សន្និសីទប្រចាំឆ្នាំនៃរដ្ឋភាគី CWC ទទួលស្គាល់ថា ការប្រើប្រាស់អាវុធ​ដែលមាន​សារជាតិ​គីមី​ជាអំពើ​រំលោភធ្ងន់ធ្ងរដល់ការហាមប្រាមអាវុធគីមីហើយគបី្បទទួលទណ្ឌកម្មអន្តរជាតិ

សន្និសីទប្រចាំឆ្នាំនៃរដ្ឋភាគី Chemical Weapons Convention ដែលប្រព្រឹត្តទៅនៅទីក្រុងឡាអេ ប្រទេសហូឡង់ ក្រោមការរៀបចំដោយ អង្គការស្តីពីការហាមប្រាមអាវុធគីមី (Organisation for the Prohibition of Chemical Weapons – OPCW) ដែលមានថ្នាក់ដឹកនាំនៃអាជ្ញាធរជាតិអាវុធគីមីកម្ពុជា បានទទួលស្គាល់ថា ការប្រើប្រាស់អាវុធដែលមានសារជាតិគីមី ការផលិត ស្តុកទុក ជាដើម ក្នុងកាលៈទេសៈណាក៏ដោយ គឺជាអំពើដែលរំលោភធ្ងន់ធ្ងរដល់គោលការណ៍នៃសន្ធិសញ្ញាអន្តរជាតិស្តីពីការហាមប្រាមអាវុធគីមី (Chemical Weapons Convention) ហើយគបី្បទទួលនូវទណ្ឌកម្មអន្តរជាតិ។

នៅថ្ងៃទី ២៣ ដល់ថ្ងៃទី ២៩ ខែវិច្ឆិកា ឆ្នាំ ២០២៥ ឯកឧត្តម នង សាកល អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានចូលរួមសន្និសីទប្រចាំឆ្នាំ នៃរដ្ឋភាគី Chemical Weapons Convention ដែលប្រព្រឹត្តទៅនៅទីក្រុងឡាអេ ប្រទេសហូឡង់ ក្រោមការរៀបចំដោយ អង្គការស្តីពីការហាមប្រាមអាវុធគីមី (Organisation for the Prohibition of Chemical Weapons – OPCW) ដែលមានថ្នាក់ដឹកនាំនៃអាជ្ញាធរជាតិអាវុធគីមីកម្ពុជា ចូលរួមផងដែរ។

សន្និសីទធ្វើឡើងដើមី្បពិនិត្យវាយតម្លៃការអនុវត្តរបស់រដ្ឋភាគី តាមស្មារតីរបស់ CWC សំដៅទប់ស្កាត់ការប្រើប្រាស់អាវុធដែលមានសារជាតិគីមី ដែលហាមប្រាមជាសកល ដែលបង្កការប៉ះពាល់ធ្ងន់ធ្ងរដល់មនុស្ស និងបរិស្ថាន ជារួម។

ក្រៅពីនោះ សន្និសីទក៏បានពិនិត្យអំពីអនុសាសន៌ និងផែនការសកម្មភាព ដែលនឹងត្រូវអនុវត្តបន្តក្នុងស្មារតីលើកកម្ពស់កិច្ចខិតខំប្រឹងប្រែងរួម ដើមី្បប្រយុទ្ធប្រឆាំងការប្រើប្រាស់គ្រប់ទំរង់នៃអាវុធជីវសាស្ត្រ ឬអាវុធគីមី ដូចជាការផលិត ការដឹកជញ្ជូន ការស្តុកទុក ឬការចែកចាយ ខុសនិយាមអន្តរជាតិ ដែលបង្កហានិភ័យនិងគ្រោះថ្នាក់ធ្ងន់ធ្ងរដល់មនុស្សជាតិ និងបរិស្ថាន។

អង្គសន្និសីទបានទទួលស្គាល់ថា ការប្រើប្រាស់អាវុធដែលមានសារជាតិគីមី ការផលិត ស្តុកទុក ជាដើម ក្នុងកាលៈទេសៈ ណាក៏ដោយ គឺជាអំពើដែលរំលោភធ្ងន់ធ្ងរដល់គោលការណ៍នៃសន្ធិសញ្ញាអន្តរជាតិស្តីពីការហាមប្រាមអាវុធគីមី (Chemical Weapons Convention) ហើយគបី្បទទួលនូវទណ្ឌកម្មអន្តរជាតិ៕