ក្រសួងការងារ និងអតីតពលករនៅថៃ អំពាវនាវ​ដល់ពលករខ្មែរ​ត្រឡប់​មក​ពី​ថៃ​ងាក​មក​ធ្វើ​ការ​ក្នុង​ស្រុក​វិញ ​ខណៈបច្ចុប្បន្នកំពុងមានការងារ​ជាង ៩ម៉ឺនកន្លែង

ក្រសួងការងារ​ និងបណ្ដុះបណ្ដាលវិជ្ជាជីវៈ និងអតីតពលករនៅថៃ បានអំពាវ​នាវ​ដល់​ពលករ​ខ្មែរ​ត្រឡប់​មក​ពី​ថៃ​ងាក​មកធ្វើការក្នុងស្រុកវិញ ខណៈគិតត្រឹមដើមខែសីហា ឆ្នាំ២០២៦នេះ រោង​ចក្រ ​សហគ្រាសជាច្រើននៅតាមបណ្តារាជធានី-ខេត្តទូទាំងប្រទេស កំពុងមាន​តម្រូវ​ការ​កម្លាំង​ពលកម្ម​ថ្មី​ៗ​បន្ថែមទៀ​តយ៉ាងខ្លាំង ដើម្បីពង្រីកសង្វាក់ផលិតកម្មរបស់ខ្លួន ក្នុងនោះ​ឱកាស​ការងារ​ប្រមាណ​ជាង ​៩ម៉ឺនកន្លែង លើគ្រប់វិស័យ ដែលកំពុងបើកចំហរង់ចាំប្រជាពលរដ្ឋ ជាពិសេស​គឺ​ការ​ស្វាគមន៍​យ៉ាង​កក់​ក្តៅ​ចំពោះ​អតីតពលករខ្មែរដែលបានត្រឡប់មកពីប្រទេសថៃ។

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានលើក​ឡើង​ឱ្យ​ដឹង​ថា ​ឱកាសការងារនៅក្នុងប្រទេសកម្ពុជា តាមរយៈវេទិកាការងារ ឬទាក់ទងទៅកាន់លេខ ១២៩៧ ដែល​បច្ចុប្បន្នមានចំនួនជាង ៩ម៉ឺនកន្លែង នៅតាមរោងចក្រ សហគ្រាស និងក្រុមហ៊ុននានា។

ឱកាស​ការងារទាំងនេះមានលក្ខណៈចម្រុះ ចាប់តាំងពីកម្រិតគ្មានជំនាញ ជំនាញកម្រិតទាប មធ្យម រហូតដល់បច្ចេកទេសជាន់ខ្ពស់ នៅក្នុងវិស័យចម្បងៗ មានដូចជា៖ វិស័យ​ឧស្សាហកម្ម និង​កម្មន្តសាល, វិស័យកសិកម្មនិងកសិ-ឧស្សាហកម្ម និងវិស័យសេវាកម្មនិងសំណង់ ដែល​សុទ្ធ​សឹង​មាន​តម្រូវការខ្ពស់។

ទាក់ទិនការលើកឡើងខាងលើនេះ លោក គង់ អ៊ុង ប្រធានសហជីពមូលដ្ឋាន ក៏ដូចជាកម្មករ កម្មកា​រិនី នៅក្នុងរោងចក្រកាត់ដេរសម្លៀកបំពាក់ ហួយ ស៊ីនទូ ខេមបូឌា ស្ថិតនៅខណ្ឌកំបូល រាជ​ធានី​ភ្នំពេញ បាននិយាយប្រាប់ព័ត៍មាន ប៊ីធីវី ឱ្យដឹងនៅព្រឹកថ្ងៃទី៤ ខែសីហា ឆ្នាំ២០២៦នេះថា ការ​ងារ​នៅក្នុងស្រុកសព្វថ្ងៃនេះពិតជាមានតម្រូវការច្រើន ដោយសារឃើញរោងចក្រ សហ​គ្រាស​បាន​បើក​ដំណើរ​ការ​ច្រើន​ជាបន្តបន្ទាប់ និងផ្សព្វផ្សាយដំណឹងការ​ជ្រើស​រើស​បុគ្គលិក​ជា​រៀង​រាល់​ថ្ងៃ​ផង​ដែរ​។

សហជីព និងក្រុមកម្មករ បានអំពាវនាវដ​ល់អ្នកស្វែងរកការងារ ជាពិសេស​អតីត​ពលករ​ខ្មែរ​ត្រឡប់​មក​ពី​ថៃ ​ងាកមកធ្វើការក្នុងស្រុកវិញឱ្យបានច្រើន ខណៈឱកាស​ការ​ងារមានច្រើន​សម្បូរ​បែប​កំពុង​រង់​ចាំ។​ កា​រ​បំពេញ​ការងារនៅក្នុងស្រុក មិនត្រឹមតែផ្តល់ប្រាក់ចំណូលសមរម្យប៉ុណ្ណោះទេ ប៉ុន្តែ​ថែម​ទាំង​ធានា​បាននូវសុវត្ថិភាព ការការពារសិទ្ធិការងារ និងអត្ថ​ប្រ​យោជន៍​សង្គម​ស្រប​តាម​ច្បាប់​ជា​ធរមាន ពិសេសបានរស់នៅជួបជុំក្រុមគ្រួសារ និងសាច់ញាតិបងប្អូន។

សូមបញ្ជាក់ថា រាជរដ្ឋាភិបាលកម្ពុជា ដែលមានក្រសួងការងារ និង​បណ្ដុះ​បណ្ដាល​វិជ្ជាជីវៈ​ជា​សេនា​ធិ​ការ បាន​ខិតខំប្រមូល និងបង្កើត​ឱកាស​ការងារជាបន្តបន្ទាប់ ដើម្បីឆ្លើយ​តប​នឹង​តម្រូវ​ការ​របស់​ប្រជាពលរដ្ឋ ជាពិសេសអតីតពលករដែលបានវិលត្រឡប់មកកម្ពុជាវិញ។ ក្រសួងការងារ បាន​អះ​អាងថា នឹងបន្តសហការជាមួយអាជ្ញាធរពាក់ព័ន្ធ ដើម្បីផ្សព្វផ្សាយព័ត៌មា​នអំពីឱកាស​ការ​ងារ​នៅ​ក្នុង​ស្រុក និងលើ​កកម្ពស់ការធ្វើចំណាកស្រុ​កដោយសុវត្ថិភាព និងស្រប​ច្បាប់ សំដៅ​ការ​ពារ​សិ​ទ្ធិ និងផលប្រ​យោជន៍របស់​ប្រជាពលរដ្ឋ និង​ពលករខ្មែ​រ​ទាំង​អស់៕ អត្ថបទ៖ ឈិត បូរ៉ាវី