ពលរដ្ឋបង្ហាញក្ដីសប្បាយរីករាយក្រោយបានចុះឈ្មោះទៅទស្សនកិច្ចតំបន់ព្រំដែនទិសឦសានរួចរាល់

ប្រជាពលរដ្ឋ ពិសេសយុវជនមួយចំនួន បានចុះឈ្មោះរួចរាល់ហើយ សម្រាប់ការទៅទស្សនកិច្ច​នៅ​តំបន់​ព្រំដែន ដែលរាជរដ្ឋាភិបាលកម្ពុជាបានរៀបចំឡើង។ ក្រោយចុះឈ្មោះរួចរាល់​ពួក​គេ​មាន​ក្ដី​រំភើប​រីករាយ ព្រោះពួកគេនឹងមានឱកាសទៅពិនិត្យ និង​សិក្សា​ពី​ភាព​ជាក់ស្ដែងនៃ​តំបន់​ព្រំដែន​របស់​កម្ពុជា។

ត្រឹមរយៈពេលប៉ុន្មានថ្ងៃនៃការបើកចុះឈ្មោះទៅទស្សនកិច្ចនៅតំបន់ព្រំដែនភូមិភាគឦសាន ប្រជា​ពលរដ្ឋកម្ពុជា ជាច្រើនរយនាក់បានចុះឈ្មោះរួចរាល់ និងមាន​ប្រជាពលរដ្ឋ​ជា​ច្រើន​ទៀត​កំពុង​ផុស​ផុលចុះឈ្មោះជាបន្តបន្ទាប់។ ឯកឧត្តម ទេព អស្នារិទ្ធ អ្នកនាំពាក្យក្រសួងព័ត៌មាន ជា​ក្រសួង​ដឹកនាំ រៀបចំដំណើរទស្សនកិច្ចនេះបានលើកឡើងកាលពីម្សិលម៉ិញថា ចំនួនអ្នក​ចុះ​ឈ្មោះរួ​ច​រាល់មានរហូតដល់ជាង ៧០០នាក់ ហើយការទៅទស្សនកិច្ចជើងដំបូង នឹងប្រព្រឹត្តិ​ទៅ​នៅ​ថ្ងៃ​ទី៧ ខែកញ្ញា ចុងសប្ដាហ៍នេះ។

សម្រាប់យុវជន ដែលបានចុះឈ្មោះរួចរាល់ បង្ហាញនូវក្ដីរំភើបរីករាយ ព្រោះពួកគេ​មាន​ឱកាស​ទៅ​ទស្សន​កិច្ច​នៅតំបន់ព្រំដែនភូមិភាគឦសាន ទៅមើលពីភាពជាក់ស្ដែងនៅតំបន់នោះ ភាពរីករ​ចម្រើន​ និងស្វែងយល់ពីជីវភាពប្រជាពលរដ្ឋ រស់នៅជាក់ស្ដែងនៅតំបន់នោះផងដែរ។

បើ​តាមសេចក្តីជូនដំណឹងរបស់ក្រសួងព័ត៌មាន កម្មវិធីដំណើរទស្សនកិច្ចទៅកាន់ទិសឦសាន្តនេះ ធ្វើ​ឡើង​នៅរៀងរាល់ចុងសប្តាហ៍ថ្ងៃសៅរ៍ចាប់ពីថ្ងៃទី៧ ខែកញ្ញាតទៅ រហូតដល់​ដំណាច់​ឆ្នាំ​២០២៤​។ ការធ្វើដំណើរទស្សនកិច្ច នឹងរៀបចំឡើង មួយលើកចំនួន២០០នាក់ ដោយនឹង​មាន​ផ្តល់​ការ​ធ្វើដំណើរ ផ្តល់ម្ហូបអាហារ និងការស្នាក់នៅដោយមិនគិតថ្លៃ។

សេចក្តី​ជូនដំណឹង ក៏បានបញ្ជាក់ដែរថា សម្រាប់ទីតាំងដំណើរទស្សនកិច្ច គឺបាន​រៀបចំ​បែង​ចំនួន​៣ទីតាំង​៖ ទីតាំងទី១ គឺធ្វើដំណើរទស្សនកិច្ចតាមបណ្តោយព្រំដែន ខេត្តត្បូងឃ្មុំ ក្រចេះ និង​មណ្ឌល​គិរី មានរយៈពេលពេញ១ថ្ងៃ ។ ទីតាំងទី២ ធ្វើដំណើរតាម​បណ្តោយ​ព្រំដែន​ក្នុង​ខេត្ត​ក្រចេះ និងមណ្ឌលគិរី គឺត្រូវទស្សនាសម្រាកមួយយប់ និងទីតាំងទី៣ ធ្វើដំណើរ​តាម​បណ្តោយ​ព្រំដែន​ក្នុង​ខេត្តស្ទឹងត្រែង និងខេត្តរតនគិរី ទស្សនាសម្រាកមួយយប់។ សម្រាប់ប្រជាពលរដ្ឋ ដែល​មាន​បំណងចង់ទៅទស្សនកិច្ច ត្រូវចុះឈ្មោះតាមប្រព័ន្ធអនឡាញ ដោយស្គេនទៅលើ QR CODE ដែល​មាន​ភ្ជាប់ជាមួយសេចក្ដីជូនដំណឹង៕ អត្ថបទ៖ គឹមហុក