អគ្គលេខាធិការអាស៊ាន ផ្ញើលិខិតកោតសរសើរជូន ឯកឧត្តមកិត្តិសង្គហបណ្ឌិត គន់ គីម ចំពោះការដឹកនាំក្នុងកិច្ចប្រជុំថ្នាក់រដ្ឋមន្ត្រីអាស៊ានស្តីពីការគ្រប់គ្រងគ្រោះមហន្តរាយ ឆ្នាំ២០២៥

យោងតាមលិខិតអបអរសាទរ និងកោតសរសើរពីឯកឧត្តមបណ្ឌិត កៅ គឹមហួន អគ្គលេខាធិការអាស៊ាន ជូន ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងក្នុងឋានៈជាប្រធានគណៈកម្មាធិការគ្រប់គ្រងគ្រោះមហន្តរាយអាស៊ាន ឆ្នាំ២០២៥។

ឯកឧត្តមបណ្ឌិត កៅ គឹមហួន សូមសម្តែងសេចក្តីសោមន្សរីករាយ និងទទួលស្គាល់ភាពជាអ្នកដឹកនាំ និងភាពជាប្រធានដឹកនាំគំរូរបស់ឯកឧត្តមកិត្តិសង្គហបណ្ឌិត គន់ គីម ក្នុងនាមជាប្រធាននៃកិច្ចប្រជុំថ្នាក់រដ្ឋមន្ត្រីអាស៊ានស្តីពីការគ្រប់គ្រងគ្រោះមហន្តរាយ (AMMDM) និងសន្និសីទនៃភាគីនៃកិច្ចព្រមព្រៀងអាស៊ានស្តីពីការគ្រប់គ្រងគ្រោះមហន្តរាយ និងការឆ្លើយតបបន្ទាន់ (AADMER) ឆ្នាំ២០២៥។

ឯកឧត្តមបណ្ឌិត កៅ គឹមហួន គូសបញ្ជាក់ថា ការប្ដេជ្ញាចិត្តឥតងាករេរបស់ ឯកឧត្តមកិត្តិសង្គហបណ្ឌិត គន់ គីម ពេញមួយអាណត្តិជាប្រធាន ឆ្នាំ២០២៥ បានចូលរួមចំណែកយ៉ាងធំធេងក្នុងការជំរុញភាពធន់របស់អាស៊ាន ជាពិសេសក្នុងឱកាសជាប្រវត្តិសាស្ត្រនៃខួបលើកទី២០ នៃ AADMER។

ជាចុងក្រោយ ឯកឧត្តមបណ្ឌិត កៅ គឹមហួន កត់សម្គាល់ឃើញថា តួនាទីឈានមុខគេរបស់ឯកឧត្តមកិត្តិសង្គហបណ្ឌិត គន់ គីម ក្នុងការបង្កើតកម្មវិធីការងារ AADMER 2026-2030 គឺមានសារៈសំខាន់បំផុត ដែលជាត្រីវិស័យណែនាំសម្រាប់អនាគតនៃការគ្រប់គ្រងគ្រោះមហន្តរាយនៅក្នុងតំបន់អាស៊ាន៕