ក្រសួងមុខងារសាធារណៈ៖ ៨០% នៃក្រសួង-ស្ថាប័នចំនួន១០ ដែលបាន​វិភាគ​មុខងារ​រួច​រាល់​បាន​កាត់​បន្ថយ​អង្គភាពរបស់ខ្លួន រីឯ២០% ផ្សេងទៀតរក្សាស្ថានភាពមិនពង្រីក

តាមរយៈបទបង្ហាញរបស់ លោកជំទាវ តឹក កុស្សនា អគ្គលេខាធិការរង នៃអគ្គ​លេខា​ធិការដ្ឋាន​នៃ​គណៈ​ក​ម្មាធិការកែទម្រង់រដ្ឋបាលសាធារណៈ ក្រសួងមុខងារសាធារណៈ បានរំលេចថា ក្នុង​ចំណោម​ក្រសួង-ស្ថាប័នចំនួន១០ ដែលបានវិភាគមុខងាររួចរាល់កន្លងមក មានក្រសួង ស្ថាប័ន​ចំនួន​៨ ​បានអនុវត្តការកាត់បន្ថយអង្គភាពចំណុះរបស់ខ្លួនសរុបចំនួន១៨ អង្គភាព ខណៈ​ដែល​ក្រសួង-ស្ថាប័នមួយចំនួនផ្សេងទៀតបានរក្សាស្ថានភាពដើម ដោយគោរពតាមអភិក្រម «ពង្រឹង ជា​ជាងពង្រីក»។ អង្គភាពដែលបានកាត់បន្ថយទាំងនោះរួមមាន កម្រិតអគ្គនាយកដ្ឋានចំនួន១ និង​កម្រិតនាយកដ្ឋានចំនួន១៧។ នេះជាការចូលរួមចំណែកយ៉ាងសំខាន់ជាមួយគ្នា ក្នុង​ការ​កែ​ទម្រង់​រដ្ឋបាលសាធារណៈ។ ដោយឡែកក្រសួង ស្ថាប័នដទៃទៀត កំពុងបន្តពិភាក្សា និងពិនិត្យ​ជា​បន្ត​បន្ទាប់ ដោយត្រូវគោរពតាមអភិក្រមដដែល។

ការលើកឡើងនេះ ជាការធ្វើវឌ្ឍនភាពនៃការពិនិត្យឡើងវិញ រចនាសម្ព័ន្ធ និងការវិភាគមុខងារ របស់​ក្រសួង-ស្ថាប័ន។ កន្លងមក ក្រសួងមុខងារសាធារណៈ បានសហការជាមួយក្រសួង ស្ថាប័ន ចំណុះ​អង្គការនីតិប្រតិបត្តិទាំងអស់ដើម្បីអនុវត្តការងារនេះ ដែលជាវិធានគន្លឹះទី២ ក្នុង​ការ​កែ​ទម្រង់​រដ្ឋបាលសាធារណៈ។ ជាជំហាន ក្រោយការប្រជុំពិភាក្សាបច្ចេកទេសជាច្រើនដង ក្រសួង ស្ថាប័ន​នីមួយៗ បានបញ្ជូនសេចក្តីព្រាងនៃការរៀបចំ និងការប្រព្រឹត្តទៅ របស់ខ្លួន មក​ក្រសួង​មុខ​ងារ​សាធារណៈ​ដើម្បី ពិនិត្យ និងផ្តល់យោបល់ស្របតាមអភិក្រមរបស់រាជរដ្ឋាភិបាល នោះគឺការ «ពង្រឹង​ជាជាពង្រីក» និង «រៀបចំផ្ទះឱ្យរៀបរយ»។

ការរៀបចំការងារវិភាគមុខងារកន្លងមក គឺក្នុងគោលដៅដើម្បីសម្រេចបាននូវការរៀបចំមុខងារ រចនា​សម្ព័ន្ធ ការប្រើប្រាស់ធនធានមនុស្ស និងការប្រើប្រាស់ថវិកា កាន់តែច្បាស់លាស់។ លោក​ជំទាវ​អគ្គលេខាធិការរង បានបន្ថែមថា លទ្ធផលនៃការវិភាគមុខងារនេះ បានជួយឱ្យក្រសួង ស្ថាប័ន​មាន​មូលដ្ឋានច្បាស់លាស់ ក្នុងការរៀបចំ រចនាសម្ព័ន្ធ​ថ្មី​ឱ្យ​សម​ស្រប​ជាមួយ​ភារ​កិច្ច​ពិត​ប្រាកដ​ ហើយក៏ជួយកាត់បន្ថយការស្ទួនភារកិច្ច និងបង្កើន​ការ​សម្រ​ប​សម្រួល​រវាង​អង្គ​ភាព​កាន់​តែ​ល្អ​ប្រសើរ​៕