កីឡាករ និងពិធីករល្បីៗនៅកម្ពុជាចូលផ្តល់កម្លាំងចិត្តដល់ពលរដ្ឋភៀសសឹកតាមរយៈកម្មវិធីសង្ក្រាន្ត

សហភាពសហព័ន្ធយុវជនកម្ពុជា (ស.ស.យ.ក) សហការជាមួយអាជ្ញាធរខេត្តសៀមរាប នៅថ្ងៃទី៣០ ខែមីនា ឆ្នាំ២០២៦ បានរៀបចំកម្មវិធីសង្រ្កាន្តជំរំភៀសសឹក នៅវត្តធម្មរង្សី (ហៅវត្តសំពៅលូន) ក្នុងស្រុកក្រឡាញ់ ខេត្តសៀមរាប ដែលក្នុងកម្មវិធីនេះ មានកីឡាករ និងពិធីករល្បីៗនៅកម្ពុជា បានចូលរួមលេងល្បែងប្រជាប្រិយខ្មែរ និងកម្មវិធីកម្សាន្តផ្សេងៗទៀតជាមួយជនភៀសសឹកយ៉ាងស្និទ្ធស្នាល បង្កើត ភាពសប្បាយរីករាយ។

កីឡាការិនី កែ ឡេង អតីតម្ចាស់មេដាយមាសប៉េតង់ពិភពលោកជាច្រើនជំនាន់ បានប្រាប់BTVថា ការចូលរួមកម្មវិធីសង្ក្រាន្តនៅជំរំភៀសសឹកនេះ គឺចង់ចូលរួមផ្តល់ភាពកក់ក្ដៅជូនពលរដ្ឋភៀសសឹកដែលកំពុងស្នាក់នៅជំរំ ក្នុងនាមស្មារតីខ្មែរតែមួយ។

ពិធីករល្បីៗនៅកម្ពុជា បានលើកឡើងដែរថា ក្នុងនាមអ្នកនៅសមរភូមិជួរក្រោយ គឺតែងតែគិតគូរពីសុខទុក្ខជនភៀសសឹក ជាក់ស្តែងដូចជាថ្ងៃនេះ បានអមដំណើរឯកឧត្តម ហ៊ុន ម៉ានី ប្រធានសហភាពសព័ន្ធយុវជនកម្ពុជា ចូលរួមក្នុងកម្មវិធីសង្ក្រាន្តនៅជំរំភៀសសឹកនេះ ដើម្បីកាត់បន្ថយអារម្មណ៍តានតឹងរបស់ជនភៀសសឹក។ ពិធីករទាំងនោះបានបន្តទៀតថា រីឯបញ្ហាព្រំដែនវិញ រាជរដ្ឋាភិបាលនៅតែបន្តដោះស្រាយជាមួយភាគីថៃ។

គួរបញ្ជាក់ដែរថា កម្មវិធីសង្រ្កាន្តជំរំភៀសសឹក នៅវត្តធម្មរង្សី (ហៅវត្តសំពៅលូន) ស្រុកក្រឡាញ់ ខេត្តសៀមរាប មានការរៀបចំលេងល្បែងប្រជាប្រិយខ្មែរជាច្រើនប្រភេទ តន្រ្តីស្គរដៃ ការសម្តែងល្ខោនបាសាក់ និងពិសារនំបញ្ចុកសាមគ្គី។ កម្មវិធីនេះ ក៏មានការអញ្ជើញចូលរួមពីឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា រួមដំណើរពីសមាជិក សមាជិកា សហភាពសហព័ន្ធយុវជនកម្ពុជា សិល្បករ កីឡាករ និងអ្នកមានប្រិយភាពក្នុងបណ្តាញសង្គមមួយចំនួនទៀត៕

អត្ថបទ៖ ទូច សោភ័ណ