ព័ត៌មាន
CSX សហការជាមួយក្រុមហ៊ុនក្នុងស្រុកដើម្បីលើកកម្ពស់ការយល់ដឹងវិស័យផ្សារហ៊ុន
ផ្សារមូលបត្រកម្ពុជា (CSX) និងធនាគារ អេស៊ីលីដា ភីអិលស៊ី បានសហការរៀបចំកម្មវិធី “វេទិកាក្រុមហ៊ុនចុះបញ្ជី” ដើម្បីផ្សព្វផ្សាយអំពីសក្តានុពលវិស័យផ្សារហ៊ុននៅកម្ពុជា ក៏ដូចជា បង្ហាញនូវវឌ្ឍនភាពរបស់ធនាគារ អេស៊ីលីដា ដើម្បីឱ្យវិនិយោគិន បានស្វែងយល់ពីកាលានុវត្តភាពរបស់ធនាគារនាពេលបច្ចុប្បន្ន និងអនាគត។
ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា នៅក្នុងពិធីបើកវេទិកា នាព្រឹកថ្ងៃទី៤ កញ្ញា ឆ្នាំ២០២៤នេះ បានមានប្រសាសន៍ថា វេទិកាក្រុមហ៊ុនចុះបញ្ជី ត្រូវបានរៀបចំជារៀងរាល់ឆ្នាំ ក្នុងគោលបំណងពង្រឹង និងពង្រីកទំនុកចិត្ត និងសមត្ថភាពវិភាគទៅកាន់វិនិយោគិន និងវិនិយោគសក្តានុពលវិស័យផ្សារហ៊ុន មុននឹងសម្រេចចិត្តវិនិយោគប្រកបដោយទំនុកចិត្ត។ ឯកឧត្តម បានបន្តថា ការរៀបចំកម្មវិធីបែបនេះ នឹងធ្វើឲ្យវិនិយោគិនអាចសម្រេចចិត្តបានកាន់តែល្អប្រសើរក្នុងការវិនិយោគ ពិសេសពាក់ព័ន្ធនឹងវិនិយោគរយៈពេលវែង។
ឯកឧត្តមប្រតិភូ បានគូសបញ្ជាក់ថា ទីផ្សារមូលបត្រមួយអាចដំណើរការទៅបានល្អ តម្រូវឲ្យមានទាំងក្រុមហ៊ុនចុះបញ្ជីល្អៗ និងវិនិយោគប្រកបដោយចំណេះដឹង និងព័ត៌មាន។ ជាក់ស្តែង ដូចក្នុងពេលនេះ ផ្សារមូលបត្រកម្ពុជាកំពុងតែបន្ថែមចំណេះដឹង និងព័ត៌មានល្អៗជូនវិនិយោគិនដើម្បីឲ្យវិនិយោគិនកាន់តែមានទំនុកចិត្ត និងអាចធ្វើការសម្រេចចិត្តដោយខ្លួនឯង។
លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានមានប្រសាសន៍ថា គិតមកដល់ពេលនេះ អេស៊ីលីដា បានបោះផ្សាយលក់មូលបត្រកម្មសិទ្ធិ និងចុះបញ្ជីភាគហ៊ុននៅផ្សារមូលបត្រកម្ពុជា មានរយៈពេល ៤ឆ្នាំហើយ ដែលមានការចូលរួមពីវិនិយោគិនសរុបចំនួនជាង ២,០០០នាក់ ដោយកាន់កាប់ភាគហ៊ុនចំនួនជាង ៤,៣លានភាគហ៊ុន នៃភាគហ៊ុនសរុបរបស់ធនាគារ អេស៊ីលីដា។ លោកបន្ថែមថា ក្នុងនាមជាក្រុមហ៊ុនបោះផ្សាយលក់មូលបត្រកម្មសិទ្ធិ ធនាគារ អេស៊ីលីដា នៅតែប្តេជ្ញារក្សាស្តង់ដារខ្ពស់បំផុត ក្នុងការប្រតិបត្តិអភិបាលកិច្ចសាជីវកម្ម និងការរក្សាតម្លាភាព ដើម្បីធានាថាភាគីពាក់ព័ន្ធទាំងអស់នឹងទទួលបានព័ត៌មានធនាគារ និងអត្ថប្រយោជន៍ផ្សេងៗ ដូចៗគ្នាប្រកបដោយប្រសិទ្ធភាព ដូចជា ការជូនដំណឹងអំពី ផែនការយុទ្ធសាស្ត្រ របាយការណ៍ហិរញ្ញវត្ថុ ភាគលាភ និងគំនិតផ្តួចផ្តើមសំខាន់ៗ របស់ធនាគារ។
