កម្ពុជាទទួលបានហិរញ្ញប្បទាន ២លានដុល្លារ ពីមូលនិធិពិសេសសម្រាប់គម្រោង​កិច្ចសហប្រតិបត្តិការមេគង្គ-ឡានឆាង

ក្រសួងការបរទេស និងកិច្ចសហប្រតិបត្តិការអន្តរជាតិ និងស្ថានទូតចិន ប្រចាំកម្ពុជា បានរៀបចំពិធីចុះហត្ថលេខាលើកិច្ចព្រមព្រៀង ស្ដីពីមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ ២០២៤។ ការចុះហត្ថលេខានេះ កម្ពុជាទួលបានហិរញ្ញប្បទានជាសាច់ប្រាក់ចំនួន ២លានដុល្លារសម្រាប់អនុវត្តលើគម្រោងចំនួន ៨ផ្សេងគ្នា។

ហិរញ្ញប្បទាននេះ ទទួលបានតាមរយៈការចុះហត្ថលេខារួមគ្នា រវាង ឯកឧត្តម ឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស និងវត្តមានឯកឧត្តម វ៉ាង វិនពីន ( Wang Wenbin) ឯកអគ្គរដ្ឋទូត សាធារណរដ្ឋចិនប្រចាំកម្ពុជា ដែលធ្វើឡើងនៅថ្ងៃទី ៥ ខែកញ្ញា ឆ្នាំ ២០២៤នេះ។

សម្រាប់ហិរញ្ញប្បទានចំនួន ២លានដុល្លារនេះ គឺនឹងប្រើប្រាស់សម្រាប់ការអនុវត្តលើគម្រោងចំនួន ៨ ក្នុងនោះរួមមាន ផ្នែកទេសចរណ៍ សកម្មភាពដោះមីន កសិកម្ម អភិវឌ្ឍន៍ជនបទ ការលើកកម្ពស់ការយល់ដឹងពីកិច្ចសហប្រតិបត្តិការមេគង្គ-ឡានឆាង ការជំរុញសេដ្ឋកិច្ចក្នុងតំបន់ ការអប់រំបណ្ដុះបណ្ដាលបច្ចេកទេស និងវិជ្ជាជីវៈ ក៏ដូចជាការកសាងសមត្ថភាព និងការគ្រប់ហានិភ័យទឹកជំនន់។

ក្នុងពិធីចុះហត្ថលេខានេះ ឯកឧត្តមឧបនាយករដ្ឋមន្ត្រី សុខ ចិន្តាសោភា បានលើកឡើងជាការអរគុណ ដល់រាជរដ្ឋាភិបាល ក៏ដូចជាប្រជាពលរដ្ឋចិន ដែលបានបន្តជួយគាំទ្រដល់កម្ពុជា ក៏ដូចជាប្រទេសជាសាមាជិក នៃកិច្ចសហប្រតិបត្តិការ មេគង្គ-ឡានឆាង។ ឯកឧត្តម លើកឡើងដែរថា ការផ្ដល់ហិរញ្ញប្បទាននាពេលនេះ គឺមានសារៈសំខាន់សម្រាប់កម្ពុជា។ ពិសេសគឺផ្តោតលើវិស័យ ដែលមានភាពចាំបាច់សម្រាប់កម្ពុជាផងដែរ។

ក្រោយចុះហត្ថលេខារួចរាល់ ឯកឧត្តម ឯកអគ្គរដ្ឋទូត វ៉ាង វិនពីន បានលើកឡើងជារួមថា កិច្ចសហប្រតិបត្តិការមេគង្គ-ឡានឆាង ដែលបានក្លាយទៅជា វេទិការមាស សម្រាប់កិច្ចសហប្រតិបត្តិក្នុងតំបន់ នឹងបន្តអភិវឌ្ឍនិងផ្ដល់អត្ថប្រយោជន៍ដល់ប្រទេសជាសមាជិកលើវិស័យជាច្រើនទៀតនាពេលអនាគត។

ក្នុងរយៈពេល ៧ឆ្នាំកន្លងមកនេះ មូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ- ឡានឆាង បានផ្តល់ហិរញ្ញប្បទានដល់គម្រោងប្រមាណ ៩០ នៅកម្ពុជា ដែលបង្ហាញពីការប្តេជ្ញាចិត្ត របស់កម្ពុជា និងចិន ក្នុងការរួមចំណែកដល់ការកសាងសហគមន៍វាសនារួមនៃសន្តិភាព វិបុលភាព និង ការអភិវឌ្ឍប្រកបដោយចីរភាព សម្រាប់បណ្តាប្រទេសមេគង្គ-ឡានឆាងទាំងអស់៕ អត្ថបទ៖ គឹម ហុក