ឯកឧត្ដម ហ៊ុន ម៉ានី បំពាក់គ្រឿងឥស្សរិយយសការងារជូនបុគ្គលិកអប់រំ លោកគ្រូ អ្នកគ្រូ នៅខេត្តកំពង់ស្ពឺ ប្រមាណជាង១៣០០នាក់

នាព្រឹកថ្ងៃទី២៣ ខែតុលា ឆ្នាំ២០២៥ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រី​ក្រសួង​មុខ​ងារ​សាធារណៈ និងជាប្រធានក្រុមការងារ​រាជរដ្ឋាភិបាលចុះមូលដ្ឋានខេត្តកំពង់ស្ពឺ បាន​អញ្ជើញជា​អធិបតី​ក្នុងពិធីបំពាក់គ្រឿងឥស្សរិយយសការងារជូនបុគ្គលិកអប់រំ លោកគ្រូ អ្នកគ្រូ នៃ​ខេត្ត​កំពង់​ស្ពឺ​ចំនួន ១៣១៤នាក់ នៅក្នុងបរិវេណសាលាខេត្តកំពង់ស្ពឺ។

ផ្អែកលើ​របាយការណ៍របស់ ឯកឧត្តមបណ្ឌិត ជាម ច័ន្ទសោភ័ណ អភិបាលនៃ​គណៈអភិបាល​ខេត្ត​កំពង់​ស្ពឺ និងជាអនុប្រធានអចិន្ត្រៃយ៍នៃក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ឃើញថាខេត្តកំពង់ស្ពឺទាំងមូលមានការអភិវឌ្ឍស្ទើរគ្រប់វិស័យ ក្នុងនោះវិស័យអប់រំមានការរីកចម្រើនគួរឱ្យកត់សម្គាល់ ទាំងហេដ្ឋារចនាសម្ព័ន្ធសាធារណៈនិងឯកជន ព្រមទាំងលទ្ធផលសិក្សាដ៏ល្អរបស់សិស្សពីមួយឆ្នាំទៅមួយឆ្នាំ។

មានប្រសាសន៍សំណេះសំណាលទៅកាន់អង្គពិធី ឯកឧត្ដមឧបនាយករដ្ឋមន្ត្រី បានកោតសរសើរ ថ្លែងអំណរគុណ និងវាយតម្លៃខ្ពស់លើតួនាទីនិងការខិតខំយកចិត្តទុកដាក់ខ្ពស់របស់បុគ្គលិកអប់រំ គ្រូបង្រៀន ព្រមទាំងក្រសួងអប់រំ យុវជន និងកីឡា ដែលបានចូលរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចជាតិតាមរយៈការបណ្ដុះបណ្ដាលធនធានមនុស្ស និងការចូលរួមអនុវត្តតាមគោលនយោបាយរបស់រាជរដ្ឋាភិបាល មិនថាតែក្នុងក្របខ័ណ្ឌខេត្តកំពង់ស្ពឺ ប៉ុន្តែក្នុងក្របខ័ណ្ឌទូទាំងប្រទេសផងដែរ។ ឯកឧត្ដមឧបនាយករដ្ឋមន្ត្រី បានមានប្រសាសន៍ថា ការអភិវឌ្ឍប្រទេសពិតជាត្រូវពឹងផ្អែកលើគ្រប់វិស័យទាំងអស់ ដែលយើងត្រូវធ្វើការស្រុះគ្នាតាមតួនាទីភារកិច្ចរៀងៗខ្លួន ទាំងនៅថ្នាក់ជាតិនិងថ្នាក់ក្រោមជាតិ៕