អនុប្រធានទី១រដ្ឋសភា៖ រដ្ឋសភាកម្ពុជាកំពុងខិតខំពង្រីកការទូតសភាដើម្បីថែរក្សា និងលើកកម្ពស់​សន្តិភាពពិភពលោក

ភ្នំពេញ៖ ឯកឧត្តមកិត្តិសេដ្ឋាបណ្ឌិត ជាម យៀប ប្រធាន អនុប្រធានទី១រដ្ឋសភា បានថ្លែងថា រដ្ឋសភាកម្ពុជា បាននិងកំពុងខិតខំពង្រឹង និងពង្រីកទំនាក់ទំនងនូវការទូតសភា ដើម្បីចូលរួមថែរក្សា និងលើកកម្ពស់សុខសន្តិភាពក្នុងតំបន់ និងពិភពលោក ។

នៅក្នុងជំនួបជាមួយឯកឧត្តម កាណាត់ ខេទូមីសហ្ស ឯកអគ្គរដ្ឋទូតកាហ្សាក់ស្ថានប្រចាំកម្ពុជា នៅថ្ងៃទី៣០ ខែតុលា ឆ្នាំ២០២៤ កិត្តិសេដ្ឋាបណ្ឌិត ជាម យៀប មានប្រសាសន៍ថា រដ្ឋសភាកម្ពុជា​នឹងរៀបចំកិច្ចប្រជុំពេញអង្គ នៃសភាអន្តរជាតិ ដើម្បីភាពអត់ឱន និងសន្តិភាព (IPTP) លើកទី១១ ចាប់ពីថ្ងៃទី២៣ ដល់ថ្ងៃទី២៦ ខែវិច្ឆិកា ឆ្នាំ២០២៤ ដោយនឹងមានការអនុម័តលើធម្មនុញ្ញសន្តិភាព ដែលត្រូវបានបង្កើតឡើង ដើម្បីពង្រឹងនូវសាមគ្គីភាព និងភាពជាដៃគូជាសកល ដើម្បីសន្តិភាព សុខដុមរមនា សេចក្តីថ្លៃថ្នូរ និងភាពរុងរឿងសម្រាប់មនុស្សជាតិ ។

ឯកឧត្តម បានបន្តថា សភាកម្ពុជាបាន និងកំពុងបន្តពង្រឹង និងពង្រីកទំនាក់ទំនងការទូតសភា តាមរយៈសកម្មភាពចូលរួម និងទទួលរៀបចំធ្វើជាម្ចាស់ផ្ទះ នៃវេទិកាសភាអន្តរជាតិនានា សំដៅ​រួមចំណែកលើកកំពស់ ថែរក្សាសន្តិភាព ស្ថិរភាព និងការអភិវឌ្ឍនៅក្នុងតំបន់ និងសកលលោក ។

ក្នុងនោះដែរ ឯកឧត្តមអនុប្រធានទី១រដ្ឋសភា បានអញ្ជើញថ្នាក់ដឹកនាំ សភាកាហ្សាក់ស្ថាន ឬតំណាង ព្រមទាំងទូតប្រចាំកម្ពុជា ចូលរួមក្នុងសម័យប្រជុំដ៏មានសារៈសំខាន់នេះ និងស្នើសុំសភាកាហ្សាក់ស្ថាន គាំទ្រលើធម្មនុញ្ញសន្តិភាពនេះ ដើម្បីសន្តិភាព និងវិបុលភាព នៃប្រជាជាតិក្នុងតំបន់ និងពិភពលោក ។

