ពលរដ្ឋអេស្ប៉ាញ រាប់ម៉ឺននាក់ចេញតវ៉ា ជុំវិញការដោះស្រាយគ្រោះទឹកជំនន់មិនបានល្អ

មនុស្សរាប់ម៉ឺននាក់បានធ្វើបាតុកម្មនៅទីក្រុង វ៉ាលែនសៀ (Valencia) ភាគខាងកើតប្រទេសអេស្ប៉ាញ កាលពីថ្ងៃសៅរ៍ (០៩ វិច្ឆិកា) ជុំវិញការដោះស្រាយដ៏ខ្ជីខ្ជារបស់អាជ្ញាធរក្នុងតំបន់ចំពោះទឹកជំនន់ដ៏បំផ្លិចបំផ្លាញដែលបានសម្លាប់មនុស្សជាង ២២០នាក់ នៅក្នុងគ្រោះមហន្តរាយធម្មជាតិដ៏អាក្រក់បំផុតមួយរបស់អឺរ៉ុបអស់រយៈពេលជាច្រើនទសវត្សរ៍មក។

ក្នុងបាតុកម្មចុងក្រោយបង្អស់ជុំវិញទឹកជំនន់នេះ អ្នកតវ៉ាបានប្រមូលផ្ដុំគ្នាពាសពេញកណ្តាលក្រុង Valencia ទាមទារឲ្យលោក ខាឡូស ម៉ាហ្សុន (Carlos Mazon) លាលែងពីតំណែងមេដឹកនាំរដ្ឋាភិបាលប្រចាំតំបន់ ហើយស្រែកពាក្យតវ៉ាថា “ឃាតករ!” និងមានបដាសរសេរថា “ដៃរបស់យើងប្រឡាក់ដោយភក់ តែដៃរបស់អ្នកប្រឡាក់ដោយឈាម “។ បាតុករខ្លះបោះស្បែកជើងកខ្វក់នៅក្រៅគាររដ្ឋាភិបាល ខណៈខ្លះទៀតគប់ភក់ដាក់ទីនោះ។

ប្រជាពលរដ្ឋនៅតំបន់រងគ្រោះដោយទឹកជំនន់នោះបានចោទលោក Mazon ថាចេញការជូនដំណឹងយឺតពេលនៅម៉ោង ៨យប់ ថ្ងៃទី២៩ ខែតុលា បន្ទាប់ពីទឹកជំនន់ដ៏គំហុកបានហូរចូលក្នុងទីប្រជុំជន និងភូមិជាច្រើនរួចទៅហើយ។ មេដឹកនាំតំបន់ Valencian រូបនេះបានបកស្រាយថា លោកនឹងចេញការជូនដំណឹងឱ្យលឿនជាងនោះ ប្រសិនបើអាជ្ញាធរទទួលបានដំណឹងពីភាពធ្ងន់ធ្ងរនៃស្ថានភាពដោយស្ថាប័នត្រួតពិនិត្យកម្រិតទឹកផ្លូវការ។

ថ្វីត្បិតតែបាតុកម្មភាគច្រើនសន្តិភាពក៏ដោយ ប៉ុន្តែនគរបាលបានប៉ះទង្គិចជាមួយក្រុមបាតុករដែលគប់ដុំថ្ម ហើយវត្ថុផ្សេងទៀតដែលបានគប់ទៅលើអគារក្រុមប្រឹក្សាក្រុងបានបង្កឱ្យខូចខាតបន្តិចបន្តួច។ មនុស្សជិត ៨០នាក់ នៅតែបាត់ខ្លួននៅក្នុងទឹកជំនន់ដែលសម្លាប់មនុស្សច្រើនបំផុតនៅក្នុងប្រទេសអឺរ៉ុបមួយ ចាប់តាំងពីទឹកជំនន់នៅព័រទុយហ្គាល់ ក្នុងឆ្នាំ១៩៦៧ បានសម្លាប់មនុស្សប្រហែល ៥០០នាក់មក៕