អ្នកនាំពាក្យក្រសួងអប់រំ៖ សិស្សជាប់បាក់ឌុបច្រើន ដោយសារកត្តាសិស្ស គ្រូ និងការធ្វើ​កំណែទម្រង់

លទ្ធផលប្រឡងបាក់ឌុប ក្នុងឆ្នាំ ២០២៤នេះ បានបង្ហាញថាសិស្សប្រឡងជាប់បាក់ឌុប មាន​ចំនួន​រហូតដល់ ១០៦ ៣៥១នាក់ ស្មើនឹង ៧៩ភាគរយ នៃចំនួនបេក្ខជនចូលរួមប្រឡង។ ចំនួន​សិស្សជាប់យ៉ាងច្រើននេះ ក្រសួងអប់រំ យុវជន និងកីឡា តាមរយៈអ្នកនាំពាក្យបានបញ្ជាក់ថា ភាព​ជោគ​ជ័យនេះ បានដោយសារការប្រឹងប្រឹងរបស់សិស្ស ការប្រឹងប្រែងគ្រូបង្រៀន គណៈគ្រប់​គ្រង​សាលា និងកត្តាកំណែទម្រង់ចាប់ពីថ្នាក់ក្រសួង រហូតដល់កំណែទម្រង់តាមសាលារៀន។

ការប្រឡងបាក់ឌុប ក្នុងឆ្នាំសិក្សា ២០២៣-២០២៤ បានបង្ហាញ នូវលទ្ធផលយ៉ាងគាប់ប្រសើរ ដែល​មានចំនួនសិស្សជាប់រហូតដល់ ៧៩ភាគរយ។ ចំនួនសិស្សជាប់ក្នុងឆ្នាំនេះ ជាចំនួន​កើន​ឡើង​បើ​ធៀប​នឹងការប្រឡងបាក់ឌុប កាលពីឆ្នាំមុន។ សិស្សជាប់បាក់ឌុប ក្នុងឆ្នាំសិក្សា ២០២៣ កន្ល​ង​ទៅមានត្រឹមតែ ៧២ភាគរយប៉ុណ្ណោះ។

សម្រាប់លទ្ធផលជាប់បាក់ឌុបច្រើនក្នុងឆ្នាំសិក្សានេះ លោកស្រី ឃួន វិច្ឆិកា អ្នកនាំ​ពាក្យ​ក្រសួង​អប់រំ យុវជន និងកីឡា លើកឡើងនូវកត្តាសំខាន់ចំនួន ៣ដែល រុញច្រាន​លទ្ធផល​ប្រឡង​បាក់​ឌុប​មាន​ភាព​ប្រសើរដូចនេះ។ កត្តាសំខាន់ដំបូង គឺជាការប្រឹងប្រែងរបស់សិស្ស គណៈគ្រប់​គ្រង​សាលា និងលោកគ្រូ អ្នកគ្រូ ដែលបង្រៀនកូនសិស្សដោយផ្ទាល់។

អ្នកនាំពាក្យក្រសួងអប់រំ លើកឡើងនូវកត្តាសំខាន់មួយទៀត គឺការធ្វើកំណែទម្រង់ ដែល​ចាប់​រាប់​ពី​ការ​ធ្វើ​កំណែទម្រង់នៅថ្នាក់ក្រសួង រហូតដល់ការធ្វើកំណែទម្រង់នៅកម្រិតសាលារៀន។ លោក​ស្រី​អ្នក​នាំ​ពាក្យបញ្ជាក់ថា កត្តាសំខាន់ទាំងនេះហើយ ដែលបានរុញ​ច្រាន​នូវ​លទ្ធផល​ប្រឡង​បាក់ឌុប ​ទៅកាន់ភាពប្រសើរបែបនេះ។

គួរឱ្យចាប់អារម្មណ៍ផងដែរ សម្រាប់សិស្សដែលដឹងលទ្ធផលបាក់ឌុបភ្លាមៗ បាន​បង្ហាញ​នូវ​ក្ដី​រីករាយ ដោយភ្ជាប់ជាមួយគោលដៅច្បាស់លាស់ ក្នុងការសិក្សាមុខជំនាញបន្ត។

គួររំលេចឱ្យដឹងដែរថា បច្ចុប្បន្ននេះសិស្សភាគច្រើនជ្រើសរើសថ្នាក់សង្គម។ ចំនួន​សិស្ស​តិច​តួច​ប៉ុណ្ណោះ ជ្រើសរើសមុខវិជ្ជាវិទ្យាសាស្ត្រ។ ជាក់ស្ដែងសម្រាប់​ការ​ប្រឡង​បាក់​ឌុប​នៅ​ក្នុង​ឆ្នាំ​សិក្សា​នេះ សិស្សជ្រើសរើសថ្នាក់វិទ្យាសាស្ត្រមានចំនួនត្រឹមតែប្រមាណ ៣០ភាគរយប៉ុណ្ណោះ រីឯសិស្ស​ជ្រើស​រើស​ថ្នាក់សង្គមមានរហូតដល់ប្រមាណ ៧០ភាគរយ៕ អត្ថបទ៖ គឹមហុក