លោកអភិបាលខណ្ឌ៧មករា បន្តដឹកនាំមន្រ្តីជំនាញត្រួតពិនិត្យការដ្ឋានវាយរំលំ អគារអតីត សណ្ឋាគារអង្គរមានជ័យ

ភ្នំពេញ៖ នាយប់ថ្ងៃទី២៤ ខែតុលា ឆ្នាំ២០២៥ ខណៈមេឃកំពុងធ្លាក់ភ្លៀង លោក ថេង សុថុល អភិបាលនៃគណៈអភិបាលខណ្ឌ៧មករា បានដឹកនាំក្រុមការងារ ជាមួយ មន្រ្តីជំនាញក្រសួង រៀបចំដែនដី នគរូបនីយកម្ម និងសំណង់ ដើម្បីបន្តត្រួតពិនិត្យមើលទីតាំងការដ្ឋាន ដំណើរការគ្រឿងចក្រវាយរំលំ ដើម្បីធានាបានសុខសុវត្ថិភាព បញ្ជៀសចរាចរណ៍ដល់បងប្អូនអ្នកធ្វើដំណើរនៅពេលរាត្រី ដែលមានទីតាំងស្ថិតនៅលើមហាវិថីព្រះ មុនីវង្ស(ផ្លូវ៩៣) កែងមហាវិថីកម្ពុជាក្រោម(ផ្លូវ១២៨) ក្នុងភូមិ១ សង្កាត់ មនោរម្យ ខណ្ឌ ៧មករា រាជធានីភ្នំពេញ ។

លោក អភិបាលបានបញ្ជាក់ថា ម្ចាស់ក្រុមហ៊ុនទទួលម៉ៅការវាយរំលំអគាអតីត «សណ្ឋាគារអង្គរមានជ័យ» ដែលចាស់ទ្រុឌទ្រោមខ្លាំង ត្រូវធានាសុវត្ថិភាពជាចម្បង ធ្វើឲ្យមានលក្ខណៈបច្ចេកទេស ជៀសវាងបង្កផលប៉ះពាល់ដល់ប្រជាពលរដ្ឋ រស់នៅជិតទីតាំងការដ្ឋាន ជាពិសេសនោះប្រជាពលរដ្ឋអ្នកធ្វើដំណើរឆ្លងតំបន់នេះតែម្ដង។

លោកអភិបាលខណ្ឌ៧មករា ក៏បានសំណូមពរនិងអធ្យាស្រ័យដល់បងប្អូនប្រជាពលរដ្ឋអ្នកធ្វើដំណើរ ដែលបង្កផលរំខានខ្លះ ការកកស្ទះចរាចរណ៍ ជាដើម ប៉ុន្តែយ៉ាងណាក៏មន្រ្តីជំនាញពាក់ព័ន្ធជួយសម្រួលបានល្អប្រសើរក្នុងអំឡុងការដ្ឋានកំពុងដំណើររហូតដល់បញ្ចប់។

សូមបញ្ជាក់ថា ដំណើរការវាយរំលំអគារនេះ មានការចូលរួមពី ឯកឧត្តម យស់ ឆោមណារ៉ាឌី រដ្ឋលេខាធិការ ក្រសួង រៀបចំដែនដី នគរូបនីយកម្ម និងសំណង់ និងអាជ្ញាធរខណ្ឌ ៧មករាផងដែរ និងក្រុមហ៊ុនទទួលម៉ៅការ សាជីវកម្ម ពិស្ណុការ អន្តរជាតិ។

តាមការបញ្ជាក់ពីលោក សុខ ស៉ីធារ៉ា អគ្គនាយកក្រុមហ៊ុនសាជីវកម្ម ពិស្ណុការ អន្តរជាតិ ទទួលម៉ៅការ បានឲ្យដឹងថា ដំណើរការវាយរំលំអគារនេះ ក្រុមហ៊ុនទទួលម៉ៅការ ពីក្រសួងរៀបចំដែនដី នគរូបនីយកម្ម និងសំណង់ រយះពេល៤៥ថ្ងៃ គិតចាប់កាលពីថ្ងៃទី១៣ ខែតុលា ឆ្នាំ២០២៥តទៅ នឹងវាយកម្ទេចរួចជាស្ថាពរ។

សូមបញ្ជាក់ថា អគារសហកម្មសិទ្ធិ (អតីតសណ្ឋាគារអង្គរមានជ័យ) មានក្រឡាផ្ទៃបាតទំហំ សរុប៥៩០ម៉ែត្រការ៉េ មានកម្ពស់៦ជាន់ ស្មើនឹង១០៧បន្ទប់។ អគារនេះ ត្រូវបានសាងសង់ឡើង តាំងពីអំឡុងឆ្នាំ១៩៥០ គិតមកដល់បច្ចុប្បន្នសំណង់អគារមានអាយុ ៧៥ឆ្នាំមកហើយ៕ អត្ថបទ៖ កុម្ភៈ