លោកគ្រូ-អ្នកគ្រូសាលាបឋមអនុវត្ត បង្កើតបំណិនជីវិតសម្រាប់សិស្សានុសិស្ស ឱ្យចេះដាំដុះ ចេះលក់ដូរ និងកែច្នៃសម្ភារៈអាចរកកម្រៃបាន

ព្រះវិហារ៖ នៅព្រឹកថ្ងៃទី០៥ ខែកញ្ញា ឆ្នាំ២០២៤ សិស្សានុសិស្សក្រោយពីមានការយកចិត្តទុក្ខដាក់ពីនាយិកា និងលោកគ្រូ អ្នកគ្រូ បានបង្កើតបំណិនជីវិតសម្រាប់សិស្សានុសិស្ស ឱ្យចេះដាំដុះ ចេះលក់ដូរ និងកែច្នៃសម្ភារៈផ្សេងៗអាចរកកម្រៃបាន ដែលទទួលផលពីការដាំបន្លែ និងរបស់កែច្នៃដោយដៃ បានយកមកដាក់លក់នៅមុខសាលា ។

សិស្សានុសិស្សនៅសាលាបឋមអនុវត្ត បានសម្តែងនៅភាពសប្បាយរីករាយ ដោយពួកគាត់​បាន​ចេះដាំបន្លែ និងចេះលក់ដូរដោយខ្លួនឯង សប្បាយផង រកថវិកាបានផង ដោយមួយចំណែក​ទុកទិញ​របស់សិក្សា និងមួយចំណែកទៀត ទុកជួយដល់សិស្សក្រីក្រក្នុងសាលារបស់ពួកគាត់ ហើយពួកគាត់​យកចំណេះដឹងទាំងនេះយកទៅអនុវត្តនៅផ្ទះ ឬចំការរបស់ពួកគាត់ដោយកាត់​បន្ថយ​ក្នុងការចំណាយ និងបន្លែគ្មានជាតិគីមី។ ដោយពួកគាត់បានសម្ដែងនូវមតិស្រដៀងៗគ្នា។

អាណាព្យាបាលសិស្ស បានលើកឡើងថា សាលាបានរៀបចំឱ្យមានបំណិនជីវិត គឺមាន​សារៈសំខាន់ណាស់​សម្រាប់​សិស្សានុសិស្ស​ ដោយឱ្យពួកគាត់យល់ដឹងនៅតម្លៃ និងពេលវេលា របស់ពួកគាត់ ហើយជាពិសេសគឺការដាំបន្លែគ្មានជាតិគីមី ក៏ជាសារៈសំខាន់សម្រាប់គ្រួសារ និងមនុស្សទូទាំងប្រទេសយើងទាំងមូល។

លោកស្រី រស់ ស៊ីថា នាយិកាសាលាបឋមសិក្សាអនុវត្តន៍ បានឱ្យដឹងថា សាលាបានបង្កើត​ឱ្យ​មានបំណិនជីវិត ​គឺគោលបំណងសម្រាប់​សិស្សានុសិស្ស ឱ្យចេះដាំដុះបន្លែធម្មជាតិ ​គ្មានជាតិគីមី និង​របស់កែច្នៃសម្ភារៈផ្សេងៗ ដែលអាចរកកម្រៃបាន គោលបំណងសំខាន់​នោះ​ មិនត្រឹមតែឱ្យគាត់ចេះដាំបន្លែនោះទេ គឺបាន​បង្ហាត់បង្រៀន​ឱ្យគាត់​ចេះលក់ដូរ និង​ក្រោយពី​សម្រាកពីការសិក្សា អាចឆ្លៀត​ដាំបន្លែនៅផ្ទះ​បានថែមទៀតផង។ ដោយថវិកា​ដែលទទួល​បានពី​ការលក់ដូរ ប្រគល់​ជូន​ពួកគាត់​សម្រាប់ទិញ​សម្ភារៈសិក្សា និងជួយ​ដល់សិស្សក្រីក្រ​ដែលមាន​ជីវភាព​ខ្វះខាត់ដែលសិក្សានៅសាលាអនុវត្តនេះផងដែរ ៕