ការស្ដារប្រឡាយទួលសំពៅដំណាក់កាលទី២ប្រវែង១៧០០ម៉ែត្រ ត្រូវបានស្តាររួចរាល់ និងរៀបចំស្តារជំហានទី៣ ដើម្បីបញ្ចៀសការជន់លិចនៅរដូវវស្សាខាងមុខនេះ

ភ្នំពេញ៖គិតត្រឹមបច្ចុប្បន្ននេះ កំណាត់ប្រឡាយទួលសំពៅដំណាក់កាលទី២ ប្រវែងជាង១៧០០ម៉ែត្រ ត្រូវបានស្ដាររួចរាល់តាមផែនការដែលបានគ្រោងទុករបស់រដ្ឋបាលខណ្ឌសែនសុខ។

ក្រោមការយកចិត្តទុកដាក់ និងឧបត្ថម្ភថវិកា មធ្យោបាយពីឯកឧត្តមឃួង ស្រេង អភិបាលរាជធានីភ្នំពេញ ចាប់តាំងពីខែមករា ឆ្នាំ២០២៦មក លោកចេង មុនីរ៉ា អភិបាលខណ្ឌសែនសុខ បានដឹកនាំការស្តារកាយជម្រៅប្រឡាយទួលសំពៅ ដំណាក់កាលទី២ ចាប់ពីភូមិដំណាក់ សង្កាត់គោកឃ្លៀង ដល់ភូមិក្រាំងអង្ក្រង តំបន់ខាងក្រោយផ្សារឈូកមាស ក្នុងសង្កាត់ក្រាំងធ្នង់ ដែលដំណាក់កាលទី១ បានស្ដាររួចរាល់ កាលពីចុងឆ្នាំ២០២៥មកម្លេះ ។

លោកចេង មុនីរ៉ា បានបញ្ជាក់ថា តំបន់ប្រ៉បផ្លូវរថភ្លើង ក្នុងភូមិដំណាក់ សង្កាត់គោកឃ្លៀង ជាប់ព្រំប្រទល់ ខណ្ឌពោធិ៍សែនជ័យ ប្រឡាយទួលសំពៅ គឺជាប្រឡាយមេដ៏សំខាន់មួយ ក្នុងយុទ្ធសាស្រ្តរំដោះទឹក ផ្នែកខាងលិចភូមិសាស្ត្រខណ្ឌសែនសុខ ដែលបានដើរតួនាទីយ៉ាងសំខាន់ នាំទឹកទៅកាន់ស្ថានីយ៍ប៊ូមទឹកទួលសំពៅ ស្ថិតក្នុងសង្កាត់ឃ្មួញ ដើម្បីបញ្ចៀសការជន់លិចផ្ទះសម្បែងរបស់បងប្អូនប្រជាពលរដ្ឋ និងហេដ្ឋារចនាសម្ព័ន្ធក្នុងមូលដ្ឋាន និងត្រៀមបន្តស្តារដំណាក់កាលទី៣បន្ទាប់ពីប្រឡាយទួលសំពៅ ដំណាក់កាលទីពីរបានស្ដាររួចរាល់ហើយ។

ជាមួយគ្នានេះ លោកអភិបាលខណ្ឌ ក៏បានអំពាវនាវដល់ប្រជាពលរដ្ឋ ដែលជាអ្នករស់នៅអមសងខាងប្រឡាយទួលសំពៅ និងអ្នកធ្វើដំណើរឆ្លងកាត់ សូមចូលរួមទុកដាក់វេចខ្ចប់សំរាម ឱ្យបានត្រឹមត្រូវ និងបញ្ចេញសំរាមតាមម៉ោងពេលកំណត់ ដើម្បីអនាម័យ បរិស្ថានសោភ័ណភាព ផាសុកភាព និងដើម្បីទីក្រុងស្អាត បញ្ចៀសការជន់លិចក្នុងមូលដ្ឋានខណ្ឌ ក៏ដូចជាក្នុងភូមិសាស្រ្តរាជធានីភ្នំពេញផងដែរ៕

លីហេង