គិតត្រឹមដំណាច់ខែមិថុនា ឆ្នាំ២០២៤ វិនិយោគិន របស់ធនាគារ អេស៊ីលីដា កើនឡើងចំនួនជាង ១ម៉ឺន ៨ពាន់នាក់ ស្មើនឹង ជាង៣៥% នៃចំនួនវិនិយោគិនសរុបនៅផ្សារមូលបត្រកម្ពុជា ខណៈភាគហ៊ុនដែលកំពុងជួញដូរនៅលើទីផ្សារមូលបត្រកម្ពុជា មានចំនួន ៧៦លានភាគហ៊ុន នៃភាគហ៊ុនសរុបរបស់ធនាគារ អេស៊ីលីដា ចំនួន ៤០០លានភាគហ៊ុន។ ដោយឡែក គិតត្រឹមត្រីមាសទី២ ឆ្នាំ២០២៤ ទំហំមូលធនូបនីយកម្មទីផ្សារសរុបមានតម្លៃប្រហែល ១១,២២ ប៊ីលានរៀល ស្មើនឹងប្រមាណ ២.៧៣ពាន់លានដុល្លារអាមេរិក ឬស្មើនឹង ៨,៧៥% ធៀបនឹងផលិតផលក្នុងស្រុកសរុប៕ អត្ថបទ ឈិត បូរ៉ាវី

-
ព័ត៌មាន1 day ago
ចិនសន្យាពូនជ្រំទំនាក់ទំនងកម្ពុជាឱ្យដល់កម្រិតមួយទៀត និងជួយលើកមុខមាត់កម្ពុជាទាំងក្នុងថ្នាក់តំបន់ និងពិភពលោក
-
ព័ត៌មាន1 week ago
សម្ដេចធិបតីឱ្យសមត្ថកិច្ចពាក់ព័ន្ធតាមច្រកទ្វារព្រំដែនកម្ពុជា-ថៃយកចិត្តទុកដាក់សម្រួលដល់ពលរដ្ឋមកស្រុកកំណើត
-
ព័ត៌មាន1 day ago
នាវាកងស្វ័យការពារជើងទឹកជប៉ុន ពីរគ្រឿង ចូលសំចតទស្សនកិច្ចនៅកម្ពុជា
-
ព័ត៌មាន3 days ago
សម្ដេចតេជោ ហ៊ុន សែន ទទួលជួបសម្តែងការគួរសមជាមួយឯកឧត្តម ស៊ី ជីនពីង
-
ព័ត៌មាន3 days ago
សង្ក្រាន្តស្វាយរៀងរយៈពេល៣ថ្ងៃមានភ្ញៀវទេសចរនិងពលរដ្ឋជាង៦សែននាក់បានចូលមកលេងកម្សាន្តនៅក្នុងភូមិសាស្ត្រខេត្ត
-
ព័ត៌មាន1 week ago
កម្មករ កម្មការិនីជាង ២ពាន់នាក់ ជួបប្រជុំគ្នាដើម្បី អបអរឆ្នាំថ្មីប្រពៃណីជាតិ មុនឈប់សម្រាកពីការងារ
-
ព័ត៌មាន3 days ago
ខេត្តតាកែវទទួលបានភ្ញៀវទេសចរជាតិ និងអន្តរជាតិជាង១លាន៧សែន ក្នុងឱកាសបុណ្យចូលឆ្នាំថ្មី
-
ព័ត៌មាន1 day ago
ចិនគាំទ្រការធ្វើទំនើបកម្មផ្លូវដែកកម្ពុជា ដើម្បីជំរុញការតភា្ជប់ការដឹកជញ្ជូនកម្ពុជា-ចិន និង ប្រទេសក្នុងតំបន់