វិទ្យាស្ថានបណ្ដុះបណ្ដាលវិជ្ជាជីវៈចំនួនបីសហការគ្នាជំរុញលើការបណ្ដុះបណ្ដាលធនធានមនុស្សនៅកម្ពុជា

វិទ្យាស្ថានបច្ចេកវិទ្យា និងកសិកម្មកម្ពុជា និងវិទ្យាស្ថានជាតិពហុបច្ចេកទេសកម្ពុជា និង​វិទ្យាស្ថាន​បច្ចេក​ទេស​ឧស្សាហកម្ម បានបង្កើតកិច្ចសហប្រតិបត្តិការរួមគ្នា ដើម្បីផលិតធនធានមនុស្ស សំដៅ​ចូល​រួមជាមួយរាជរដ្ឋាភិបាល លើការដោះស្រាយបញ្ហាកង្វះជំនាញ ធនធានមនុស្ស និង​ជំរុញ​ឱ្យ​វិស័យឧស្សាហកម្មកម្ពុជាកាន់តែរីកចម្រើន ដោយការច្នៃប្រឌិត និងសុចរិតភាព។

ពិធីចុះហត្ថលេខាលើអនុស្សរណៈនៃការយោគយល់គ្នា នៅព្រឹកថ្ងៃទី២៤ ខែតុលា ឆ្នាំ២០២៥នេះ បាន​ប្រព្រឹត្តទៅ រវាង លោកជំទាវឧកញ៉ា តាំង ជូលី ប្រធាន​ក្រុម​ប្រឹក្សា​ភិបាល​វិទ្យាស្ថាន​បច្ចេក​វិទ្យា និងកសិកម្មកម្ពុជា (CITA) ជាមួយ ឯកឧត្តម ប៊ុន ភារិន នាយកវិទ្យាស្ថាន​ជាតិ​ពហុ​បច្ចេក​ទេស​កម្ពុជា​ (NPIC) និង ឯកឧត្តម ជិន តារ៉ា នាយកវិទ្យាស្ថានបច្ចេកទេសឧស្សាហកម្ម (ITI) ។

នៅក្រោយចប់ពិធីចុះហត្ថលេខានេះ លោកជំទាវឧកញ៉ា តាំង ជូលី បាន​មាន​ប្រសាសន៍​ប្រាប់​ព័ត៌មាន ប៊ីធីវី ឱ្យដឹងថា ចំពោះកិច្ចសហប្រតិបត្តិនៅថ្ងៃនេះ មានគោលបំណងសំខាន់ៗចំនួន២៖ ទី១.រវាងវិទ្យាស្ថាន ស៊ីតា និងវិទ្យាស្ថាន អិនភីអាយស៊ី គឺដើម្បីជំរុញ និងគាំទ្រលើ​សកម្មភាព​បណ្តុះ​បណ្តាល​ជំនាញបច្ចេកទេសនិងវិជ្ជាជីវៈ និងទី២. រវាងវិទ្យាស្ថាន ស៊ីតា និងវិទ្យាស្ថាន អាយ​ធី​អាយ គឺដើម្បីជំរុញនិងគាំទ្រលើសកម្មភាពបណ្តុះបណ្តាលជំនាញសេវាកម្មបរិក្ខារត្រជាក់, ការ​ដំឡើង​បណ្តាញ​អគ្គិសនី, និងការថែទាំនិងជួសជុលរថយន្តជាដើម។ លោកជំទាវបានបន្ថែមថា កិច្ច​សហប្រតិបត្តិការនេះ គឺស្របទៅតាមបេសកម្មរបស់ក្រសួងការងារ និង​បណ្តុះ​បណ្តាល​វិជ្ជា​ជីវៈ​។

សូមបញ្ជាក់ទៀតថា តាមរយៈអនុស្សរណៈនៃការយោគយល់គ្នារបស់វិទ្យាស្ថានទាំងបីខាងលើនេះ នឹង​ចែករំលែកចំណេះដឹង និងលើកស្ទួយគ្នាទៅវិញទៅមកលើកិច្ចសហប្រតិបត្តិការមួយចំនួន មាន​ដូចជា ផ្លាស់ប្តូរបទពិសោធន៍និងធនធានបណ្តុះបណ្តាល, ការអភិវឌ្ឍកម្មវិធីសិក្សា, ការ​បង្កើត​ឱកាស​សម្រាប់ការផ្លាស់ប្តូរគ្រូបណ្តុះបណ្តាលនិងនិស្សិត និងធ្វើការសហការ​ក្នុង​គម្រោង​ស្រាវ​ជ្រាវ ​និងនវានុវត្តន៍រួមគ្នាជាដើម៕ អត្ថបទ៖ ឈិត បូរ៉ាវី