លោក Trump និយាយថា សមាជិកNATO គួរតែបង្កើនការចំណាយលើវិស័យការពារជាតិដល់៥% នៃ GDP

លោក Donald Trump កាលពីថ្ងៃអង្គារ ទី៧ ខែមករា បានជំរុញឱ្យសមាជិកសម្ព័ន្ធយោធាណាតូ បង្កើនការចំណាយលើវិស័យការពារជាតិដល់៥ ភាគរយនៃផលិតផលក្នុងស្រុកសរុប(GDP) ដោយបញ្ជាក់ពីការអះអាងជាយូរមករបស់លោកដែលថា ប្រទេសទាំងនេះបានបង់ថ្លៃតិច សម្រាប់ថ្លៃការពាររបស់សហរដ្ឋអាមេរិក។

ប្រធានាធិបតីសហរដ្ឋអាមេរិកដែលនឹងចូលកាន់តំណែងនៅពេលខាងមុខ បានប្រាប់អ្នកសារព័ត៌មានថា សមាជិកទាំងអស់ អាចមានលទ្ធភាពសម្រាប់ការចំណាយ ប៉ុន្តែវាគួរតែមានចំនួន៥ភាគរយ ពុំមែន២ ភាគរយនោះទេ។

លោក Trump មានការសង្ស័យជាយូរមកហើយចំពោះសម្ព័ន្ធយោធាណាតូ ដែលជាមូលដ្ឋាននៃសន្តិសុខនៅអឺរ៉ុបចាប់តាំងពីសង្គ្រាមលោកលើកទីពីរ ហើយកាលពីខែមុន បានរំលឹកឡើងវិញពីការគំរាមកំហែងក្នុងការចាកចេញពីសម្ព័ន្ធយោធានេះ ប្រសិនបើសមាជិករបស់ខ្លួន មិនបង្កើនការចំណាយ។

ប្រទេសចំនួន៣២របស់សម្ព័ន្ធឆ្លងមហាសាគរអាត្លង់ទិក កាលពីឆ្នាំ២០២៣ បានកំណត់កម្រិតអប្បបរមាសម្រាប់ការចំណាយលើវិស័យការពារជាតិចំនួន២ភាគរយនៃផលិតផលក្នុងស្រុកសរុប(GDP) ហើយសង្រ្គាមរបស់រុស្ស៊ីនៅអ៊ុយក្រែន បានធ្វើឱ្យសម្ព័ន្ធយោធាណាតូ ពង្រឹងស្លាបខាងកើតរបស់ខ្លួន និងបានបង្កើនការចំណាយ។

លោក Trump ពុំមែនជាមន្ត្រីកំពូលតែម្នាក់ ដែលអំពាវនាវឱ្យមានការបង្កើនការចំណាយនោះទេ ប្រមុខសម្ព័ន្ធយោធាណាតូ លោក Mark Rutte ក៏បាននិយាយដូចគ្នាកាលពីខែមុនថា «យើងនឹងត្រូវការច្រើនជាងពីរភាគរយ នៃការចំណាយលើវិស័យការពារជាតិ»។