ព្រិលធ្លាក់ពាសពេញចក្រភពអង់គ្លេស ខណៈសីតុណ្ហភាពត្រជាក់វាយលុកអឺរ៉ុបក្នុងសប្តាហ៍នេះ

ព្រិលកំពុងគ្របដណ្តប់លើផ្នែកខ្លះនៃទ្វីបអឺរ៉ុប ជាពិសេសនៅសក្រភពអង់គ្លេស ខណៈខ្យល់បក់ពីតំបន់អាក់ទិកនាំមកនូវភាពត្រជាក់ដំបូងក្នុងរដូវរងា ដែលជំរុញឱ្យមានតម្រូវការកម្ដៅនៅទូទាំងតំបន់។

ការព្រមានពណ៌លឿងសម្រាប់ការធ្លាក់ព្រិល និងសំណុំទឹកកក បានធ្វើឡើងសម្រាប់ចក្រភពអង់គ្លេស ដោយការិយាល័យឧតុនិយម បានព្រមានអំពីការរំខានដែលអាចកើតមាននៅលើផ្លូវថ្នល់ និងផ្លូវរថភ្លើងនៅភាគខាងជើងនៃដែនដីអង់គ្លេស និងស្កុតលែន។

ការជូនដំណឹងអំពីព្រិល ក៏នឹងរីករាលដាលដល់ប្រទេសអាល្លឺម៉ង់ ស្វីស និងអ៊ីតាលីនៅចុងសប្តាហ៍នេះ ដោយទីភ្នាក់ងារឧតុនិយម រំពឹងថានឹងមានព្រិលកម្រាស់រហូតដល់ ៧០សង់ទីម៉ែត្រ នៅរយៈកម្ពស់ខ្ពស់ជាងមុន។ ក្រុមអាកាសធាតុអឺរ៉ុប ខនភើនីខឺស (Copernicus) ព្យាករថា ព្រិលធ្លាក់ក៏រាលដាលពាសពេញផ្នែកខ្លះនៃប្រទេសបារាំង ក្នុងប៉ុន្មានថ្ងៃខាងមុខ ហើយរមណីយដ្ឋានជិះស្គីទឹកកកមួយចំនួនដូចជា ឆាម៉ូនីក (Chamonix) អាចនឹងមានព្រិលកម្រាស់ច្រើនជាង ១,៥ម៉ែត្រនៅចុងសប្តាហ៍។

អាកាសធាតុត្រជាក់បែបនេះនឹងបង្កើនតម្រូវការម៉ាស៊ីនកម្ដៅ ដោយបង្ខំឱ្យបណ្តាប្រទេសនៅអឺរ៉ុបមួយចំនួនទាញយកឧស្ម័នបម្រុងមកប្រើ ជាពិសេសនៅថ្ងៃដែលល្បឿនខ្យល់ទាបរារាំងកសិដ្ឋានខ្យល់បង្កើតថាមពលកកើតឡើងវិញ៕