ក្រសួងការពារជាតិ៖ ផេកផ្លូវការរបស់កងទ័ពថៃភូមិភាគទី២ មាន​ភាព​សកម្ម​ក្នុង​ការ​ផ្សព្វ​ផ្សាយ​ព័ត៌​មាន​ក្លែង​ក្លាយ​ជាបន្តបន្ទាប់ដែលខុសស្រឡះពីការពិត

នៅរសៀលថ្ងៃទី៨ ខែធ្នូ ឆ្នាំ២០២៥នេះ ក្រសួងការពារជាតិ នៃព្រះរាជាណាចក្រកម្ពុជា បាន​កត់​សម្គាល់​បន្ថែម​ថា ផេកផ្លូវការរបស់កងទ័ពថៃភូមិភាគទី២ មានភាពសកម្មក្នុង​ការ​ផ្សព្វ​ផ្សាយ​ព័ត៌មា​ន​ក្លែង​ក្លាយជាបន្តបន្ទាប់ដែលខុសស្រឡះពីការពិត ដោយបានចុះផ្សាយថា ”កម្ពុជាបាន​ចល័ត​សព្វា​វុធ​ធុន​ធ្ងន់​នៅតាមបណ្តោយព្រំដែនកម្ពុជា-ថៃ” ហើយត្រូវបានបណ្តាញ​សារព័ត៌មាន​របស់​ថៃ​មួយ​ចំនួន​បានដកស្រង់ និងចេញផ្សាយជាបន្តបន្ទាប់ ក្នុងចេតនាបំភ័ន្តសាធារណមតិជាតិ និង​អន្តរជាតិ និង​យក​មក​ធ្វើ​ជា​លេស​ដើម្បី​បង្ក​ឱ្យ​មាន​ភាព​តាន​តឹង​ផ្នែក​យោធា​ជា​មួយក​ម្ពុជា​ឡើង​វិញ។ នេះ​បើយោងតាមសេចក្តីប្រកាសព័ត៌មានរបស់​លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា។

ក្រសួងការពារជាតិ នៃព្រះរាជាណាចក្រកម្ពុជា ធ្វើការបដិសេធ និងគូសបញ្ជាក់នូវការពិតថា៖

១. ការលើកឡើងរបស់ផេកផ្លូវការរបស់កងទ័ពភូមិភាគទី២ថៃ និង​បណ្តាញ​សារ​ព័ត៌មាន​ថៃ​មួយ​ចំនួន ដែលថាកម្ពុជាបានចល័តសព្វាវុធធុនធ្ងន់នៅតាមបណ្តោយព្រំដែនកម្ពុជា-ថៃ គឺជា​ព័ត៌មាន​មិន​ពិត

២. កង​កម្លាំង​របស់​កម្ពុជា​មិន​បាន​ធ្វើ​សកម្មភាព​ណា​មួយ​ដែល​រំលោភ​បំពាន​លើ​កិ​ច្ច​ព្រម​ព្រៀង​បទ​ឈប់​បាញ់ និងសេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដូច​ការ​លើក​ឡើង​របស់​បណ្តាញ​សង្គម និងសារព័ត៌មានថៃនោះឡើយ

ក្រសួងការពារជាតិ នៃព្រះរាជាណាចក្រកម្ពុជា សូមបញ្ជាក់សាជាថ្មីនូវការប្តេជ្ញាចិត្តយ៉ាងម៉ឺងម៉ាត់ ក្នុងការគោរព និងការអនុវត្ត នូវកិច្ច​ព្រមព្រៀង​បទ​ឈប់​បាញ់ និង​សេចក្តី​ថ្លែង​ការណ៍​រួម​ស្តីពី​សន្តិភាព​រវាងកម្ពុជានិងថៃ ឱ្យបានពេញលេញ និងខ្ជាប់ខ្ជួនបំផុត ព្រមទាំង​បន្ត​សហការ​គ្នា​ឱ្យ​បាន​ជិត​ស្និទ្ធ​នៅគ្រប់កម្រិត សំដៅស្វែងរកកិច្ចសហប្រតិបត្តិការជាក់ស្តែងដើម្បីលើកកម្ពស់ សន្តិភាព និង​ស្ថិរភាពរវាងប្រទេសទាំងពីរ ក៏ដូចជាការវិ​ល​ត្រឡប់​ទៅ​រក​ប្រក្រតីភា​ព​ឡើង​វិញ​ឱ្យ​បាន​ឆាប់​រហ័ស​៕