គណៈកម្មការទី៦ នៃរដ្ឋសភា ចាប់ផ្តើមពិនិត្យសេចក្តីព្រាងច្បាប់ប្រឆាំងការឆបោកតាមប្រព័ន្ធបច្ចេកវិទ្យា ដែលកំណត់បទល្មើសព្រហ្មទណ្ឌថ្មីចំនួន ៥

ឯកឧត្តម អង្គ វង្ស វឌ្ឍានា ប្រធានគណៈកម្មការនីតិកម្ម និងយុត្តិធម៌ (គណៈកម្មការទី៦) នៃរដ្ឋសភា នាព្រឹកថ្ងៃទី២០ ខែមីនា ឆ្នាំ២០២៦នេះបានអញ្ជេីញដឹកនាំកិច្ចប្រជុំផ្ទៃក្នុងដើម្បីពិនិត្យ និងសិក្សាលើ «សេចក្តីព្រាងច្បាប់ ស្តីពីការប្រឆាំងការឆបោកតាមប្រព័ន្ធបច្ចេកវិទ្យា»។

សេចក្តីព្រាងច្បាប់ថ្មីនេះ កំណត់បង្កើតឱ្យមាន បទល្មើសព្រហ្មទណ្ឌថ្មីចំនួន ៥ បន្ថែម ដើម្បីទប់ស្កាត់ល្បិចកលបោកប្រាស់ក្នុងយុគសម័យឌីជីថល រួមមាន៖

១. បទឆបោកតាមប្រព័ន្ធបច្ចេកវិទ្យា៖ សំដៅលើការប្រើប្រាស់បច្ចេកវិទ្យាដើម្បីភូតភរ បោកប្រាស់យកទ្រព្យសម្បត្តិ។

២. បទរៀបចំ ឬដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យា៖ ផ្តោតលើមេខ្លោង និងការចាត់តាំងបង្កបង្កើតទីតាំងបង្ក្រាប។

៣. បទជ្រើសរើស ឬបណ្តុះបណ្តាលបុគ្គលឱ្យប្រព្រឹត្តអំពើឆបោក៖ ការទប់ស្កាត់ការរើសមនុស្សឱ្យចូលក្នុងខ្សែចង្វាក់បទល្មើស។

៤. បទប្រមូលឯកសារអត្តសញ្ញាណ ឬព័ត៌មានផ្ទាល់ខ្លួនក្នុងចេតនាទុច្ចរិត៖ ការពារទិន្នន័យឯកជនភាពរបស់ពលរដ្ឋ។

៥. ការបង្កើតទម្រង់ពិសេសនៃបទល្មើសសម្អាតប្រាក់៖ ដើម្បីតាមដាន និងបង្ក្រាបលំហូរហិរញ្ញវត្ថុដែលបានមកពីការឆបោក។

សេចក្តីព្រាងច្បាប់នេះមាន ៥ ជំពូក និង ២៤ មាត្រា ត្រូវបានគណៈរដ្ឋមន្ត្រីអនុម័តកាលពីថ្ងៃទី១៣ ខែមីនា ឆ្នាំ២០២៦ ។ កាលពីថ្ងៃទី១៩ ខែ មីនា ឆ្នាំ ២០២៦ ម្សិលមិញនេះគណៈកម្មាធិការអចិន្ត្រៃយ៍រដ្ឋសភា បានសម្រេចប្រគល់ភារកិច្ចឱ្យគណៈកម្មការទី៦ សហការជាមួយគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន ដើម្បីសិក្សាឱ្យបានល្អិតល្អន់ និងធ្វើរបាយការណ៍ដាក់ជូន គណៈកម្មាធិការអចិន្ត្រៃយ៍រដ្ឋសភាវិញ។

សូមបញ្ជាក់ថា ការរៀបចំច្បាប់នេះឡើងក្នុងគោលបំណងធានាឱ្យបាននូវប្រសិទ្ធភាពខ្ពស់ស្របតាមស្តង់ដាអន្តរជាតិ ដោយផ្អែកលើ៖

អនុសញ្ញាអង្គការសហប្រជាជាតិស្តីពីការប្រឆាំងបទឧក្រិដ្ឋកម្មឆ្លងដែនដែលមានអង្គការចាត់តាំង។

អនុសញ្ញាអង្គការសហប្រជាជាតិស្តីពីការប្រឆាំងបទល្មើសបច្ចេកវិទ្យា។

បទពិសោធន៍នៃច្បាប់ពីបណ្តាប្រទេសជឿនលឿនមួយចំនួន។

ការដាក់ចេញនូវច្បាប់នេះ ត្រូវបានគេរំពឹងថាជានីតិវិធីដ៏សំខាន់ក្នុងការបង្កើនទំនុកចិត្តលើការប្រើប្រាស់ប្រព័ន្ធបច្ចេកវិទ្យា និងការពារសុវត្ថិភាពសង្គមក្នុងព្រះរាជាណាចក្រកម្ពុជា។