កម្ពុជា-ICRC ពង្រឹងកិច្ចសហប្រតិបត្តិការផ្តោតសំខាន់លើសកម្មភាពមនុស្សធម៌

ឯកឧត្ដម កាន់ ផារិទ្ធ រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ បានទទួលជួបសម្តែងការគួរសមជាមួយលោកAlain Aeschlimann, Advisor, Security and Crisis Management (SCMS) Unitនៃគណៈកម្មាធិការអន្តរជាតិនៃកាកបាទក្រហម (ICRC) នៅទីស្ដីការក្រសួង កាលពីថ្ងៃទី៧ ខែសីហា ឆ្នាំ២០២៦។

ក្នុងជំនួប ភាគីទាំងពីរបានពិភាក្សាអំពីកិច្ចសហប្រតិបត្តិការដ៏យូរអង្វែងរវាងកម្ពុជាជាមួយ ICRC ដោយផ្តោតសំខាន់លើសកម្មភាពមនុស្សធម៌ និងកិច្ចសម្របសម្រួលជាមួយអាជ្ញាធរពាក់ព័ន្ធ តាមរយៈការចុះសួរសុខទុក្ខផ្ទាល់ និងការផ្តល់ជំនួយមនុស្សធម៌បន្ទាន់ដល់ជនភៀសសឹកកម្ពុជាដោយសារជម្លោះ ព្រំដែនកម្ពុជា-ថៃ ព្រមទាំងការសម្របសម្រួលក្នុងការដោះលែងដោយសុវត្ថិភាព និងការបញ្ជូនត្រឡប់មកវិញនូវយោធាកម្ពុជាទាំង១៨ រូប ដែលត្រូវបានចាប់ខ្លួនដោយទាហានថៃក្រោយបទឈប់បាញ់ និងការលើកកម្ពស់ការគោរពច្បាប់មនុស្សធម៌អន្តរជាតិ។

ទន្ទឹមនឹងនេះ ភាគីទាំងពីរក៏បានផ្លាស់ប្តូរយោបល់អំពីទិសដៅនៃកិច្ចសហប្រតិបត្តិការនាពេលអនាគត ដើម្បីពង្រឹងបន្ថែមទៀតនូវការសម្របសម្រួល និងលើកកម្ពស់ការឆ្លើយតបផ្នែកមនុស្សធម៌ឱ្យទាន់ពេល និងកាន់តែមានប្រសិទ្ធភាពជូនចំពោះប្រជាពលរដ្ឋរងគ្រោះ។