ឯកឧត្តម ហ៊ុន ម៉ានី ដឹកនាំកិច្ចប្រជុំលេខាធិការដ្ឋាន គ.វ.រ. លើកទី៣ ដើម្បីពិនិត្យ និង​ពិភាក្សា​លើ​ឯកសារបទដ្ឋានគតិយុត្តចំនួន២

ក្នុងក្របខណ្ឌ លេខាធិការដ្ឋាន គណៈកម្មាធិការជាតិ​ជំរុញ​ការ​អនុវត្ត​វិធាន​ការ​គន្លឹះ​ក្នុង​ការ​កែ​ទម្រង់​រដ្ឋបាលសាធារណៈ របស់រាជរដ្ឋាភិបាល នីតិកាលទី៧ នៃរដ្ឋសភា (គ.វ.រ.) ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការគ.វ.រ. កំពុង​ដឹក​នាំ​កិច្ចប្រជុំលេខាធិការរដ្ឋាន គ.វ.រ. លើកទី៣ ដើម្បីពិនិត្យ និងពិភាក្សា​លើ​បទ​ដ្ឋាន​គតិ​យុត្ត​ចំនួន​២។​

លិខិតបទដ្ឋានគតិយុត្តចំនួន២នោះរួមមាន៖ (១) សេចក្តីព្រាងព្រះរាជក្រឹត្យ ស្តីពី​គោល​ការណ៍​រួម​នៃ​ការជ្រើសរើស និងការគ្រប់គ្រងមន្រ្តីផ្អែកលើកិច្ចព្រមព្រៀងការងារ ដែលជា​ផ្នែក​មួយ​នៃ​វិធាន​ការ​គន្លឹះទី១ ក្នុងការកែលម្អប្រព័ន្ធជ្រើសរើសមន្រ្តី។

ទី(២) សេចក្តីព្រាងអនុក្រឹត្យ ស្តីពីគោលការណ៍ និងនីតិវិធីនៃការតែងតាំង ផ្លាស់ប្តូរ និងការ​បញ្ចប់​មុខ​តំណែងនាយក នៅគ្រឹះស្ថានសិក្សាមត្តេយ្យសាធារណៈ និងគ្រឹះស្ថាន​បឋម​សិក្សា​សាធារណៈ ដែលជាផ្នែកមួយនៃវិធានការគន្លឹះទី២ ក្នុងការពង្រឹងសមត្ថភាព និង​សមិទ្ធកម្ម​ស្ថាប័ន។

កិច្ចប្រជុំថ្ងៃនេះ មានការអញ្ជើញចូលរួម ឯកឧត្តម លោកជំទាវ រដ្ឋមន្ត្រី ជាប្រធានស្ថាប័ន និង​តំណាង​ក្រសួង ស្ថាប័ន រដ្ឋមន្ត្រីប្រតិភូអមនាយករដ្ឋមន្ត្រី អភិបាល នៃគណៈអភិបាល រាជធានី ខេត្ត និងមន្ត្រីរាជការ ក្រុមការងារបច្ចេកទេស ប្រមាណ១០០រូប។

គួររម្លឹកថា ក្នុងរាជរដ្ឋាភិបាល នីតិកាលទី៧ នៃរដ្ឋសភា លេខាធិការដ្ឋាន គ.វ.រ. រៀបចំ​កិច្ច​ប្រជុំ​ចំនួន​២ លើករួចមកហើយ។ កិច្ចប្រជុំលើកទី១ គឺជាការ​ប្រមូល​ធាតុ​ចូល​លើ​សេចក្តី​ព្រាង​ផែន​ការ​សកម្មភា​ពវិធានការគន្លឹះ ក្នុងការកែទម្រង់រដ្ឋបាលសាធារណៈ កាលពីថ្ងៃទី៨ ខែមេសា ឆ្នាំ​២០២៤។ កិច្ចប្រជុំលើកទី២ គឺជា​កិច្ច​ប្រជុំ​ពិភាក្សា​ពិគ្រោះយោ​បល់​លើ​ដំណើរ​ការ​នៃ​ការ​ពិនិត្យ​ឡើង​វិញ និងការវិភាគមុខងារ និងរចនាសម្ព័ន្ធក្រសួង ស្ថាប័ន និងការធ្វើ​បច្ចុប្បន្ន​ភាព​ទិន្នន័យ​មន្ត្រីរា​ជការស៊ីវិល៕