ក្រសួងការងារអំពាវនាវយុវជនចាប់យកឱកាសការងារក្នុងពិព័រណ៍ការងារជាង ៣ម៉ឺនកន្លែង នៅ​ដើម​ខែ​ក្រោយនេះ

ក្រសួងការងារ និងបណ្តុះបណ្តាលវិជ្ជាជីវៈ បន្តក្រើនរម្លឹកទៅដល់យុវជន សិស្ស/និស្សិត ក៏​ដូច​ជា​អ្នក​ស្វែង​រកការងារធ្វើ​ត្រៀមនូវប្រវត្តិរូបសង្ខេប (CV) ឱ្យបានច្រើនដើម្បីដាក់ពាក្យ និង​សម្ភាសន៍​ការងារ​ភ្លាម​ៗ នៅពិព័រណ៍ការងារ និងផលិតភាពជាតិ​នាដើម​ខែ​វិច្ឆិកា​ខាង​មុខ​នេះ​ដោយ​នាំ​យក​ឱកាស​ការងា​រជាង ៣ម៉ឺនកន្លែង។

លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ពិព័រណ៍ការងារ និងផលិតភាពជាតិ ឆ្នាំនេះ ធ្វើឡើងក្រោមប្រធានបទ «វិថីឆ្ពោះទៅរកផលិតភាព៖ ផ្សារ​ភ្ជាប់ជំនាញ បច្ចេកវិទ្យា និងឱកាសការងារ» មានរយៈពេល ២ថ្ងៃ គឺថ្ងៃទី១-២ ខែវិច្ឆិកា ឆ្នាំ​២០២៥ ដោយទទួលបានការគាំទ្រពីអង្គការអន្តរជាតិខាងការងារ ទីភ្នាក់ងា​រ​សហ​ប្រតិបត្តិការ​អន្តរ​ជាតិកូរ៉េ មូលនិធិអភិវឌ្ឍន៍ជំនាញ និងដៃគូពាក់ព័ន្ធជាច្រើនទៀត។

លោកបានបន្តថា ពិព័រណ៍ការងារនេះ មានការចូលរួមពីសំណាក់ក្រុមហ៊ុន សហគ្រាស ក្រសួង ស្ថាប័ន និងគ្រឹះស្ថានអប់រំបណ្តុះបណ្តាលប្រមាណ១៥០ ដែលមានស្តង់សរុបជាង ១៨០ ដែល​នឹង​ដាក់​តាំងបង្ហាញពីឱកាសការងារយ៉ាងច្រើនសំបូរបែប ដែលនឹង​ផ្តល់​ឱកាស​ការងារ​រហូត​ដល់​ជាង​ ៣ម៉ឺនកន្លែង មកពីគ្រប់វិស័យ។

សូមបញ្ជាក់ថា គោលបំណងសំខាន់ៗនៃព្រឹត្តិការណ៍ “ពិព័រណ៍ការងារ និងផលិតភាពជាតិ ឆ្នាំ​២០២៥​” គឺដើម្បីបន្តរក្សាតុល្យភាព​ក្នុង​ទីផ្សារ​ការងារ​តាមរយៈ​ការ​ជួយ​ជ្រោម​ជ្រែង​និយោជក​ដែល​មាន​តម្រូវ​ការជ្រើសរើសកម្លាំងពលកម្ម និងអ្នកស្វែងរកការងារ បង្កើតឱ្យមានកន្លែងជួបជុំគ្នាដ៏ធំ និង​ងាយស្រួលរវាងអ្នកស្វែងរកការងារ និយោជក អ្នកផ្តល់ការអប់រំបណ្ដុះបណ្ដាល និង​ដៃ​គូ​ពាក់​ព័ន្ធ​នានា ដើម្បីធ្វើការផ្លាស់ប្ដូរ និងចែករំលែកព័ត៌មានទីផ្សារការងារ ហើយក៏​មាន​ការ​រៀប​ចំ​ផង​ដែល​នូវ​សិក្ខាសាលាផលិតភាព​ដើម្បី​លើក​កម្ពស់​ការ​យល់​ដឹង​ស្តីពី​ការ​បង្កើន​ផលិត​ភាព​ការងារ​ដោយ​មាន​ការចែករំលែកចំណេះដឹង និងបទពិសោធន៍ពីវាគ្មិនជំនាញជាច្រើនផងដែរ៕ អត្ថបទ៖ ឈិត បូរ៉ាវី