រាជរដ្ឋាភិបាលប្ដេជ្ញាបន្តអភិវឌ្ឍទៅមុខ និងថែរក្សាសុខសន្តិភាព ទោះដៃម្ខាង​កំពុង​តែ​ដោះ​ស្រាយ​បញ្ហា​ព្រំដែន

រាជរដ្ឋាភិបាលប្ដេជ្ញាបន្តអភិវឌ្ឍទៅមុខ និងថែរក្សាសុខសន្តិភាព ទោះ​ដៃម្ខាង​កំពុង​តែ​ដោះ​ស្រាយ​បញ្ហា​ព្រំដែន​ក៏ដោយ ​នេះបើតាមការបញ្ជាក់របស់អ្នកនាំពាក្យរាជរដ្ឋាភិបាល។

ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា តាមរយៈសន្និសីទប្រចាំថ្ងៃ ស្ដីពី ស្ថាន​ការណ៍​ព្រំដែនកម្ពុជា-ថៃ នៅថ្ងៃទី៥ ខែកញ្ញា នេះ បានបញ្ជាក់ថា រាជរដ្ឋាភិបាល ប្ដេជ្ញា​បន្ត​អភិវឌ្ឍ​ទៅ​មុខ ​ដើម្បីបង្កើតសមិទ្ធផលថ្មីៗជូនជាតិ និងប្រជាជន និងបន្តថែរក្សាសុខសន្តិភាព ដែល​ជា​ប្រភព​នៃ​សេចក្ដីសុខរបស់ប្រជាពលរដ្ឋ បើទោះជាដៃម្ខាង​កំពុង​តែ​ខិត​ខំ​ដោះ​ស្រាយ​បញ្ហា​ព្រំដែន​យ៉ាង​សកម្ម​យ៉ាងណាក៏ដោយ។

ឯកឧត្តម បានបញ្ជាក់ថា រាជរដ្ឋាភិបាល បានចាត់ទុកការការពារអធិបតេយ្យ បូរភាពទឹកដី និង​ប្រជាជន គឺជាអាទិភាពខ្ពស់បំផុត ក្នុងន័យនេះ នយោបាយការទូត បាននិង​កំពុង​ប្រព្រឹត្ត​ទៅ​យ៉ាង​សកម្ម​ព្រម​ៗ​គ្នា ទាំងការទូតក្នុងក្របខ័ណ្ឌរាជរដ្ឋាភិបាល និងការទូតសភា ដើម្បីជំរុញ​ឱ្យ​មាន​ដំណោះ​ស្រា​យ​បញ្ហាព្រំដែនជាមួយប្រទេសថៃឱ្យបានឆាប់តាមមធ្យោបាយសន្តិវិធី ដោយ​ផ្អែក​លើ​អនុសញ្ញា សន្ធិសញ្ញា និងច្បាប់អន្តរជាតិ តាមរយៈយន្តការ និងកិច្ចព្រម​ព្រៀង​នានា​ដែល​មាន​ស្រាប់​។

ឯកឧត្តម បានបញ្ជាក់ទៀតថា តាមរយៈកិច្ចការការទូតយ៉ាងសកម្ម គឺពិភព​លោក​មិន​នៅ​ស្ងៀម​ឡើយ ​ចំពោះការឈ្លានពានកាន់កាប់ទឹកដីកម្ពុជាដោយខុសច្បាប់ពីសំណាក់កងកម្លាំងថៃ និង​ការ​បំពាន​សិទ្ធិជនភៀសសឹកម្ពុជា ខណៈការងារការទូតបាន និងកំពុងបន្តធ្វើយ៉ាងសកម្មខ្លាំងក្លា និង​រស់​រវើករបស់រាជរដ្ឋាភិបាលដើម្បីការពារអធិបតេយ្យជាតិ បូរណភាពទឹកដី និងជន​ភៀស​សឹក​កម្ពុជា​។

ជាក់ស្ដែង យន្តការផ្សះផ្សាដោយបង្ខំ ក្រោមយន្តការអង្គការសហប្រជាជាតិ ស្ដីពី នីតិសមុទ្រ (UNCLOS) កំពុងដំណើរការទៅមុខតាមនីតិវិធី ខណៈការវាស់វែងខណ្ឌសីមាព្រំដែនគោក និង​ការ​វិល​ត្រឡប់របស់ជនភៀសសឹកទៅកាន់លំនៅឋានវិញ កំពុងត្រូវ​បាន​ជំរុញ​យ៉ាង​ខ្លាំង​ក្លាដោ​យ​រាជ​រដ្ឋាភិបាលកម្ពុជា ក៏ដូចជា សហគមន៍អន្តរជាតិ៕ អត្ថបទ៖ វ៉ាន់