសេសសិស្សដែលនឹងបញ្ចប់ការប្រឡងថ្នាក់ទី១២នាពេលខាងមុខនេះ ត្រូវបន្តរៀនសូត្រឱ្យបានច្រើន ជាពិសេសពង្រឹងកម្លាំងពលកម្មជំនាញ ព្រមទាំងប្រើប្រាស់បច្ចេកវិទ្យាទំនើប និងបញ្ញាសិប្បនិម្មិត ដើម្បីបង្កើនសមត្ថភាពប្រកួតប្រជែង និងឱកាសរីកចម្រើនក្នុងអាជីពការងារ។ ក្រុមគ្រូបណ្តុះបណ្តាល ក៏បានលើកទឹកចិត្តថែមទៀតដល់អាណាព្យាបាលបន្តគាំទ្រកូនចៅឱ្យជ្រើសរើសការសិក្សាជំនាញបច្ចេកទេស និងវិជ្ជាជីវៈ សម្រាប់កសាងអនាគត និងលើកកម្ពស់ជីវភាពគ្រួសារ។

ពាក់ព័ន្ធការអប់រំបណ្តុះបណ្តាលជំនាញវិជ្ជាជីវៈ និងបច្ចេកទេស (TVET) នេះដែរ ក្រសួងការងារ និងបណ្តុះបណ្តាលវិជ្ជាជីវៈ បានលើកទឹកចិត្តដល់សិស្សានុសិស្សវិទ្យាល័យទូទាំងប្រទេស ឱ្យចុះទស្សនកិច្ចសិក្សានៅតាមគ្រឹះស្ថានបណ្តុះបណ្តាលបច្ចេកទេស និងវិជ្ជាជីវៈ (TVET) ក្រោមឱវាទក្រសួង ដើម្បីស្វែងយល់ពីសក្តានុពលរបស់ខ្លួន កម្មវិធីបណ្តុះបណ្តាលជំនាញ ការអនុវត្តជាក់ស្តែង និងឱកាសការងារនាពេលអនាគត ដែលជួយឱ្យសិស្សមានទំនុកចិត្តក្នុងការសម្រេចចិត្តជ្រើសរើសផ្លូវសិក្សា និងអាជីពសមស្រប ស្របតាមតម្រូវការទីផ្សារការងារ និងការអភិវឌ្ឍប្រទេសជាតិ។ បន្ថែមពីនេះ ដើម្បីឱ្យសិស្សបានឃើញទាំងការសិក្សា ការអនុវត្តជាក់ស្តែង ឧបករណ៍ទំនើបៗ និងឱកាសការងារនាពេលអនាគត ដែលជួយបង្កើនការសម្រេចចិត្តឱ្យជ្រើសរើសផ្លូវសិក្សាដែលសមស្របនឹងខ្លួនឯង៕អត្ថបទ៖ ឈិត បូរ៉ាវី