សម្ដេចធិបតី អរគុណមិត្តចិនដែលបានផ្ដល់ការគាំទ្រឥតងាករេចំពោះបទឈប់បាញ់រវាងកម្ពុជា និងថៃ

ភ្នំពេញ៖ ថ្លែងក្នុងឱកាសចូលរួម កិច្ចប្រជុំកំពូលអាស៊ាន-ចិន លើកទី២៨ កាលពីថ្ងៃទី២៨ ខែតុលា ឆ្នាំ២០២៥ ទីក្រុងគូឡាឡាំពួ ប្រទេសម៉ាឡេស៊ី សម្តេចមហាបរវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងអំណរគុណមិត្តចិនដែលបានផ្ដល់ការគាំទ្រឥតងាករេចំពោះបទឈប់បាញ់រវាងកម្ពុជា និងថៃ។ នេះបើតាមយោងសេចក្ដីប្រកាសព័ត៌មានរបស់ក្រសួងការបរទេសកម្ពុជា។

ក្នុងឱកាសនោះ សម្ដេចធិបតីបាន គូសបញ្ជាក់បន្ថែមទៀតថា កិច្ចសម្របសម្រួលរបស់មិត្តចិនឱ្យមានការប្រាស្រ័យទាក់ទងគ្នាក្រៅផ្លូវការ គឺបានរួមចំណែកដល់ការកសាងទំនុកចិត្តគ្នាទៅវិញទៅមក និងបានជំរុញដល់កិច្ចសន្ទនា ដែលឆ្លុះបញ្ចាំងអំពីបំណងប្រាថ្នារួមរបស់យើង សម្រាប់សន្តិភាពជានិរន្តរ៍ និងស្ថិរភាពតំបន់។

នៅក្នុងកិច្ចប្រជុំកំពូលអាស៊ាន-ចិន លើកទី២៨នេះ ថ្នាក់ដឹកនាំអាស៊ាន បានស្វាគមន៍ការចុះហត្ថលេខាលើពិធីសារស្តីពីការដំឡើងកម្រិតកិច្ចព្រមព្រៀងតំបន់ពាណិជ្ជកម្មសេរីអាស៊ាន-ចិន ៣.០ (ACFTA 3.0) ដែលមានសក្តានុពលធំធេងក្នុងការបង្កើតកាលានុវត្តភាពថ្មីៗ និងឆ្លើយតបទៅនឹងការវិវឌ្ឍនៃថាមវ័ន្តពាណិជ្ជកម្ម។ ថ្នាក់ដឹកនាំបានអះអាងជាថ្មីនូវការប្តេជ្ញាចិត្តរួមក្នុងការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-ចិន (CSP) ដែលដើរតួនាទីយ៉ាងសំខាន់ក្នុងការរក្សាសន្តិភាព សន្តិសុខ ស្ថិរភាព និងវិបុលភាពក្នុងតំបន់។ ថ្នាក់ដឹកនាំបានស្វាគមន៍ការអនុម័តផែនការសកម្មភាពថ្មីដើម្បីអនុវត្តភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-ចិន ដើម្បីសន្តិភាព និងវិបុលភាព (ឆ្នាំ២០២៦-២០៣០) និងសំណើរបស់ចិនក្នុងការកំណត់ឆ្នាំ២០២៦ ជាឆ្នាំអាស៊ាន-ចិន សម្រាប់ខួបអនុស្សាវរីយ៍៥ឆ្នាំ នៃភាពជាដៃគូយុទ្ធសាស្ត្រគ្រប់ជ្រុងជ្រោយ។

សម្តេចធិបតីនាយករដ្ឋមន្ត្រី ក៏បានគូសបញ្ជាក់ពីតួនាទីយ៉ាងសកម្មរបស់ចិន នៅក្នុងដំណើរការអន្តរកម្មថាមពលអាស៊ាន ជាពិសេសការរួមចំណែកក្នុងការជំរុញបណ្តាញអគ្គិសនីអាស៊ាន តាមរយៈអន្តរតំណភ្ជាប់ គ្នាទៅវិញទៅមកក្របខ័ណ្ឌសម្រាប់ការធ្វើពាណិជ្ជកម្មឆ្លងដែន និងកម្មវិធីបណ្តុះបណ្តាលសមត្ថភាពនានា និងបានអះអាងជាថ្មីអំពីការគាំទ្ររបស់កម្ពុជាចំពោះសំណើរបស់ចិនក្នុងការបង្កើតមជ្ឈមណ្ឌល សហប្រតិ បត្តិការថាមពលស្អាតអាស៊ាន-ចិន ដើម្បីកសាងអនាគតថាមពលមួយក្នុងតំបន់ប្រកបដោយសុវត្ថិភាព ភាពធន់ និងមានកម្រិតឧស្ម័នកាបូនទាប។

សម្តេចធិបតីក៏បានគូសបញ្ជាក់ពីសារៈសំខាន់នៃការផ្លាស់ប្តូរ រវាងប្រជាជន និងប្រជាជនដែលជាមូលដ្ឋានគ្រឹះនៃភាពជាដៃគូអាស៊ាន-ចិន ដែលស្ថិតស្ថិរ ព្រមទាំងបាន កោតសរសើរចំពោះវឌ្ឍនភាពក្រោមឆ្នាំនៃការផ្លាស់ប្ដូរប្រជាជន និងប្រជាជនអាស៊ាន-ចិន (២០២៤-២០២៥) និងបានសម្តែងការគាំទ្រដ៏មុតមាំចំពោះការបង្កើតឱ្យមានកិច្ចប្រជុំរដ្ឋមន្ត្រីទេសចរណ៍អាស៊ាន-ចិន៕