មន្ទីរពេទ្យរដ្ឋថ្នាក់ជាតិផ្តល់ថ្នាំបង្ការដល់ទារក និងកុមារ ដើម្បីការពារសុខភាព​គ្របដណ្តប់​ឱ្យបាន ១០០%

ក្នុងរយៈពេល០១ឆ្នាំនៃអាណតិ្តរដ្ឋាភិបាលថ្មី ក្រសួងសុខាភិបាល ក៏ដូចជាមនី្ទរពេទ្យកុមារជាតិ បាន​ខិតខំប្រឹងប្រែងធ្វើការកែលម្អ អភិវឌ្ឍន៍ និងការផ្តល់សេ​វា​ប្រក​ប​ដោយ​គុណ​ភាព​ជូន​ដល់​បណ្តា​ប្រជាជន ជាពិសេសកុមារកម្ពុជា ដែលមានជំងឺ​មក​ទទួល​សេវា​នៅ​ក្នុង​មនី្ទរ​ពេទ្យ​កុមារ​ជាតិ​របស់​យើង​នេះ។

ឯកឧត្តមវេជ្ជបណ្ឌិត ញឹប អង្គាបុស្ស នាយកមនី្ទរពេទ្យកុមារជាតិ នៃក្រសួងសុខាភិបាល តាម​រយៈ ​BTV ព័ត៌មាននាព្រឹកថ្ងៃទី៤ ខែកញ្ញា ឆ្នាំ២០២៤នេះ បានលើកឡើងថា ដោយ​មាន​ទទួល​បាន​សេចកី្ត​ទុកចិត្តពីមាតា បិតា អាណាព្យាបាលរបស់កុមារ បាននាំកូន​ចៅ​មក​ទទួល​សេវា​ក្នុង​មនី្ទរ​ពេទ្យ​កាន់តែច្រើនឡើង ជាមធ្យមអ្នកជំងឺ​មក​ពិនិត្យ​ជំងឺ​ក្រៅ​ចន្លោះពី​១០០០​នាក់​ទៅ​១២០០​នាក់​ និងអ្នកជំងឺសម្រាកព្យាបាលក្នុងមនី្ទរពេទ្យ មានជុំវិញ៥០០នាក់ ហើយអ្នក​ជំងឺ​ក្រោយ​សម្រាក​ពេទ្យ និងជាសៈស្បើយ ជុំវិញ៨០នាក់ ទៅ៩០នាក់ផងដែរ ក្នុងមួយថ្ងៃ។ ក្រៅពីការ​ព្យាបាល​មនី្ទរ​ពេទ្យកុមារជាតិ តែងតែយកចិត្តទុកដាក់លើការការពារ ដែលជាចំនុចសំខាន់ ដោយ​ក្រុម​ការងារគ្រូពេទ្យ បានផ្តល់ការអប់រំណែនាំដល់មាតា បិតា អាណាព្យាបាល អំពីអនាម័យ ធ្វើ​យ៉ាង​ណា​កុំឲ្យកូនៗ ងាយរងគ្រោះដោយជំងឺផ្សេងៗ និងរបបអាហារ កាលណាកុមារហូបចុក បាន​ត្រឹម​ត្រូវ មានសុខភាពល្អ ក៏អាចការពារជំងឺបានមួយចំនួនធំផងដែរ។

សូមរំលឹកផងដែរ កាលពីថ្ងៃទី២ ខែកញ្ញា ឆ្នាំ២០២៤កន្លងទៅនេះ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានចុះពិនិត្យការផ្តល់សេវាចាក់ថ្នាំបង្ការ នៅមជ្ឈ​មណ្ឌល​ជាតិ​គាំ​ពារ​មាតា និងទារក និងសំណេះសំណាលជាមួយបុគ្គលិក មន្ត្រីរាជការនៃកម្មវិធីជាតិផ្តល់ថ្នាំបង្ការ ដើម្បី​ពិនិត្យវឌ្ឍនភាព និងលើកទិសដៅការងារបន្ត ក្នុងការ​សម្រេច​ឱ្យ​បាន​អត្រា​គ្រប​ដណ្តប់​នៃ​ការ​ផ្តល់​ថ្នាំបង្ការទាំង១៣មុខ របស់កម្មវិធីជាតិផ្តល់ថ្នាំបង្ការ នៅទូទាំងប្រទេស៕ អត្ថបទ រដ្ឋា