អាជ្ញាធរស្រុកអន្លង់វែង កសាងស្ពានឈើមួយខ្សែប្រវែង៣០ម៉ែត្រ ដើម្បីសម្រួលដល់ការធ្វើដំណើរជូនពលរដ្ឋក្នុងភូមិរំចេក

ឧត្តរមានជ័យ​៖ លោក ងួន ទ្ធីរិទ្ធ អភិបាលស្រុកអន្លង់វែង សហការជាមួយកម្លាំងបងប្អូនប្រជាពលរដ្ឋ ក្នុងមូលដ្ឋាន បានធ្វើការកសាងស្ពាន ឈើមួយខ្សែប្រវែង៣០ម៉ែត្រ នៅចំណុចភូមិរំចេក ស្រុកអន្លង់វែង ខេត្តឧត្តរមានជ័យ ​ដើម្បីជួយ​សម្រួល​ដល់​ការ​ធ្វើ​ចរាចរ​ផ្សេងៗ​ក្នុង​ការ​ធ្វើដំណើរ​របស់​ប្រជាពលរដ្ឋ ក្នុងមូលដ្ឋានឲ្យមានភាពល្អប្រសើរ។

លោកអភិបាលស្រុកអន្លង់វែង បានឲ្យដឹងថា ដើម្បីឆ្លើយតបតាម​តម្រូវ​ចាំបាច់​កន្លងមក តាមរយៈការធ្វើវេទិការសាធារណៈរបស់ក្រុមការងាររាជរដ្ឋាភិបាលម្ពុជា ចុះមូលដ្ឋានខេត្ត​ឧត្តរមានជ័យ ​រដ្ឋបាលស្រុកអន្លង់វែង បាន​ធ្វើការ​ដោះស្រាយបញ្ហា​ប្រឈមនានា​របស់ប្រជាពលរដ្ឋក្នុងមូលដ្ឋាន​នានា​បានជាង៩០ភាគរយ​នូវបញ្ហាទុក្ខកង្វល់រប​​ស់ប្រជាពលរដ្ឋក្នុងស្រុកអន្លង់វែង។

លោកអភិបាលស្រុកអន្លង់វែង បានបន្តថា ​ជាក់ស្តែងស្ពាន​ឈើមួយខ្សែថ្មីមួយ​កន្លែងទៀត​ក្នុង​ចំណុច​​ភូមិរំចេកដែលកន្លងមក ស្ពាននេះ ​មាន​សភាព​ចាស់​បាក់​ទ្រុឌទ្រោម​ពុំអាច​ធ្វើ​ដំណើរ​ឆ្លងកាត់​បាន​បច្ចុប្បន្ន​ត្រូវបានរដ្ឋបាល​ស្រុក​អន្លង់វែង ​ធ្វើការកសាង​ដោយ​មាន​ការជួយ​ឧបត្ថម្ភ​ថវិកាមួយចំនួនពី​ឯកឧត្ត មាន ចាន់យ៉ាដា ​អភិបាលខេត្តឧត្តរមានជ័យ​ ផងនោះ​បាន​ធ្វើ​ឲ្យ​ដំណើរ​ការ​កសាងស្ពាន​ឈើមួយកន្លែងនេះ អាចនឹង​រួចរាល់​ចប់ជាស្ថាពរ នៅដើមខែតុលា ឆ្នាំ២០២៤ខាងមុខនេះ៕