យុវជនបន្តចុះឈ្មោះទៅទស្សនកិច្ចតំបន់ព្រំដែនដើម្បីសិក្សាស្វែងយល់ពីភាពជាក់ស្ដែងនៅទីនោះ

ចំនួនយុវជនជាច្រើនបានបន្តចុះឈ្មោះដើម្បីទៅបំពេញទស្សនកិច្ចនៅតំបន់ព្រំដែនភូមិភាគឦសាន ដែលរាជរដ្ឋាភិបាលបានរៀបចំឡើង។ ការចុះឈ្មោះរបស់ក្រុមយុវជន ពិសេស​សិស្ស​និស្សិត​នេះ គឺធ្វើឡើងក្នុងគោលដៅរួម គឺទៅសិក្សា ទៅមើលពីភាព​ជាក់​ស្ដែង​ដែល​កំពុ​ង​កើតមានឡើងនៅតំបន់ទាំងនោះ។

ត្រឹមរយៈពេលប៉ុន្មានថ្ងៃ នៃការបើកចុះឈ្មោះទៅទស្សនកិច្ចនៅតំបន់ព្រំដែនភូមិភាគឦសាន ប្រជា​ពលរដ្ឋកម្ពុជា ជាច្រើនរយនាក់បានចុះឈ្មោះរួចរាល់ និងមានប្រជាពលរដ្ឋ​ជា​ច្រើន​ទៀត​កំពុង​ផុស​ផុលចុះឈ្មោះជាបន្តបន្ទាប់។ សម្រាប់ដំណើរទស្សនកិច្ចនេះ ក៏ទទួលបាន​ការ​ចាប់​អារម្មណ៍​ច្រើន ពីក្រុមយុវជន ពិសេសសិស្សនិស្សិតផងដែរ។ ជាក់ស្ដែង ក្រុមនិស្សិត​សិក្សា​នៅ​សាកលវិ​ទ្យា​ភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានបបួលគ្នាចុះឈ្មោះទៅ​ទស្សន​កិច្ច​នៅតំ​បន់​ព្រំដែនភូមិភាគឦសាន។

ក្រុមនិស្សិតលើកឡើងថា ពួកគេចង់ទៅទស្សនកិច្ចនេះ ដើម្បីសិក្សា និងពិនិត្យមើល​ពី​ភាព​ជាក់​ស្ដែង ពីការរីកចម្រើនពីហេដ្ឋារចនាសម្ព័ន្ធ ពីជីវភាពរស់នៅរបស់ប្រជាពលរដ្ឋ ពិសេស​គឺ​បង្គោល​ព្រំដែន​។ ទន្ទឹមការត្រៀមទៅទស្សនកិច្ចនេះពួកគេក៏សំណូមពរទៅយុវជនដទៃ ដែលនៅ​តែ​មាន​មន្ទិល​សង្ស័យ​នានាសូមចុះឈ្មោះដើម្បីទៅពិនិត្យមើលផ្ទាល់ដោយខ្លួនឯ។

ឯកឧត្តម ទេព អស្នារិទ្ធ អ្នកនាំពាក្យក្រសួងព័ត៌មាន ជាក្រសួងសាម៉ី ក្នុង​ការ​រៀបចំ​ដំណើរ​ទស្សន​កិច្ច​នេះ បានលើកឡើងកាលពីថ្ងៃទី៣ ខែកញ្ញាថា ចំនួនអ្នកចុះឈ្មោះរួចរាល់មានរហូតដល់ជាង ៧០០នាក់ ហើយការទៅទស្សនកិច្ចជើងដំបូង នឹងប្រព្រឹត្តិទៅនៅថ្ងៃទី ៧ ខែកញ្ញា ចុងសប្ដាហ៍​នេះ​។

កម្មវិធីដំណើរទស្សនកិច្ចទៅកាន់ទិសឦសាន្តនេះ ធ្វើឡើងនៅ​រៀង​រាល់​ចុង​សប្តាហ៍​ថ្ងៃ​សៅរ៍​ចាប់​ពី​ថ្ងៃ​ទី​៧ ខែកញ្ញាតទៅ រហូតដល់ដំណាច់ឆ្នាំ២០២៤។ ការធ្វើដំណើរទស្សនកិច្ច នឹងរៀបចំឡើង មួយ​លើកចំនួន២០០នាក់ ដោយនឹងមានផ្តល់ការធ្វើដំណើរ ផ្តល់ម្ហូបអាហារ និងការ​ស្នាក់​នៅ​ដោយ​មិន​គិតថ្លៃ៕ អត្ថបទ៖ គឹម ហុក