ជាមួយនេះ ឯកឧត្តមកិត្តិសេដ្ឋាបណ្ឌិត បានអបអរជើងហោះហើរត្រង់ពីកាហ្សាក់ស្ថាន មកកាន់ខេត្តព្រះសីហនុ ដោយក្នុងរយៈពេល ៤ថ្ងៃកន្លងទៅ គឺចាប់ពីថ្ងៃទី២៥ ដល់២៩ ខែតុលា ឆ្នាំ២០២៤ កម្ពុជាបានទទួលភ្ញៀវទេសចរកាហ្សាក់ស្ថានចំនួន ១៥០នាក់ ក្នុងមួយថ្ងៃ និងបន្តទៅខែវិច្ឆិកា ឆ្នាំ២០២៤ខាងមុខ នឹងមានការហោះហើរត្រង់យ៉ាងតិច ៣ជើង ក្នុង១សប្តាហ៍ ដែលនេះ ជាដំណឹងដ៏រីករាយ និងជាសញ្ញាដ៏ប្រសើរបំផុតចំពោះចំណងមិត្តភាព នៃប្រទេសយើងទាំងពីរ ។

ដោយសារទំហំពាណិជ្ជកម្មរវាងប្រទេសទាំងពីរ នៅមានកំរិតនោះ ឯកឧត្តម ជាម យៀប បាន​ស្នើទៅ​កាន់កាហ្សាក់ស្ថាន តាមរយៈអង្គទូតប្រចាំកម្ពុជា បន្តជួយទាក់ទាញអ្នកវិនិយោគ​កាហ្សាក់ស្ថាន មកសិក្សាលើការនាំយកផលិផលពីកម្ពុជា មានអង្ករ និងស្វាយចន្ទីរជាដើម ទៅកាន់ ទីផ្សារកាហ្សាក់ស្ថាន ក៏ដូចជាតំបន់អាស៊ីកណ្តាលផងដែរ ។ ក្នុងឱកាសនោះ ឯកឧត្តមអគ្គរដ្ឋទូត បានវាយតម្លៃខ្ពស់ ចំពោះទំនាក់ទំនងកិច្ចសហប្រតិបត្តិការទូតរវាងកម្ពុជា-កាហ្សាក់ស្ថាន ក្នុងរយៈពេល៣០ឆ្នាំកន្លងទៅនេះ ដោយមានការទុកចិត្តគ្នា ការគាំទ្រ និងការផ្តល់ផល​ប្រយោជន៍​ដល់គ្នាទៅវិញទៅមក ដោយកាហ្សាក់ស្ថាន តែងតែចាត់ទុកកម្ពុជា ជាដៃគូដ៏ល្អប្រសើរមួយនៅក្នុងតំបន់អាស៊ីអាគ្នេយ៍ ។

ឯកឧត្តម បានបញ្ជាក់ថា ​កន្លងមកប្រទេសយើងទាំងពីរតែងគាំទ្រគ្នា ក្នុងកម្រិតអង្គការ​អន្តរជាតិ​ដូចជា អង្គការសហប្រជាជាតិ សន្និសីទស្តីពីអន្តរកម្ម និងវិធានការកសាងទំនុកចិត្តអាស៊ី វេទិកា​អាស៊ីអឺរ៉ុប និងសមាគមអាស៊ាន ផងដែរ ។

ឯកឧត្តមឯកអគ្គរដ្ឋទូត បានបន្តទៀតថា កាហ្សាក់ស្ថាន នឹងពង្រីកទំនាក់ទំនងជាមួយប្រទេសកម្ពុជា ដែលជាដៃគូដ៏ល្អ ​និងជាមួយបណ្តាប្រទេសអាស៊ីអាគ្នេយ៍ដទៃទៀត លើវិស័យសេដ្ឋកិច្ច ពាណិជ្ជកម្ម ការវិនិយោគ ទំនាក់ទំនងនយោបាយ និងវប្បធម៌ជាដើម ដែលប្រទេសកាហ្សាក់ស្ថាន មន​សក្តានុពល​ក្នុងវិស័យកសិកម្ម រ៉ែ ថាមពល និងហេដ្ឋរចនាសម្ព័ន្ធដឹកជញ្ចូន ៕ អត្ថបទ បាន សុខរិទ្ធិ